Read Imbabura Highland Quichua GÉNESIS 50 Bible Online

GÉNESIS 50 - Imbabura Highland Quichua bible

GÉNESIS 50

¹Chashna huañujpimi Joseca, paipaj taitata ugllarishpa, ñavipi muchashpa ninanda huacajurca.

²Chai jipami Joseca, jambishpa causaj paita servij jambijcunataca, paipaj taita huañushcapica, mishquillagu ashnajuj jambicunahuan javichun mandarca. Shina mandajpimi jambijcunaca, taita Israeltaca mishquilla ashnajuj jambicunahuan javinajurca.

³Chuscu chunga punllacunacamanmi, javinataca tucuchirca. Chashna punllacunacamanmi, mishquilla ashnajuj jambihuan javishpa tucuchina carca. Egiptopi causajcunaca, canchis chunga punllacunacamanmi huacanajurca.

⁴Chai huacana punllacuna yalijpimi Joseca, Faraonbaj huasipi causajcunataca, cashna nirca: —Cunan cangunapaj ñavipi ñuca ali ricurishca cajpica, Faraonman cashna nigripaichi nipanimi:

⁵Joseca cashnami nijun: ‘Ñuca taitami, cashna nishpa juramentuchihuarca: Ricui, ñucaca ña huañugrinimi. Ñuca huañushpa pambai tucungapaca, Canaán llactapi tiaj utujutami allachircani. Chai utujupi pambahuangui nihuarcami. Chaimandami cunanga, ñuca taitata pambashpa tigramugripani’ nijunmi nigripaichi— nircami.

⁶Shina villagrijpimi Faraonga, cashna nirca: —Pai canda juramentuhuai nishcashnallata, cambaj taitata pambangapaj rilla— nircami.

⁷Shina nijpimi Joseca, paipaj taitata pambangapaj vichai rirca. Paihuanga, Faraonbaj tucuilla servijcunapash, Faraonbaj huasipi tiaj rucucunapash, Egipto llactamanda tucui rucucunapashmi rinajurca.

⁸Josepaj huasi ucu puracunapash, tucuilla paipaj huauquicunapash, paipaj taitapaj huasi ucu puracunapashmi rinajurca. Gosén llactapica, paicunapaj huahuacunata, llamacunata, huarmi huagracunatallami saquinajurca.

⁹Paihuanga carretacunapash, caballocunapi tiarishca soldadocunapashmi vichai rinajurca. Shinami ashtaca ashtaca gentecuna tandanajurca.

¹⁰Chashnami, Atad shuti trillana pambaman chayarca. Chai pambaca, Jordán yacu chimba ladomanmi. Chaipimi ninandapacha llaquirishpa, yarishpa yarishpa huacanajurca. Taita huañushcamandaca, canchis punllacamanmi Joseca ninan llaquillapacha carca.

¹¹Chai llactapi causaj cananeocunaca, Atad shuti trillana pambapi chashna huacanajujta ricushpami, cashna ninajurca: “Egiptopi causajcunaca, ninandapacha llaquirishpami huacanajun” ninajurcami. Chaimandami, Jordán yacu chimba ladopi tiaj pambataca, Abel-mizraim shutita shutichinajurca.

¹²Jacobopaj churicunaca, Jacobotaca imashna paicunata mandashcashnallatami ruranajurca.

¹³Paicunapaj churicunaca, Canaán llactaman apashpami, Macpela shuti pambapi tiaj jatun utujupi pambarca. Chai pambataca Abrahammi, pambana alpa cachun, heteopura Efrón shuti runata randishca carca. Chai pambaca, Mamre shuti pueblomandaca indi llujshimuj ladomanmi.

¹⁴Joseca, paipaj huauquicunandi, paipaj taitata pambangapaj paihuan vichai shamushca tucui gentecunandimi, Egiptoman tigrajurca. Paipaj taitata pambashca jipami, chashna tigranajurca.

¹⁵Josepaj huauquicunaca, paicunapaj taita huañujpimi, cashna ninajurca: “Joseca, ñucanchitaca napashchari ricunayachingachu. Chashna na ricunayachishpaca, tucui ima nalita rurashcamandami, ñucanchiman cunatallata cunga” ninajurcami.

¹⁶Chaimandami, Josepajman cashna nichun cachanajurca: “Cambaj taitaca nara huañushpallatami, cashna nishpa mandarca:

¹⁷‘Josetaca, cashna ninguichi: Cunanga, cambaj huauquicuna canda nalita rurashpa, juchata rurashcataca cungapailla. Candaca, nalitamari rurashcanchi ninguichi’ nircami. Chaimandami cunanga, chai nalita rurashcataca cungapai ninajupanchi. Ñucanchica, cambaj taitapaj Taita Diosta servijcunami capanchi nigripaichi” nichunmi cachanajurca. Shina nishpa villanajujpillatami, Joseca huacarca.

¹⁸Paipaj huauquicunapash shamushpami, Josepaj ñaupajpi cungurishpa: —Canda servingapajmi, caipi capanchi— ninajurca.

¹⁹Shina nijpimi Joseca, cashna nishpa tigrachirca: —Na manllanachu canguichi. ¿Ñucaca, Taita Diospaj randichu tiajuni?

²⁰Cangunaca, ñucata llaquichinatami yarircanguichi. Ashtahuangarin Taita Diosmi, alipaj pushamuhuashca. Chaitaca, cunanmi ricunajunchi. Paimi, ashtaca gentecunata causaihuan charingapaj chashna rurashca.

²¹Cunanga, na manllanachu canguichi. Ñucami cangunamambash, cangunapaj huahuacunamambash, granocunata carashpa charisha— nijurcami. Chashna cushichishpami, paicunapaj shunguman chayajta rimarca.

²²Joseca, paipaj taitapaj huasi ucu puracunandimi, Egiptopi causajurca. Joseca, patsaj shuj chunga huatatami causajurca.

²³Joseca, Efrainbaj churicunataca, quimsa miraicamanmi ricurca. Manasespaj churi Maquir shuti runapaj huahuacunapash, Josepaj maquipimi viñarca.

²⁴Joseca, paipaj huauquicunatami cashna nirca: “Ñucaca huañugrinimi, ashtahuangarin Taita Diosca cangunata ricuj shamungapachami. Shinallata cai llactamandaca Abrahamman, Isaacman, Jacoboman carashapacha nishpa juramentushca llactamanmi vichai pushanga” nircami.

²⁵Joseca, taita Israelpaj churicunataca, cashna nishpami juramentuchirca: “Taita Diosca, cangunataca ricuj shamungapachami. Pai shamujpica, ñuca tullucunata caimanda apanapachami canguichi” nijurcami.

²⁶Joseca, patsaj shuj chunga huatata charishpami huañurca. Egiptopillata huañujpimi Josetaca, mishquillagu ashnajuj jambita javishpa, cajapi churarca.