Read Imbabura Highland Quichua 2 SAMUEL 18 Bible Online

2 SAMUEL 18 - Imbabura Highland Quichua bible

2 SAMUEL 18

¹Davidca, paita catij runacunatami alichirishca cachun ricushpa yalijurca. Paicunata mandachunga huaranga soldadocunata, patsaj soldadocunata mandajcunatami churarca.

²Chai jipami Davidca, soldadocunata quimsapi shicanyachirca. Chai quimsapi shicanyachishca runacunataca, Joab runa mandajpi richunmi, quimsapi shicanyachishca caishuj runacunataca, Sarvia shuti huarmipaj churi Joab runapaj huauqui Abisai shuti runa mandajpi richun, quimsapi shicanyachishca chaishuj runacunataca, geteopura Itai shuti runa mandajpi richunmi cacharca. Shinallata jatun mandajca, tucuicunamanmi: —Ñucapash cangunahuanmi, macanajuiman llujshigrini— nirca.

³Ashtahuangarin gentecunaca, cashnami ninajurca: —Na llujshinachu cangui. Ñucanchi pacajushpa calpajpipash, ñucanchitaca na catingachu. Ñucanchi puramandaca, shuj chaupi huañujpipash, paicunapaca imapash na cangachu. Ashtahuangarin canga ñucanchihuan ricujpica, cunanga chunga huaranga runacunashna valishcami cangui. Shinamanda canga, cai pueblomandallata imashnallapash ayudashpami ali canguiman— ninajurcami.

⁴Shina nijpimi, jatun mandajca: —Ñucaca, cangunapaj ima ali cashcata rurashallami— nirca. Chai jipami jatun mandajca, puebloman yaicuna pungu ladoman shayarishpa quedarca. Chai ladotami patsajpi, huarangapi shicanyachishpa churashca tucuilla soldadocuna llujshinajurca.

⁵Chaipimi jatun mandajca, Joab, Abisai, Itai shuti runacunataca, cashna nishpami mandarca: “Ñucata juyashpaca, Absalón huambragutaca aliguta ricushpa na llaquichinachu canguichi” nircami. Absalonda ama llaquichinajuchun nishpa, soldadocunata tucui mandajcunaman jatun mandaj mandajujtaca, tucui soldadocunami uyarca.

⁶Chashnami paicunaca, israelcunahuan macanajungapaj pambaman llujshinajurca. Efraín shuti bosquepimi macanajui callarirca.

⁷Chaipimi israelcunaca, Davidta servijcunapaj ñaupajpi mishai tucushpa urmanajurca. Chai punllapica ninandapacha huañuchijpimi, ishcai chunga huaranga runacuna huañurca.

⁸Chai macanajuipica, tucuilla chai llactapimi caipi chaipi macanajunajurca. Chai punllapica, espadahuan huañuchishcatapash ashtahuan yalimi, bosque ucupillata urmashpa huañunajurca.

⁹Absalón runaca, jari mulapi tiarishca rijushpami, Davidta servijcunahuan tuparirca. Chaimandami chai jari mulaca, rama junda encina nishca sacha ucuman yaicurca. Chaipimi Absalón runaca, shuj quiru parcapi cunga churajurijpi huarcuriaj quedarca. Pai rijushca jari mulaca, saquishpa calparcallami.

¹⁰Chaita shuj runa ricushpami, cashna nishpa Joab runaman villarca: —Ricui Absalondaca, encina quirupi huarcuriajujtami ricurcani— nircami.

¹¹Shina villajpimi Joab runaca, chai villaj runataca cashna nirca: —Chashna cajta can ricushpaca, ¿imashpata na chaipillata huañuchishpa alpaman shitarcanguiyari? Can chashna rurashca cajpica, cushijuihuanmi patsaj chunga chuscu gramota pezaj culquita, cara chumbitapash canman cuiman carcani— nircami.

