Read Imbabura Highland Quichua 2 SAMUEL 15 Bible Online

2 SAMUEL 15 - Imbabura Highland Quichua bible

2 SAMUEL 15

¹Chai jipami, cashna tucurca: Absalón runaca, carretacunata rurachishpami, caballocunatapash tandachirca. Paita ñaupashpa calpachunga, picha chunga runacunatami churarca.

²Absalón runaca, tutamandata jatarishpami, ñanmanda ladoman rishpa, puebloman yaicuna pungu ladopi shayarin carca. Maijan cashpapash, fiñanajushca cashpa, jatun mandaj alichijuchun villangapaj shamunajujpimi, Absalón runa cayashpaca: “¿Maijan pueblomandata cangui?” nishpa tapujurca. Shina tapujpimi, chai runaca: “Canda servijca, Israel llacta aillu purallatami capani” nishpa villan carca.

³Chashna villajpimi Absalón runaca, cashna nijun carca: “Ricui, can villashca shimicunaca, alipacha na llullaj shimicunami. Shina cajpipash jatun mandajta ayudaj puramandaca, maijambash candaca na uyangachu” nijunmi carca.

⁴Absalón runaca, cashnatapashmi nijurca: “Maijan cashpapash, cai llactapi juez cachun ñucata churashpaca, alimi canman. Fiñanajushca cashpa, na cashpaca ima llaquihuan cashpa ñucapajman tucui shamujcunataca, ñucami alichiman” nijurcami.

⁵Maijan cashpapash, paipaj ñaupajpi urai cumuringapaj quimirijpica, cashnami ruran carca: Paipaj maquihuan ugllashpami muchan carca.

⁶Ima llaquihuan cashpapash, jatun mandaj alichijuchun shamuj tucui israelcunahuanga, chashnami ruran carca. Chashna rurashpami Absalón runaca, israelcuna paitalla juyanajuchun tandachijurca.

⁷Ña chuscu huata yalishca jipami, cashna tucurca: Absalón runaca, jatun mandajtami cashna nirca: —Mandaj Diosman rurashami nishcata pactachingapaj, Hebrón puebloman richun saquihuai nipanimi.

⁸Canda servij ñucaca, Siria llactapi tiajuj Gesur shuti pueblopi causajushpami, paiman rurashapachami nishpa cashna nircani: ‘Ñucata cutin Jerusalenman Mandaj Dios tigrachijpica, Mandaj Diostami servisha’ nircanimi— nirca.

⁹Shina nijpimi, jatun mandajca: —Imatapash na manllashpa rilla— nijpi Absalón runaca jatarishpa, Hebrón shuti puebloman rirca.

¹⁰Chaipimi Absalón runaca, tucuilla Israel aillucunaman cashna nishpa villachun villaj runacunata cacharca: “Trompetata huacachijujta uyashpaca, Absalón runami Hebrón pueblopica, jatun mandaj tucushca ninguichi” nichunmi cacharca.

¹¹Jerusalenmandaca, ishcai patsaj runacunami Absalón runa pushajpi paihuan rinajurca. Paicunaca nalita ruragrinajushcataca, imatallapash na yachashpami rinajurca.

¹²Shinallata Absalón runaca, Taita Diosman carashpa animalcunata huañuchijushpami, Gilo shuti pueblopi causaj Ahitofel shuti runata cayarca. Paica, Davidman yuyaita cushpa ayudaj runami carca. Paihuangarin ashtahuanmi Davidta llaquichingapaj, pacalla alichirinajurca. Absalón runata catijcunapash, ashtahuanmi miranajurca.

¹³Shuj villaj runami, Davidman cashna nishpa villagrirca: “Tucuilla israelcunami, Absalón runata alicachishpa catinajun” nigrircami.

¹⁴Shina nigrijpimi Davidca, Jerusalenbi causanajuj tucuilla paita servijcunataca, cashna nirca: —Jatarishpa pacajungapaj jacuchi. Absalón runapaj ñaupajmandaca, na pacajushpa ri usharingachu. Ucha ringapaj alichirichi. Na ucha rijpica, ñapash caipi japij shamushpara, ñucanchita llaquichinman. Cai pueblopi causajcunataca, espadahuan chugrichishpara huañuchinman— nircami.

¹⁵Shina nijpimi jatun mandajta servijcunaca, cashna ninajurca: —Ricui, canda servij ñucanchica, can jatun mandaj imata yarishcata rurangapajpash, ñami shuyanajunchi— ninajurcami.

¹⁶Chai jipami, jatun mandajca, tucuilla paipaj familiacunata catichishpa, llujshishpa rirca. Jatun mandajca, chungapura caishuj huarmicunatami, pai mandana huasita ricuchun saquirca.

¹⁷Jatun mandajca, tucuilla paita catij gentecunandi ña llujshishpa rishpami, chai pueblomandaca carupi shayarigrirca.

¹⁸Chaipimi, tucuilla paita servijcunaca, tucuilla cereteo nishca, peleteo nishca runacunandi, paipaj ladopi shayarinajurca. Shinallata Gat pueblomanda chaquilla shamushca sucta patsaj geteo nishca runacunaca, jatun mandajpaj ñaupajpimi rinajurca.

¹⁹Chaipimi jatun mandajca, geteo nishcapura Itai shuti runataca, cashna nijurca: —¿Imapajta cambash ñucanchihuan shamujungui? Canga caimanda tigrashpa, jatun mandajhuan quedailla. Canga, shuj llactamandami cangui. Cambaj llactamandapash llujchishpa cachamujpi, shamushcami cangui.

