Read Imbabura Highland Quichua 2 SAMUEL 2 Bible Online

2 SAMUEL 2 - Imbabura Highland Quichua bible

2 SAMUEL 2

¹Chai jipami, cashna tucurca: Davidca, Mandaj Diostami cashna nishpa tapurca: —Judá llactapi tiaj maijan pueblomambash, ¿vichai rinallachu capani?— nishpa tapujpimi, Mandaj Diosca: —Ari, vichai rilla— nirca. Shina nijpimi, Davidca: —¿Maimanda vichai ripasha?— nishpa cutin tapujpi: —Hebrón puebloman ri— nirca.

²Shina nijpimi Davidca, paipaj ishcandi huarmicunandi, chaiman vichai rirca. Jezreel pueblomanda Ahinoam shuti huarmindi, Carmel shuti pueblomanda Nabal shuti runa huañujpi pai cazarashca Abigail huarmindimi rirca.

³Shinallata Davidca, paihuan purij runacunatapash paicunapaj familiacunandimi pusharca. Paicunapashmi, Hebrón pueblo ladollapi tiaj pueblocunapi causanajurca.

⁴Judá llacta runacunaca chaiman shamushpami, Judá aillupajllata jatun mandaj cachun Davidtaca, aceiteta talishpa javinajurca. Shinallata: “Galaad llactapi tiaj Jabes shuti pueblomanda runacunami, Saúl huañujpica pambashca” nishpami, Davidman villanajurca.

⁵Shina villajpimi Davidca, Galaad llactapi tiaj Jabes shuti pueblopi causajcunaman, cashna nichun villaj runacunata cacharca: “Cangunata mandaj Saulta chashna llaquishpa pambashcamandaca, Mandaj Diosca cangunatapash bendiciapachun.

⁶Cunanga, Mandaj Diosca cangunatapash chashnallata llaquishpa, imatapash pactachipachun. Canguna caita rurashcamandaca, ñucapash alitallami cangunamambash rurasha.

⁷Cunanga, cangunapaj maquipash ashtahuan shinlli tucushpa, na manllashpa shayarichiyari. Cangunata mandaj Saúl huañujpipash, Judá aillu runacunaca ñucatami, paicunapaj jatun mandaj cachun, aceiteta talishpa javihuarca” nichunmi cacharca.

⁸Saulpaj soldadocunata mandaj, Ner shuti runapaj churi, Abner runaca, Saulpaj churi Is-boset shuti runata japishpami, Mahanaim shuti puebloman aparca.

⁹Chaipimi Galaad llactatapash, Gesuri shuti llactatapash, Jezreel pueblotapash, Efraín llactatapash, Benjamín llactatapash, shinallata tucuilla Israel llactatapash jatun mandaj cachun churarca.

¹⁰Saulpaj churi Is-boset shuti runaca, chuscu chunga huatata charishpami, Israel llactataca mandai callarirca. Paica, ishcai huatacamanllami mandajurca. David mandajujtaca, Judá aillu runacunallami catinajurca.

¹¹Davidca, canchis huata sucta quillatami, Judá aillu runacunataca, Hebrón pueblopi mandajurca.

¹²Ner shuti runapaj churi Abnerca, Mahanaim shuti pueblomandami, Saulpaj churi Is-boset shuti runata servijcunandi, Gabaón shuti puebloman llujshishpa rirca.

¹³Sarvia shuti huarmipaj churi Joab runapash, Davidta servijcunapash, Hebrón pueblomanda llujshishpa rishpaca, Gabaón pueblo ladopi cuchayashca yacu ladopimi tuparinajurca. Chaipi tuparishpami shujcunaca, cuchayashca yacu chai ladoman, caishujcunaca chaishuj ladoman shayarinajurca.

¹⁴Chaipimi Abner runaca, Joab runataca: —Ñucanchi ñaupajpi shayarishpa macanajungapaj, chairalla viñai runacuna jatarichun— nijpi, Joab runaca: —Jatarichi— nirca.

¹⁵Shina nishca jipami, Benjamín aillu puramanda Saulpaj churi Is-boset runapaj ladoca, chunga ishcai runacuna shayarirca. Shinallata Davidta servijcunamandapash, chunga ishcaillatami shayarirca.