¹²Shina nijpimi chai runaca, Joab runataca cashna nirca: —Canga, chunga shuj kilo chuscu patsaj gramota pezaj culquita ñucaman cujpipash, jatun mandajpaj churitaca na huañuchimanllu. Ñucanchica candapash, Abisai shuti, Itai shuti runacunatapash, jatun mandajca cashna mandajtami uyarcanchi: ‘Absalón huambragutaca, maijambash tacaritallapash ama tacarichun ricuriapanguichi’ nijtami uyarcanchi.

¹³Shuj yuyaipica, ñucallata huañungapajmi, chashna ruraiman carcani. Jatun mandajpaj ñaupajpica, imatapash na pacai usharinllu. Canllatapashmi, ñucataca llaquichinguiman carca— nircami.

¹⁴Shina nijpimi, Joab runaca: —Canda uyashpaca, na yanga shayajushallachu— nirca. Shina nishpami quimsa flechata japishpa, Absalonbaj shungupi cacharigrirca. Paica, encina nishca quiru chaupipi huarcuriajushpapash causajurcarami.

¹⁵Chaipimi, Joab runapaj escudota apashpa purij chungapura huambracunaca, Absalonbaj muyundipi shayarishpa, ali huañuchinajurca.

¹⁶Shina huañuchijpimi Joab runaca, trompetata huacachirca. Chaita uyashpami, israelcunata catinajushcatapash saquishpa tigrarca. Joab runallatami, gentecunataca jarcarca.

¹⁷Chai jipaca, Absalonda japishpami, bosquepi tiaj shuj jatun utujuman shitarca. Paipaj jahuapica, shuj jatun rumi mundundami rurashpa saquinajurca. Shinallata israelcunaca, tucuillami paicunapaj carpacunapi pacajungapaj calpanajurca.

¹⁸Absalón causajushpallatami, jatun mandajpaj pamba nishcapi shuj pilartashnalla rumicunahuan rurachishca carca. Paica: “Ñuca shutita yarinajuchunga, churitallapash na charinichu” nishpami, shina rurachishca carca. Chai pilartashna rurashcatami, paipaj shutipi churarca. Chaitami cunangaman, “Absalonbaj Pilar” ninajun.

¹⁹Chai jipami, Sadoc shuti curapaj churi Ahimaas shuti runaca, cashna nirca: —Cunanga, calpashpa rishpa: ‘Mandaj Diosca, ñamari canda llaquichijcunapaj maquimandaca mitsashca’ nishpa, ¿nachu jatun mandajman villagrisha?— nircami.

²⁰Shina nijpimi Joab runaca, cashna nirca: —Chai villanataca, cunanga na villagrinachu cangui. Shuj punlla villagringuillami. Jatun mandajpaj churimi huañushca. Chaitaca, cunanga na villagrinachu cangui— nircami.

²¹Shina nishpapash Joab runaca, Etiopía llactamanda shuj runatami cashna nirca: —Imata cashpapash can ricushcata, jatun mandajman villangapaj ri— nijpimi, Etiopía llactamanda runaca, Joab runata cazushcata ricuchingapaj, paipaj ñaupajpi urai cumurirca. Chai jipaca, villangapaj calparcallami.

²²Shinallata Sadoc shuti runapaj churi Ahimaas shuti runaca, cutinmi Joab runataca cashna nirca: —Ima cachumbash, Etiopía llactamanda runata catishpa, cunanda calpagrinillami— nircami. Shina nijpimi Joab runaca, cashna nirca: —Ñuca huahualla, ¿imapajta calpashpa risha ninguiyari? Can villashcamandaca, imatapash na japinguichu— nircami.

²³Shina nijpimi, Ahimaas runaca: —Ima cachumbash, ñucapash calpashpa rigrinillami— nijpimi, Joab runaca: —Shinaca calpashpa rilla— nirca. Shina nijpimi Ahimaas runaca, pugru pambata calpashpa rishpa, chai Etiopía llactamanda runataca yalishpa rirca.

