Read Imbabura Highland Quichua GÉNESIS 8 Bible Online

GÉNESIS 8 - Imbabura Highland Quichua bible

GÉNESIS 8

¹Taita Diosca, Noé shuti runatapash, huambuna jatun huasipi paihuan tiaj tucui animalcunatapash, charina tucui animalcunatapashmi yarirca. Shina yarishpami Taita Diosca, cai pachaman huairata cachamurca. Chai huairahuanmi, yacucunaca asha asha chaquishpa catirca.

²Shinallata manllanayai ucu ucu yacu pugyucunapash, jahua pacha fajchacunapashmi vicharirca. Jahua pachamanda tamiamujujpashmi jarcarirca.

³Shinami yacucunaca, asha asha cai pachamandaca chaquirijurca. Patsaj picha chunga punlla tucujpica, yacucunaca ñami tucurijurca.

⁴Shinallata huambuna jatun huasica, canchis quilla chunga canchis punllapimi, Ararat shuti urcu jahuacunapi quedarca.

⁵Yacucunaca, chunga quillacamanmi chaquishpa catijurca. Chunga quillapaj callari punllapimi, urcu pundacunaca ricurirca.

⁶Chai jipami, cashna tucurca: Noé runaca, ña chuscu chunga punlla tucujpimi, huambuna jatun huasipi pai rurashca ventanata pascarca.

⁷Shina pascashpami, cuervo nishca alasyu shuj animalta cacharirca. Chai animalca, alpa jahuapi yacucuna chaquingacamanmi shamushpa, cutin tigrashpa purijurca.

⁸Cai pachapi yacucunaca, tucuilla chaquishcata ali yachangapajmi, shuj palomatapash cacharirca.

⁹Chai palomaca, tucui cai pachapi yacucuna nara chaquishca cajpimi, maipi shayaritapash na ushashpa, huambuna chai jatun huasimanllata Noé runapajman tigramurca. Shina tigramujpimi Noé runaca, paipaj maquita chutashpa japishpaca, huambuna jatun huasi ucuman churarca.

¹⁰Cutin shuj canchis punllatapash shuyashpami, palomataca huambuna jatun huasimanda cutin cacharirca.

¹¹Chai palomaca ña chishi horaspimi, shuj olivos fangaguta shimipi apashpa, Noé runapajman tigramurca. Shina tigramujpimi Noé runaca, cai pachamanda yacucunaca ña chaquishca cajta ali yacharca.

¹²Cutin shuj canchis punllatapash shuyashpami, palomataca cutin cacharirca. Chai palomaca, cutinga na paipajman tigramurcachu.

¹³Noé runaca, sucta patsaj shuj huatata charijpimi, cashna tucurca: Chai huatapaj callari quillapaj punda punllapimi, cai pachapi yacucunaca chaquirca. Noé runaca, huambuna jatun huasi jahua quilpashcata pascashpami, cai pacha alpaca ña chaquishcata ricurca.

¹⁴Ishcai quillapaj ishcai chunga canchis punllapimi, alpaca chaquirca.

¹⁵Shina cajpimi Taita Diosca, Noé runataca cashna nirca:

¹⁶“Huambuna jatun huasimandaca cambash, cambaj huarmipash, cambaj churicunapash, cambaj churicunapaj huarmicunapash, llujshichi.

¹⁷Shinallata canhuan tiaj causaita charij tucui animalcunata, alasyu animalcunata, sacha animalcunata, alpata llucashpa purij tucui animalcunatapash canhuan llujchingui. Shina llujshijpi tucui cai pachata rishpami, cai pachapica ninanda mirashpa jundanajunga” nircami.

¹⁸Shina nijpimi taita Noepash, paipaj churicunapash, paipaj huarmipash, paipaj churicunapaj huarmicunapash paihuan llujshirca.

¹⁹Shinallata tucui animalcunapash, llucashpa purij tucui animalcunapash, chuscu chaquiyu animalcunapash, alasyu tucui animalcunapash, cai pachapi causaita charishpa cuyurij tucui animalcunapash, ima animal cashpapash, chai animal purallami, huambuna jatun huasimanda llujshinajurca.

²⁰Chai jipami Noé runaca, Mandaj Diosman shuj altarta rurarca. Chai altarpimi, micuna tucui animalcunamanda alasyu tucui animalcunamanda japishpa, Diosman cushpa tucuillata rupachijurca.

²¹Chaitami Mandaj Diosca, ali mishquillaguta ashnachijurca. Chaimandami Mandaj Diosca, paipaj shungupi cashna yajurca: “Alpataca, runapaj jahuaca na cutinga nalicachishachu. Runaca, chairalla viñaimandapachami nalitalla ruranata, shungupi yarishpa causan. Causaita tucui charijcunataca, cunan tucuchishcashnaca na ashtahuan tucuchishachu.

²²Cai pacha tiashcacamanga tarpuipash, cozechaipash, chiripash, rupaipash, rupai quillacunapash, tamia quillacunapash, punllapash, tutapash na tucuringachu” yajurcami.