Read Imbabura Highland Quichua 2 SAMUEL 14 Bible Online

2 SAMUEL 14 - Imbabura Highland Quichua bible

2 SAMUEL 14

¹Jatun mandaj Davidca, Absalón runata tucui shungu llaquinayachijujtami, Sarvia shuti huarmipaj churi Joab runaca yacharca.

²Chaimandami Joab shuti runaca, Tecoa shuti pueblopi causaj ali yachashca huarmita cayachun cachashpa, cashna nirca: “Ñucami candaca, pipash huañushca cajpi yana churajunata churajushpa, llaquillashnalla tucupai nipani. Shinallata ima mishquillagu ashnajujtapash, ama churaringuichu. Ashtahuangarin pipash huañushca cajpi, ña unaita llaquilla causajuj huarmishna tucupangui.

³Chai jipaca, jatun mandajpajman yaicushpa, cashna ningui” nircami. Joab runaca, imatalla nichumbash yachachishpami cacharca.

⁴Tecoa pueblomanda huarmica, jatun mandajpajman yaicushpami, paita cazushcata ricuchingapaca, ñaupajpi cungurishpa alpaman chayajta cumurirca. Chaipimi: —¡Jatun mandajlla, ñucata ayudahuayari!— nirca.

⁵Shina nijpimi, jatun mandajca: —¿Imatata ningui?— nishpa tapujpi, chai huarmica cashna nirca: —Na llullashpami nipani. Ñuca cusa huañujpimi ñucaca, cusa illaj caparcani.

⁶Canda servij ñucaca, ishcai churicunatami charircani. Paicunaca, pambapi fiñanajushpami, pipash na mitsaj tiajpi shujca, caishujta chugrichishpa huañuchirca.

⁷Ricui cunanga, tucuilla ñuca familiacunami, canda servij ñucata fiñashpa jatarishca. Paicunaca cashnami ninajun: ‘Paipaj huauquita huañuchishcamandaca paitapash, paipaj huauquita huañuchishcashnallata huañuchingapaj, ñucanchiman cuyari. Ima tiashcata pailla japina cajpipash, huañuchishunllami’ ninajunmi. Chashna rurashpaca, ñucapaj asha ninagushna quedashcatapash huañuchishpami, ñuca cusapaj shutitapash, paipaj miraitapash na saquishpa, cai pachamandaca chingachinga— nircami.

⁸Shina nijpimi jatun mandajca, chai huarmitaca cashna nirca: —Cambaj huasiman rilla, canda ama llaquichinajuchunga, ñucallata ña mandagrinimi— nircami.

⁹Shina nijpimi Tecoa shuti pueblomanda huarmica, jatun mandajtaca cashna nirca: —Jatun mandaj ñuca amolla. Ima llaqui japina cashpapash ñucata, ñuca taitapaj huasi ucu purata japichun. Ashtahuangarin jatun mandajpash, mandangapaj can tiarinapash, jucha illaj capachun— nircami.

¹⁰Shina nijpimi jatun mandajca, cashna nirca: —Maijambash fiñashpa canda rimajpica, ñucapajman pushamunguilla. Chashna pushamujpica, cutinga na rimangachu— nircami.

¹¹Shina nijpimi chai huarmica, cashna nirca: —Jatun mandajlla, ñucapaj caishuj churita huañuchishcamanda, randi huañuchishami nishpa purijuj runa caishuj churita huañuchishpa ama ashtahuan llaquichihuachunga, canda Mandaj Taita Diosta yaripangui— nircami. Shina nijpimi jatun mandajca, cashna nirca: —Mandaj Diosca causajumbachami. Cambaj churipaj umamandaca, shuj ajchallapash na alpaman urmangachu— nircami.

¹²Shina nijpimi chai huarmica, cashna nirca: —Canda servij ñucataca, ñuca amo can jatun mandajhuan, shuj shimigutalla rimachun saquihuai— nijpimi, jatun mandajca: —Rimailla— nirca.

¹³Shina nijpimi chai huarmica, cashna nijurca: —¿Imashpata Taita Dios agllashcacunataca, chashnallata llaquichingapaj yarijungui? Can jatun mandaj nishcashnaca, cambaj churita shuj llactamanda shamuchun na saquishpaca, canllatami nalita rurajungui.

¹⁴Ñucanchica huañunapachami canchi. Alpapi yacu jicharijpi, na cutin tandachi ushanashnami canchi. Shina cajpipash Taita Diosca, na pitapash causaita quichunllu. Ashtahuangarin llactamanda llujchishpa cachai tucushcatapash, paipaj ñaupajmanda ama ashtahuan caruyachunga, imashnallapash tigrachimunmi.

¹⁵Cunanga, gentecuna ñucata llaquichinajujpimi, can jatun mandaj ñuca amoman caicunata ningapaj shamuparcani. Canda servij ñucaca: ‘Can jatun mandahuan parlarijpica, canda servij ñuca mañashcata rurangapashchari’ yashpami shamuparcani.

¹⁶Jatun mandajlla, ñuca mañashcata uyashpaca, canda servij ñucatapash, ñuca churitapash, Taita Dios cushca llactamanda ishcandita chingachisha nijuj runapaj maquimandaca cacharichihuanguimi.