²⁴Davidca, puebloman yaicuna ishcai pungu chaupipimi tiajurca. Shinallata chapaj runapash, pungu vichai jatun patapi tiajuj torremanmi rishca carca. Chaimanda vichai ricushpami, shuj runataca pailla calpashpa shamujujta ricurca.

²⁵Chaita ricushpami, chapashpa shayajuj runaca, jatun mandajman caparishpa villarca. Shina villajpimi, jatun mandajca: —Shujlla shamujushpaca, ali villanahuanmi shamujunga— nirca. Calpashpa shamujuj runaca, ashtahuan quimirimujpimi,

²⁶torrepi chapajuj runaca, cutin shuj runapash calpashpa shamujujta ricurca. Chaita ricushpami, torrepi chapajuj runaca cashna nirca: —Ricui, shuj runapashmi, pailla calpashpa shamujun— nishpa, pungupi cuidashpa shayajuj runaman caparishpa villarca. Shina villajpimi, jatun mandajca: —Chai runapash villangapajmi shamujunga— nirca.

²⁷Chai torremanda chapaj runaca, cutinmi cashna nirca: —Pundapi calpashpa shamujuj runaca, Sadoc shuti runapaj churi Ahimaas shuti runami calpamujun yarin— nircami. Shina nijpimi jatun mandajca, cashna nirca: —Chai runaguca alitallami villan, ali villanahuanmi shamujunga— nircami.

²⁸Ahimaas runa chayamushpaca, caparishpami jatun mandajtaca: —Casilla ali causaiguta charipangui— nirca. Chai jipami, jatun mandajpaj ñaupajpi cungurishpa, alpaman chayajta cumurishpa cashna nirca: —Can jatun mandajta Mandaj Taita Diosca, alicachi tucushca cachun. Paimi, can jatun mandaj ñuca amota llaquichingapaj jatarijcunataca, ñucanchi maquipi churashca— nircami.

²⁹Shina nijpimi, jatun mandajca: —¿Absalón huambraguca, alillachu capan?— nirca. Shina nijpimi Ahimaas shuti runaca, cashna nirca: —Canda servij Joab runa ñucata cachamujui horasmi, ninanda caparinajujta uyarcani. Ashtahuangarin chaipi ima tucushcatapash na yachanichu— nircami.

³⁰Shina nijpimi, jatun mandajca: —Canga, caiman yalimushpa chaipi shayari— nijpi Ahimaas runaca, chaiman yalishpa shayarishpa quedarca.

³¹Chai jipallami, Etiopía llactamanda runa chayamushpaca, cashna nirca: —Jatun mandaj ñuca amolla, cai ali villaita chasquipai. Canda llaquichingapaj tucuilla jatarijcunapaj maquimandaca, cunanmari Mandaj Diosca mitsashca— nircami.

³²Shina nijpimi jatun mandaj Davidca, Etiopía llactamanda runataca: —¿Absalón huambraguca, alillachu capan?— nirca. Shina nijpimi chai runaca, cashna nishpa tigrachirca: —Can jatun mandaj ñuca amota fiñajcunaca, chai huambrashna tucushpachari ali canman. Shinallata canda fiñashpa llaquichingapaj tucui jatarijcunapash, chashnallata tucushpami ali canman— nircami.

³³Shina nijta uyashpami, jatun mandaj Davidca ninanda musparirca. Chaimandami, puebloman yaicuna pungu jahuapi tiajuj jatun ucuman vichai rishpa huacajurca. Paica, chai ucuman rijushpami, cashna nishpa huacajurca: “¡Ñuca huahua Absalonlla, ñuca huahua, ñuca huahua Absalonlla! ¡Cambaj randica, ñuca huañushpachari ali caiman carcani! ¡Absalón, ñuca huahualla, ñuca huahualla!” nijurcami.