Read Imbabura Highland Quichua 2 SAMUEL 1 Bible Online

2 SAMUEL 1 - Imbabura Highland Quichua bible

2 SAMUEL 1

¹Saúl huañushca jipami, cashna tucurca: Davidca, amalecitacunata mishashpa tigramushca jipami, Siclag shuti pueblopi ña ishcai punllata carca.

²Ña quimsa punlla tucujpimi, cashna tucurca: Carpacunata shayachishpa Saúl tiajuj pambamandami, shuj runaca Davidpajman chayamurca. Paica churajunapash liquirishca, paipaj umapash alpayashcami carca. Pai chayamushpaca, Davidta manllan cashcata ricuchishpami, alpaman chayajta urai cumurirca.

³Chaipimi Davidca: —¿Maimandata shamungui?— nishpa tapurca. Shina tapujpimi chai runaca, cashna nirca: —Carpacunata shayachishpa, israelcuna tianajuj pambamandami, pacajushpa shamupani— nircami.

⁴Shina nijpimi, Davidca: —¿Imata tucurcayari? Villahuai nipanimi— nirca. Shina nijpi chai runaca, cashna nirca: —Israelcunaca, chai macanajuimandami pacajushpa calparca. Shinallata ashtaca soldadocunami, huañuchi tucurca. Saulpash, paipaj churi Jonatanbashmi huañurca— nircami.

⁵Shina nijpimi Davidca, villangapaj shamuj chairalla viñai runataca: —Saulpash, paipaj churi Jonatanbash huañushcataca, ¿imashnata yachangui?— nishpa tapurca.

⁶Shina tapujpimi, villangapaj shamuj chairalla viñai runaca, cashna nijurca: —Napash yashcapimari, Gilboa shuti urcuman shamurcani. Chaipimi Saultaca, paipaj lanzapi taunarishpalla rijujta ricurcani. Shinallata paipaj huashataca, macanajuna carretacunapi, caballopi tiarishca gentecunapash catinajujtami ricurcani.

⁷Pai huashaman tigrarishpa ricushpami, ñucata ricushpa cayahuarca. Shina cayajpimi, ñucaca: ‘Caipimi capani’ nircani.

⁸Shina nijpimi paica: ‘¿Canga, pita cangui?’ nishpa tapuhuarca. Shina tapujpimi, ñucaca: ‘Amalecita purami cani’ nircani.

⁹Shina nijpimi paica, cutinllata cashna nihuarca: ‘Ñucapajman quimirishpa huañuchihuai nipanimi. Ñucataca, ninan llaquimari ña japihuashca. Shina cashpapash causajunirami’ nihuarca.

¹⁰Shina nijpimi, paipajman quimirishpa huañuchircani. Chashna mishai tucushca jipacarin, na ashtahuan causai ushangachu yashpami, chashna huañuchircani. Chai jipami, paipaj umapi churajushca coronatapash, paipaj maqui rigrapi churajushca argollatapash surcuchishpa, can ñuca mandajpajman apamupani— nijurcami.

¹¹Shina nijpimi Davidca, pai churajushcata japishpa liquirca. Paihuan chaipi tianajuj runacunapash, chashnallatami ruranajurca.

¹²Saulpash, paipaj churi Jonatanbash, Mandaj Dios agllashca gentecunapash, Israel aillucunapash, espadahuan huañuchi tucushcamandami, tutayangacaman na micushpa, ninanda llaquirishpa huacanajurca.

¹³Chai jipami Davidca, villangapaj shamuj chairalla viñai runataca: —¿Canga, maimandata cangui?— nishpa tapujpi, paica: —Ñucaca, caru llactamanda amalecita runapaj churimi cani— nirca.

¹⁴Shina nijpimi Davidca, cashna nirca: —Mandaj Dios agllashpa churashca jatun mandajta, cambaj maquita chutashpa huañuchinataca, ¿imashpata na manllarcangui?— nircami.

¹⁵Shina nishca jipami Davidca, paita servij shuj runata cayashpa: —Cai runata huañuchigri— nirca. Shina nijpimi chai servij runaca, chugrichishpa huañuchirca.

¹⁶Davidca, paitaca cashnami nirca: —Cambaj yahuarca, cambaj jahuallata cachun. Cambaj shimihuanllatami, can llaquichi tucungapaca: ‘Mandaj Dios agllashpa churashca jatun mandajtaca, ñucami huañuchircani’ nishpa villahuarcangui— nircami.

¹⁷Saulpash, Saulpaj churi Jonatanbash huañushcamandami, Davidca yarishpa yarishpa huacashpandi, cashna candajurca.

¹⁸Chaitaca: “Judá aillu puracunamambash yachachinami” nircami. Ricuichi, cai candanaca, Jaser nishca libropimi, escribishca tiajun:

¹⁹“¡Israel llactapaj juyailla runacunaca, cambaj urcucunapaj jahuapillatamari huañushca! ¡Shinlli runacunaca, llaquinayaitamari huañushpa urmashca!

²⁰Filisteocunapaj ushicuna ama cushijuchun, circuncisión nishcata na rurashcacunapaj ushicuna ama cushijushpa fahuanajuchunga, Gat pueblopica na villanachu canguichi. Asacalón pueblopaj plazacunapipash, na villanachu canguichi.

²¹Gilboa shuti urcucunalla, cangunapica asha paramullapash, ima tamiallapash ama urmachun. Diosman imata carangapajpash, chai alpacunapica ama fucuchun. Chaipimi, shinlli runacunapaj jarcarina escudocunapash shitai tucurca. Saulpaj escudopash, aceitehuan na javishcashnami tucurca.

²²Jonatanbaj arcoca, huañushcacunapaj yahuar illaj, shinlli runacunapaj vira illajca, na tigramunllu carca. Saulpaj espadapash, yangapachaca na tigramunllu carca.

²³Saulpash, Jonatanbash, ninandami juyarin carca. Paicunapaj causaipica, na shicanyarircachu. Paicunaca, huañushpapash na shicanyashcachu. Jatun angatapash yali, ñapash calpajcunami carca. Leongunatapash yali shinllicunami carca.

²⁴Israel huarmicunalla, Saulmandaca huacaichiyari. Paimi, juyailla morado churajunacunata cushijuihuan cangunaman churachin carca. Cangunapaj churajunatapash, orota churashpami, juyaillaguta rurachin carca.

²⁵¡Shinlli runacunaca, llaquinayaitamari macanajunajuj chaupipica, huañushpa urmashca! ¡Jonatanbash, cambaj urcucunapimari huañushca!

²⁶Ñuca huauqui Jonatanlla, canmandaca ninan llaquimi cani. Ima mishquillagutapash yali mishquigumi carcangui. Cambaj juyaica, huarmicunapaj juyaitapash yali juyaillagumi carca.

²⁷¡Shinlli runacunaca, llaquinayaitamari huañushpa urmashca! ¡Jatun macanajuipi macanajunacunapash tucurishcamari!” nijurcami.