¹⁷Canda servij ñucaca, can jatun mandaj ñuca amo imaguta cashpapash aliguta nishpa cushichijuchunmi shuyajupani. Can jatun mandaj ñuca amoca, Taita Diospaj angelgushna alitapash, nalitapash ricunguillami. Shina cashcamanda, canda Mandaj Taita Diosca canhuan cachun— nijurcami.

¹⁸Shina nijpimi Davidca, chai huarmitaca cashna nirca: —Ñuca imata tapujpipash, ama pacashpa tucuilla villahuangui nipanimi— nircami. Shina nijpimi, chai huarmica: —Jatun mandaj ñuca amolla, imata tapuna cashpapash tapuhuailla— nirca.

¹⁹Shina nijpimi jatun mandajca, cashna nirca: —Caicunata nichunga, ¿nachu Joab runa yachachishpa cachamurca?— nircami. Shina nijpimi chai huarmica, cashna nishpa tigrachirca: —Jatun mandaj ñuca amolla, canllata tucuita yachapanguimi. Can tapushcashnallata shinapachami capan. Canda servij Joab runami ñucataca cachamuhuarca. Paillatami, canda servij ñucataca, tucui cai shimicunata yachachishpa cachamuhuarca.

²⁰Cai llaquicuna ricurishcata aliman tigrachingapajmi, canda servij Joab runaca cachamuhuarca. Ashtahuangarin can ñuca amoca, Taita Diospaj angelgushna alipacha yachajushca cashpami, cai pachapi ima tucujujtapash yachangui— nircami.

²¹Shinamandami jatun mandajca, Joab runataca cashna nirca: —Ricui, caitaca ñucami ruragrini. Canga, chairalla viñai Absalón huambraguta tigrachimugri— nircami.

²²Shina nijpimi Joab runaca, paita cazushcata ricuchingapaj alpaman chayajta cumurishpa, jatun mandajta bendiciashca jipaca, cashna nirca: —Jatun mandaj, ñuca amolla. Cambaj ñaupajpi canda servij ñuca ali ricurishcataca, cunanmi yachapani. Shina cajpimi can jatun mandajca, canda servij ñuca mañashcata rurapashcangui— nircami.

²³Chai jipami, Joab runa jatarishpaca, Gesur shuti puebloman rishpa Absalón runataca, Jerusalenman pushamurca.

²⁴Ashtahuangarin jatun mandajca, Absalón runataca cashnami nirca: —Ñuca ñavita na ricushpallata, paipaj huasiman richunlla— nircami. Shina nijpimi Absalón runaca, jatun mandajpaj ñavitaca na ricushpallata paipaj huasiman rirca.

²⁵Tucui Israel puramanadaca, Absalón runashna juyaillagu cashcamanda, ninandapacha alicachi tucuj runaca, shujllapash na tiarcachu. Chaquimanda callarishpa, uma pundacaman ima nalipash na tiarcachu.

²⁶(Absalón runaca, paipaj ajcha yapa jundashpa fiñachijpimi, huata tucuripi, huata tucuripi rutuchin carca). Chai ajchata jatun mandajpaj pezanapi pezajpica, ishcai kilo chaupitashnami pezarca.

²⁷Absalón runaca, quimsa churi shuj ushitami charirca. Chai ushica Tamar shuti, juyailla cuitsagumi carca.

²⁸Absalón runaca, ishcai huatatami Jerusalenbi causajurca. Shina cashpapash, jatun mandajpaj ñavitaca na ricurcachu.

²⁹Chaimandami Absalón runaca, jatun mandajpajman cachangapaj, Joab runata cayachun cacharca. Ashtahuangarin Joab runaca, na shamungapaj munarcachu. Cutin cayachun cachajpipash, na shamungapaj munarcachu.

³⁰Chaimandami Absalón runaca, paita servijcunataca cashna nirca: —Ricuichi, Joab runapaj pambaca ñuca pamba ladollapimi. Chaipimi, cebadata tarpushca charin. Chaiman rishpa nimata japichigrichi— nircami. Chashna nijpimi Absalón runata servijcunaca, Joab runapaj pambapi ninata japichigrirca.

³¹Chaita ricushpami Joab runa jatarishpa, Absalón runapaj huasiman shamushpaca: —¿Imashpata canda servijcunaca, ñuca pambapi ninata japichishcayari?— nirca.

³²Shina nijpimi Absalón runaca, Joab runataca cashna nirca: —Ricui, ñucami candaca caiman shamui nishpa cayachun cacharcani. Candaca, jatun mandajpajman cashna nichun cachangapajmi, cayachun cacharcani: ‘¿Imapajta ñucataca, Gesur shuti pueblomanda cayachun cachamurcangui? Chaipi cashparapash, alichari caiman carcani. Cunanga, can jatun mandajpaj ñavita ricungapajmi munani. Ima juchata ñuca rurashca cajpipash, huañuchihuailla’ nichunmi, candaca cachangapaj munarcani— nircami.

³³Shina nijpimi Joab runaca, jatun mandaj yachachun villaj shamurca. Shinamandami, Absalón runata cayachun cachajpi paica, jatun mandajpajman shamurca. Paica, jatun mandajpaj ñaupajpi alpaman chayajta cumurijpimi, jatun mandajpash Absalón runata mucharca.