Read Imbabura Highland Quichua GÉNESIS 9 Bible Online

GÉNESIS 9 - Imbabura Highland Quichua bible

GÉNESIS 9

¹Taita Diosca, Noé shuti runatapash, paipaj churicunatapash, cashna nishpami bendiciarca: “Ninanda mirashpa, ashtacacuna tucushpa, cai pachapi jundaichi.

²Cai pachapi tiaj tucui animalcunaca, ninandami cangunataca chujchushpa manllanajunga. Jahuata rij alasyu tucui animalcunapash, cai pachapi causaita charishpa cuyurinajuj tucui animalcunapash, mama cuchapi tiaj tucui pijicunapashmi manllanajunga. Chaicunataca, cangunapaj maquipimi curcani.

³Causaita charishpa tucui cuyurijcunaca, canguna micungapajmi canga. Micuna verde jihuacunata, imalla verdella viñashcacunatapashmi, canguna micuchun tucuillata curcani.

⁴Ashtahuangarin yahuarndi aichataca, napacha micunachu canguichi, causaica yahuarpimi tian.

⁵Shina cajpimi, cangunaman causaita cuj yahuarmandaca, randi huañuchijuchun mandasha. Ima animal cashpapash, maijan runata huañuchijpica, chai animaltapashmi huañuchijuchun mandasha. Maijan runa cashpapash, shuj runaguta huañuchijpica, paitapashmi huañuchijuchun mandasha.

⁶Yahuarta jichashpa runata maijambash huañuchishpaca, paipash runapaj maquipillatami yahuarta jichai tucushpa huañunga. Runataca, Taita Diosman rijchajta rurashcamandami, chashna canga.

⁷Ashtahuangarin cangunaca, ninanda mirashpa ashtacacuna tucuichilla. Cai pachapica, ashtaca ashtaca huahuacunata charishpa, ninanda miraichilla” nijurcami.

⁸Taita Diosca Noetapash, paipaj churicunatapash cashnami nirca:

⁹“Ricuichi, ñuca ari nijushcata cangunahuambash, cangunapaj jipa miraicunahuambash pactachingapajmi callarichini.

¹⁰Cangunahuan causanajuj, causaita tucui charijcunahuambashmi ari nigrini. Alasyu animalcunahuambash, shuj animalcunahuambash, cangunahuan tiaj tucui animalcunahuambash, huambuna jatun huasimanda tucui llujshijcunamanda callarishpaca, cai pachapi causaj tucui animalcunahuanmi ari nigrini.

¹¹Ñuca ari nijushcata cangunahuan pactachishpa callarichingapajmi, causaita tucui charijcunataca, ninan tamia yacucunahuanga na ashtahuan tucuchisha. Cai pachata tucuchingapaca, na cutinga ninanda tamiachishachu” nircami.

¹²Taita Diosca, cashnatapashmi nijurca: “Ñuca ari nijushcataca cangunahuan, shinallata cangunahuan tiaj causaita charij tucui animalcunahuan, causaita causaicaman pactachishpa callarichinatami, caica ricuchijun:

¹³Ñuca cuichitaca, fuyupimi churarcani. Cai cuichimi ñucahuan, cai pachahuan ari nishcata ricuchijunga.

¹⁴Chaipimi cashna tucunga: Alpaman fuyuta cachamujpimi, ñuca cuichica fuyupi ricurijunga.

¹⁵Chaita ricushpami ñucahuan, cangunahuan samaita tucui charijcunahuan, causaita tucui charijcunahuan, ari nijushcataca yarisha. Shina yarishpami, causaita tucui charijcunataca ninan tamia yacucunahuanga na ashtahuan tucuchisha.

¹⁶Fuyupi cuichita ricushpami, Taita Dios ñucahuan, causaita tucui charijcunahuan, cai pachapi tucui causajcunahuan, causaita causaicaman ari nijushcataca yarisha” nijurcami.

¹⁷Taita Diosca, Noetaca cashnami nirca: “Ñuca ari nishcata, cai pachapi tucui causajcunahuan pactachishpa callarichinataca, cai cuichimi ricuchijun” nircami.

¹⁸Huambuna jatun huasimanda llujshij Noé shuti runapaj churicunaca: Sem, Cam, Jafet shuticunami. Cam shuti churica, Canaán taitami.

¹⁹Cai quimsacunaca, Noepaj churicunami. Paicunamandami tucui cai pachapica, mirashpa jundanajurca.

²⁰Chai jipami Noé runaca, alpapi tarpui callarishpa, uvas yuracunata tarpurca.

²¹Uvas vinota ufiashpa machashpami, paipaj carpa chaupi ucupi lluchulla sirijurca.

²²Canaán runapaj taita Cam shuti runaca, paipaj taita lluchulla sirijujta ricushpami, canllapi paipaj ishcai huauquicunaman villagrirca.

²³Shina villajpimi Sem shuti runapash, Jafet shuti runapash churajunata japishpa, paicunapaj rigra jahuapi churashpaca, huashallahuan rishpa, paicunapaj taita lluchulla sirijujta quilpachinajurca. Paicunaca, shuj ladoman tigrarishca cashpami, paicunapaj taita lluchulla sirijujtaca, na ricunajurca.

²⁴Noé runa machashca puñujushpa rijcharishpaca, chairalla viñai paipaj churi imata rurashcata yachashpami,

²⁵cashna nirca: “Canaán runaca, ninanda nalicachi tucushca cachun. Paica, paipaj huauquicunata servijcunamandaca, ashtahuan cati servij cachun” nircami.

²⁶Ashtahuan cashnatapashmi nijurca: “Sem shuti runataca, ñucata Mandaj Taita Dios bendiciapachun, Canaán runaca paita servij cachun.

²⁷Jafet shuti runataca, Taita Diosllata jatun llactata rurapachun. Paica, Sem shuti runapaj carpacunapi causapachun, ashtahuangarin Canaán runaca, paita servij cachun” nijurcami.

²⁸Ninanda tamiashca jipamandapash Noé runaca, quimsa patsaj picha chunga huatatami causarca.

²⁹Noé runaca, tucuimandaca iscun patsaj picha chunga huatata causashpami huañurca.