¹⁶Chaipimi paicunaca, fiñarij purallata umamanda japirishpa, shinallata espadatapash fiñarij purallata paicunapaj vijsa ladopi satirishpa, tucuicuna huañushpa urmanajurca. Chaimandami chai pambataca, “Helcat-hazurim” nishpa shutichirca. Chaica, Gabaón pueblopimi tiajun.

¹⁷Chai punllapi macanajuica, shinllipachami carca. Chaipimi Abner runatapash, Israel runacunatapash Davidta servijcunaca misharca.

¹⁸Sarvia shuti huarmipaj quimsandi churicunapashmi, chaipi carca. Paicunaca Joab, Abisai, Asael shutimi carca. Chai Asael runaca, pambapi causaj tarugashnami calpangapaca alipacha carca.

¹⁹Shina cashpami Asael runaca, Abner runataca ali ladomambash, lluqui ladomambash na anchurishpa, ninandapacha calpashpa catijurca.

²⁰Shina catijujpimi, huashaman tigrarishpa Abner runa ricushpaca: —¿Nachu canga, Asael cangui?— nijpi paica: —Ari— nirca.

²¹Shina nijpimi Abner runaca, cashna nirca: —Ali ladoman cashpa, lluqui ladoman cashpapash anchuri. Chai jipaca, maijan runata cashpapash japishpa, pai ima charishcacunatapash quichushpa apailla— nircami. Shina nijpipash Asael runaca, paita catijushcamandaca na anchuringapaj munarcachu.

²²Chaimandami Abner runaca, Asael runataca cutin cashna nirca: —Ñuca ladomanda anchuri. Huañungacaman canda ñuca chugrichishpaca, cambaj huauqui Joab runapaj ñaupajpica, ima ñavita ricurigrisha— nircami.

²³Shina nijujpipash, na anchuringapaj munajpimi Abner runaca, lanza filohuan, picha costillas ladopi huashaman yalijta tujsirca. Shinamandami, chaipillata huañushpa urmarca. Asael runa huañushpa urmashca ñandallata tucui shamujcunaca, tucuicunami shayarishpa ricunajurca.

²⁴Ashtahuangarin Joab shuti, Abisai shuti runacunaca, Abnerta catishpa rinajurcallami. Gía shuti pueblo chimba purapi tiaj Amma shuti lomaman chayajpimi, indi huashajurca. Chai Gía shuti puebloca, Gabaón shuti jichushca pamba ñan ladopimi.

²⁵Chaipimi, Benjamín llacta runacunaca, Abner runata catishpa rishpa shujllapi tandanajushpa, shuj loma jahuapi shayarinajurca.

²⁶Chai pushtumandami Abner runaca, Joab runataca cashna nishpa caparirca: —¿Espadahuan tucuchishpa catijugringuillachu? Cai macanajui tucurishca jipaca, ¿llaquicunalla tianataca nachu yachangui? ¿Ima horascamanda cambaj gentecunataca, paicunapaj huauquicunata llaquichishpa catinata saquishpa tigramuchun mandagringui?— nircami.

²⁷Shina nijpimi Joab runaca, cashna nirca: —Taita Diosca causajumbachami. Can jariyashpa na rimashca cajpica, gentecunaca cunan tutamandallatami paicunapaj huauquicunata catinataca, saquinman carca— nircami.

²⁸Shina nishca jipami Joab runaca, cachuta huacachirca. Chaita gentecuna uyashpami, tucuilla shayarirca. Chaimandaca, na ashtahuan israelcunata llaquichishpa catircachu. Macanajuitapash na ashtahuan macanajurcachu.

²⁹Abner runaca, paipaj runacunandimi, Arabá shuti jichushca pambata tucui tuta rinajurca. Jordán yacuta chimbashpaca, Bitrón shuti tucuilla pambata yalishpami, Mahanaim puebloman chayagrirca.

³⁰Joab runapash, Abner runata catijushcata saquishpa tigrarcallami. Shina tigrashpaca, tucuilla gentecunata tandachishpa ricushpami, Davidta servij chunga pusaj runacunapash, Asael runapash illashcata ricujurca.

³¹Ashtahuangarin Davidta servijcunaca, Benjamín aillu puracunatapash, Abnerpaj runacunatapash, quimsa patsaj sucta chunga runacunatami chugrichishpa huañuchirca.

³²Asael runataca, Belén puebloman apashpami, paipaj taitata pambana utujupi pambarca. Chai jipaca Joab runapash, paipaj runacunapash tucui tuta rinajushpallatami, punllayangacaman Hebrón shuti puebloman chayarca.