Read Imbabura Highland Quichua GÉNESIS 6 Bible Online

GÉNESIS 6 - Imbabura Highland Quichua bible

GÉNESIS 6

¹Runacunaca, tucui cai pachapi ninandapacha mirai callarishpami, ushicunatapash charirca. Chai punllacunapimi, cashna tucurca:

²Chai runacunapaj ushicunataca, juyaillagucuna cajta Taita Diospaj churicuna ricushpami, tucui chai huarmi puramanda agllashpa, paicunapaj huarmi cachun japinajurca.

³Chaimandami Mandaj Diosca, cashna nirca: “Ñuca Espirituca, na causaita causaicaman runacunahuan macanajunshna catingachu. Paicunaca huañuna aichapachamari. Ashtahuangarin paicunaca, patsaj ishcai chunga huatacamanllami causanga” nircami.

⁴Chai punllacunapica, manllanayai jatun runacunami cai pachapica tiarca. Shinallata Taita Diospaj churicuna, runacunapaj ushicunapi chayashca jipapashmi, churicunata charirca. Paicunami, punda huatacunamandapacha tucuicuna rijsishca, ninan shinlli runacuna carca.

⁵Cai pachapi causaj runacunataca, ashtaca jatun nalicunata ruranajujtami, Mandaj Diosca ricurca. Paicuna tucui imatalla rurangapaj paicunapaj shungupi yarinajushpapash, nalitalla ruranatami yarinajurca.

⁶Mandaj Diosca, cai pachapi runata rurashcamandaca, ninandapacha llaquirishpami, paipaj shungupipash nanachinshna llaquirirca.

⁷Shinamandami Mandaj Diosca, cashna nirca: “Cai pachapi ñuca rurashca runacunataca, runamanda callarishpa animalcunacaman, llucashpa purij animalcunacaman, jahuata rij alasyu animalcunacamanmi tucuchisha. Caicunata rurashcamandaca, ninandapachami llaquirini” nircami.

⁸Ashtahuangarin Noé runaca, Mandaj Diospaj ñaupajpica, alimi ricurirca.

⁹Noé shuti runapaj miraicunaca, caicunami: Noé runaca, paihuan mirai purapica, imatapash cashcatapacha ruraj, ima pandatapash na ruraj runami carca. Noé runaca, Taita Dioshuanga aligutami purijurca.

¹⁰Noé runaca, quimsa churicunatami charirca: Paicunaca Sem, Cam, Jafet shuticunami carca.

¹¹Cai pachapi causajcunaca, Taita Diospaj ñaupajpica ninandapachami huaglinajurca. Shinamandami cai pachapica, ninandapacha llaquichinahuanlla junda causanajurca.

¹²Taita Diosca, cai pachapica huaglicunapacha cajtami ricurca. Causaita tucui charijcunami, cai pachapica huaglicuna causanajurca.

¹³Chaimandami Taita Diosca, Noetaca cashna nirca: “Cai pachapica, paicunamandami ninan llaquichinahuanlla junda. Chaimandami, causaita tucui charijcunata tucuchingapaj yarishcani. Ricui, paicunataca cai alpandimi tucuchisha.

¹⁴Canga, gofer nishca caspicunahuan, huambuna jatun huasita rurai. Chaitaca, shican shican ucucunahuan rurashpa ucumambash, canllamanbash brea nishcahuan quilpangui.

¹⁵Chaitaca cashna rurangui: Patsaj quimsa chunga picha metro largota, ishcai chunga ishcai metro chaupi anchota rurangui. Shinallata chunga quimsa metro chaupi jatunda rurangui.

¹⁶Huambuna chai huasipica, jahua manñamanda chaupi metrota medishpa, shuj ventanata rurangui. Chai ladopillata, pungutapash rurangui. Chai huasitaca, quimsa altibajohuan rurangui.

¹⁷Ricui, ñucami ninambacha tamiata, cai pachaman cachamugrini. Causaita cuj espirituta charij, cai pachapi tucui causajcunata tucuchingapajmi, chashna cachamugrini. Cai pachapi ima tiashcapash, tucuillami huañunga.

¹⁸Ashtahuangarin ñuca ari nishpa canhuan pactachingapajmi callarichigrini. Chaimandami cambash, cambaj churicunapash, cambaj huarmipash, cambaj churicunapaj huarmicunapash, huambuna jatun huasiman canhuan yaicunga.

¹⁹Cai pachapi causaita tucui charijcunataca, tucui causajcunata, ima animalcuna cajpipash, pai puralla shuj jari, shuj huarmi huambuna jatun huasi ucuman churangui. Paicunapash canshnallata causachun, chashna churangui.

²⁰Alasyu animalcunamandaca, ima animalcuna cashpapash pai puralla, shuj animalcunamandaca, ima animalcuna cashpapash pai puralla, alpata llucashpa purij animalcunamandaca, ima animalcuna cashpapash, pai purallami yaicunajunga. Ima animalcuna cashpapash pai purallami, ishcai ishcai canhuan yaicunajunga. Paicunapash causangapajmi, chashna yaicunajunga.

²¹Shinallata tucui ima micunacunatapash tandachishpa alichingui. Chai micunami cambash, animalcunapash micushpa shinlli tucungapaj canga” nijurcami.

²²Shina nijpimi Noé runaca, Taita Dios imashna mandashcashnallata tucuita rurarca.