²⁰Canga, cainami chayamurcangui. Shina cajpipash cunanga candaca, ¿ñucanchihuan ringapaj alichiri nishallachu? Ñucaca, maiman ri usharingacaman rishallami. Canga, cambaj llacta puracunata pushashpa tigrailla. Mandaj Diospash canman juyaita ricuchishpa, cambaj tucui causaipi imatapash pactachijuchunlla— nijurcami.

²¹Shina nijpimi Itai shuti runaca, jatun mandajtaca cashna nirca: —Taita Diosca causajumbachami. Ñuca amo can jatun mandajpash ricujunguimi. Huañungapaj cashpapash, causangapaj cashpapash, ñuca amo can jatun mandaj maipi cajpipash, canda servij ñucapash chaipimi casha— nircami.

²²Shina nijpimi Davidca, Itai shuti runataca: —Shina cashpaca, ñucahuan ringapaj shamuilla— nirca. Shina nijpimi geteo nishcapura Itai shuti runaca, paihuan purij tucuilla runacunandi, paipaj tucuilla familiacunandi rirca.

²³Tucui gentecunami, ninanda caparishpa huacanajurca. Tucuicunami, ninanda jatarijuj Cedrón shuti huaicu yacuta chimbanajurca. Shinallata jatun mandajpash chimbajpimi, tucuilla gentecunapash jichushca pambaman rina ñanman chimbanajurca.

²⁴Chaipica, Sadoc shuti curapash, tucuilla levitacunandimi, Taita Dioshuan ari ninajushpa escribichishcata alichina arcata apashpa rinajurca. Chaipillatami, Taita Dioshuan ari ninajushpa escribichishcata alichina arcataca churanajurca. Shinallata pueblomanda llujshishpa tucuilla rishca jipami, Abiatar shuti curapash vichai rirca.

²⁵Ashtahuangarin jatun mandajca, Sadoc shuti curataca cashnami nijurca: —Taita Diospaj arcata apashpa puebloman tigrailla. Mandaj Diospaj ñaupajpi ñuca ali ricurijpica, paillata ñucata tigrachimushpa, paipaj jatun carpatapash ricuchun saquihuangami.

²⁶Ashtahuangarin: ‘Canhuanga, cushijuita na charinichu’ nijpica, paipaj ima ali canata ñucata rurachunga, caipimi cani— nijurcami.

²⁷Jatun mandajca, Sadoc shuti curataca cashnatapashmi nijurca: —¿Nachu canga, Dios imatalla ricuchishcata villaj cangui? Canga, imatapash na manllashpa puebloman tigrailla. Cangunaca, cangunapaj ishcandi churicunata pushashpa tigraichilla. Canga, cambaj churi Ahimaas shuti runata, Abiatar shuti runapaj churi Jonatán runata pushashpa tigrailla.

²⁸Uyaichi, ñucaca canguna ali chayashcata villachun cachamungacamanmi, jichushca pambamanda chimbai ushanalla ladopi shuyasha— nijurcami.

²⁹Shina nijpimi Sadoc shuti, Abiatar shuti curacunaca, Taita Diospaj arcata Jerusalenman apashpa tigrashpaca, chaipillata quedarca.

³⁰Davidca, umatapash quilparishca, chaquipash lluchullami huacashpandi, Olivos urcutaca vichai rijurca. Shinallata tucuilla paihuan rijcunapashmi, umata quilparishpa, huacashpa vichai rinajurca.

³¹Chaipimi cashna nishpa, Davidman villanajurca: “Absalón runahuan tandanajushpa canda llaquichingapaj pacalla parlarij purapica, Ahitofel shuti runapashmi” nishpami villanajurca. Chaita yachashpami Davidca, cashna nirca: “Mandaj Dioslla, Ahitofel runa ima yuyaita cushcatapash cunanga yanga cachun rurapairi” nircami.

³²Taita Diosta mañangapaj, Olivos urcuman David ña chayajpimi, arquita nishcapura Husai shuti runaca, pai churajushcapash liquirishca, umapipash alpata churarishca, ñapash tuparij shamurca.

³³Paitami, Davidca cashna nijurca: —Can ñucahuan rijpica, ashtahuanmi ñucapaca llaqui canga.

³⁴Ashtahuangarin puebloman tigrashpa, Absalonda cashna nigri: ‘Jatun mandajlla, ñucaca canda servij tucungapajmi munapani. Imashnami cunangaman cambaj taitata servishpa causarcani, chashnallata cunanga cambaj servij tucushallami’ nigri. Chashna rurashpaca, Ahitofel runa imata yarishpa ayudajushcatapash yangapimi churangui.

³⁵Sadoc shuti, Abiatar shuti curacunapash, chaipimi canhuan canga. Shina cashcamanda jatun mandajpaj huasipi imata uyashpapash, Sadoc shuti, Abiatar shuti curacunaman villanguilla.

³⁶Ricui, Sadoc shuti runapaj churi Ahimaas runapash, Abiatar shuti runapaj churi Jonatán runapash, ishcandimi chaipi canga. Tucui imata uyashpapash, paicunata villachun cachamunguilla— nijurcami.

³⁷Chashnami, Davidpaj ali cumba Husai shuti runaca, Jerusalenman shamurca. Shinallata Absalón runapashmi, chai puebloman yaicurca.