Read Imbabura Highland Quichua 2 SAMUEL 16 Bible Online

2 SAMUEL 16 - Imbabura Highland Quichua bible

2 SAMUEL 16

¹Davidca, Olivos urcuta ashata yalishpa rijujpimi, Mefi-boset shuti runata servij Siba shuti runaca, tuparingapaj ñapash llujshimurca. Paica ishcai burropimi, ishcai patsaj tandata, patsaj racimo chaquichishca uvasta, jigosta chaquichishpa rurashca patsaj tandata, shuj cara muchila vinota apachishpa llujshimurca.

²Shina llujshimujpimi Siba shuti runataca, jatun mandajca: —¿Caica imatayari?— nishpa tapujpi, Siba shuti runaca cashna nirca: —Burrocunaca, can jatun mandajpaj familiacuna tiarichunmi. Tandacuna, chaquichishca uvascunaca, canda servijcuna micuchunmi. Vinoca, jichushca pambata rinajushpa shaijujcuna ufiachunmi— nircami.

³Shina nijpimi, jatun mandajca: —¿Canda mandajpaj nietoca, maipitayari?— nirca. Shina nijpimi Siba shuti runaca, jatun mandajman cashna nishpa tigrachirca: —Ricui paica: ‘Israel aillucunata ñuca abuelo Saúl mandajushcataca, cunan punllami ñucaman tigrachinga’ nishpami, Jerusalenbi quedarca— nircami.

⁴Shina nijpimi jatun mandajca, Siba shuti runataca cashna nirca: —Ricui, Mefi-boset shuti runa tucui imatalla charishcapash, cambajmi— nircami. Shina nijpimi, Siba shuti runaca urai cumurishpa, cashna nirca: —Jatun mandaj ñuca amolla, cambaj ñaupajpica ali ricurishpami, ali capaiman— nircami.

⁵Jatun mandaj Davidca, Bahurim shuti llactamanmi chayarca. Chaiman chayajpimi, Saulpaj familia puramanda shuj runaca, tuparingapaj ñapash llujshimurca. Paica, Gera shuti runapaj churi Simei shutimi carca. Paica, candaca ima llaquipash japishpami ali canman nishpa llujshimushpami,

⁶Davidtapash, jatun mandaj Davidpaj tucui servijcunatapash rumicunahuan pegashpa catijurca. Ashtahuangarin tucuilla gentecunapash, tucuilla shinlli runacunapash ali ladoman, lluqui ladomanmi jarcanajurca.

⁷Shina cajpipash Simei shuti runaca, cashnami nalicachishpa rimajurca: —¡Huañuchij, jatun nalita ruraj runa, caimanda llujshi, llujshi!

⁸Saulpaj familiacunata huañuchishpa yahuarta jichashcamandami, Mandaj Diosca candapash llaquichijun. Canga, Saulpaj randimi mandajurcangui. Cunanga, can mandanataca cambaj churi Absalonmanmi, Mandaj Diosca cushca. Ricui, can nalita rurashpa huañuchishpa, yahuarta jichaj cashcashnallatami llaquita apajungui— nijurcami.

⁹Shina rimajujpimi, Sarvia shuti huarmipaj churi Abisai shuti runaca, jatun mandajtaca cashna nirca: —Alcu huañushcashna cai runaca, ñuca amo jatun mandajtaca, ¿imashpata ima llaquipash japishpami ali canman nijunyari? Cungata muchungapaj richun saquihuai nipanimi— nircami.

¹⁰Shina nijpimi jatun mandajca, cashna nirca: —Sarvia shuti huarmipaj churicuna, ¿cangunaca imata ricunatata charinguichi? Pai chashna ninanda nalicachishpa rimajushpaca, Mandaj Diosllata Davidta nalicachishpa rimai nishca cajpimi, chashna rimajun. Shina cashpaca, ¿pita paitaca: ‘¿Imapajta chashna nijungui?’ ningayari?— nircami.

¹¹Chai jipami Davidca, Abisai shuti runatapash, tucui paita servijcunatapash cashna nirca: —Ricuichi, ñucamanda llujshishca ñuca churipashmi, ñucataca huañuchisha nijun. ¿Benjaminbaj miraicarin, maita na chashna rurangayari? Chashna nalicachishpa rimajuchun saquichilla. Mandaj Diosllatami mandashca canga.

¹²Chashna llaquihuan cajta Mandaj Dios ricushpaca, cunan cashna ninanda nalicachi tucushcamandaca, Mandaj Diosllata ima alitapash carahuangapashchari— nircami.

¹³Davidpash, tucuilla paihuan rijcunapash ñanda rinajujpimi, Simei shuti runaca janaj loma ladota ñaupashpa rijurca. Paica, candaca ima llaquipash japishpami ali canman nishpami, rumicunahuan, alpahuan pegashpa, Davidta ñaupashpa rijurca.

¹⁴Jatun mandajpash, paihuan rinajuj tucuilla runacunapash ninanda shaijushcacuna chayagrishpami, chaipi samanajurca.

¹⁵Shinallata Absalonbash, paihuan tandanajushca tucuilla Israel runacunapash, Ahitofel shuti runapashmi Jerusalenman yaicurca.

¹⁶Chai jipami, cashna tucurca: Davidpaj ali cumba, arquita nishcapura Husai shuti runami, Absalonhuan tuparingapaj llujshishpaca: —¡Jatun mandajlla, causajupailla! ¡Jatun mandajlla, causajupailla!— nishpa caparijurca.

¹⁷Chashna nijujpimi Absalón runaca, Husai shuti runataca cashna nirca: —¿Cambaj cumba alita rurashcamandaca, cashnachu rurangui? ¿Imashpata na cambaj cumbahuan rircangui?— nircami.

¹⁸Shina nijpimi Husai shuti runaca, Absalondaca cashna nirca: —Na rishachu. Ashtahuangarin Mandaj Diospash, cai gentecunapash, tucuilla Israel runacunapash, maijandami mandachun agllashpa churarca. Chai runapajmi casha, paihuanmi quedasha.

¹⁹Ñucaca, ¿pitata servina cani? ¿Nachu paipaj churitallata servina cani? Imashnami cambaj taitapaj ñaupajpi servishpa causarcani, shinallatami candapash servishpa causasha— nircami.

²⁰Chai jipami Absalón runaca, Ahitofel shuti runataca: —Cunanga, ñucanchi imata rurangapajpash yuyaita cuhuaichiyari— nirca.

²¹Shina nijpimi Ahitofel shuti runaca, Absalondaca cashna nirca: —Cambaj taitapaj caishuj huarmicunapi chayagri. Chai huarmicunataca, pai mandajushca huasita cuidachunmi saquirca. Chashna rurashcata tucui israelcuna uyashpami, cambaj taitapaca na ricunayachij tucushca cajta candaca yachanga. Shinami canhuan tandanajushca runacunaca, ashtahuan shinlli tucunga— nircami.

²²Chai jipami, huasi jahua patiopi, shuj carpata Absalonman churarca. Chaipimi Absalón runaca, tucui israelcuna ricujta, paipaj taitapaj caishuj huarmicunapi chayarca.

²³Ahitofel shuti runa cushca yuyaica, chai punllacunapica, Taita Dios rimashca shimita uyangapaj tapushcashnami carca. Shinami, Ahitofel runa cushca yuyaicunaca Davidpajpash, Absalonbajpash ali uyarirca.