Read Imbabura Highland Quichua 2 SAMUEL 20 Bible Online

2 SAMUEL 20 - Imbabura Highland Quichua bible

2 SAMUEL 20

¹Chai jipallami cashna tucurca: Benjamín aillu puramanda Bicri shuti runapaj churi Seba shuti runami, chaipi carca. Paica, jatun nalita ruraj runami carca. Paimi, trompetata tocashpa cashna nijurca: “Ñucanchica, Isaipaj churi Davidpajmandaca imata japinatapash, paihuan imata chaupirinatapash na charinchica. ¡Cunanga, tucui israelcuna ñucanchi carpaman jacuchilla!” nijurcami.

²Shina nijpimi Israel runacunaca, Davidta saquishpa, Bicri shuti runapaj churi Seba shuti runata catinajurca. Ashtahuangarin Judá llactamanda runacunaca, paicunapaj jatun mandajtami, Jordán yacumandapacha Jerusalengaman catinajurca.

³Jatun mandaj Davidca, Jerusalenbi pai mandana huasiman ña chayashca jipami, pai mandana huasita cuidachun saquishca chungapura caishuj huarmicunataca, shuj huasiman pushashpa, chaipi vichashpa saquirca. Paicunamanga micunatapashmi cararca. Shina cashpapash paicunapica, cutinga na chayarcachu. Ashtahuangarin cusa illaj huarmicunashna huañungacaman causanajuchunmi, chaipi vichashpa saquirca.

⁴Chai jipami jatun mandajca, Amasa shuti runataca cashna nirca: —Cunanmanda quimsa punllapi shamuchun, Judá llactamanda runacunata cayamugri. Cambash caipi canguilla— nircami.

⁵Amasa shuti runaca, Judá llactamanda runacunata cayangapajmi rirca. Paica, tigramungui nishca punllata ashtahuan yalishpami, chaipi quedarca.

⁶Chaimandami Davidca, Abisai shuti runataca cashna nirca: —Bicri shuti runapaj churi Seba shuti runacarin, Absalondapash yalimari llaquichigrin. Chaimanda cunanga, ñucata servijcunata pushashpa, cambash paita catishpa rilla. Pircahuan muyundi jarcashca pueblota tarishpa chaiman yaicushpara, ñucanchitaca ashtahuan llaquichinman— nircami.

⁷Shina nijpimi Abisai shuti runaca, Joab runapaj runacunandi, cereteo nishca, peleteo nishca runacunandi, macanajunata ali yachaj tucuilla shinlli runacunandi Jerusalenmanda llujshishpa, Bicri shuti runapaj churi Seba shuti runata catishpa rinajurca.

⁸Paicunaca, Gabaón shuti pueblo ladollapi jatun rumi tiajuj ladoman ña chayanajujpimi, Amasa shuti runaca tuparingapaj llujshimurca. Joab runaca, macanajungapaj churajunata churajushpa ali chumbilirishcami carca. Chai chumbilirishcapimi, uchilla espadata alichinapi alichishpa, shuj lado cinturaspi satirishca carca. Pai ña ashtahuan quimirijpimi, chai uchilla espadaca alpaman urmarca.

⁹Chaimandami Joab runaca, Amasa shuti runataca: —Ñuca huauquigulla, ¿alillachu capangui?— nishpami muchangapaca, Amasa shuti runapaj barbasmanda ali lado maquihuan japirca.

¹⁰Amasa shuti runaca, chai uchilla espadata Joab runa charijujta ricushpapash, na cuidarircachu. Chaimandami Joab runaca, chai uchilla espadahuanga chunllulicunapash alpaman talirijta, picha costillas ura ladopi chugrichirca. Cutin shujtaca, na chugrichijpillatami Amasa runaca huañushpa, alpaman urmarca. Chai jipami Joab runaca, Bicri shuti runapaj churi Seba shuti runata catishpa, paipaj huauqui Abisai runandi rinajurca.

¹¹Joab runapaj runacunamanda shuj runami, Amasa shuti runa sirijuj ladoman shayarishpa: —Maijambash Joab runata, Davidta juyashpaca, Joab runata catichi— nirca.

¹²Amasa shuti runaca, chaupi ñambimi, paipaj yahuarpillata, caiman chaiman cuyurishca sirijurca. Chaita ricushpami, chai ñanda tucui yalijcunaca, shayarishpa ricunajurca. Tucuilla gentecuna chashna shayarinajujta ricushpami chai runaca, Amasa shuti runataca chai ñanmanda anchuchishpa, shuj ladoman sirichirca. Chaipimi paitaca, jahualla churajunahuan quilpashpa saquirca.

¹³Chai ñanmandaca ña anchuchijpimi, Joab runata catij tucui runacunaca, Bicri shuti runapaj churi Seba shuti runata japingapaj catinajurca.

¹⁴Seba shuti runaca, Israel aillucunapaj tucuilla llactata yalishpami, Abel-bet-maaca shuti pueblocaman, shinallata Barim shuti tucui pueblotapash yalishpa rirca. Chai pueblocunapi causajcunapashmi, paihuan tandanajushpa rinajurca.

¹⁵Joab runapaj runacunaca, Abel-bet-maaca shuti puebloman shamushpami, chaupipi churashpa muyundi shayarinajurca. Chashna shayarishpami, chai pueblo pircapica, baluarte nishcacunata shayachinajurca. Chashnami chai puebloca, chaupipi churai tucurca. Chai jipaca, tucui gentecunami chai pueblo pircata urmachingapaca, imatallapash ruranajurca.

¹⁶Shinamandami, shuj alipacha yachajushca huarmica, chai pueblo pirca jahuamanda, cashna nishpa caparirca: —Uyaichi, uyaichi. Joab runata caiman shamui nijunmi nipaichi. Ñucami, paihuan parlangapaj munani— nircami.

¹⁷Chai huarmipaj ladoman Joab runa chayajpimi, chai huarmica: —¿Canllu Joab cangui?— nijpi paica: —Ari, ñucami Joab cani— nirca. Shina nijpimi, chai huarmica: —Canda servij ñuca imata nijpipash uyapai— nijpimi, Joab runaca: —Ari, uyashallami— nirca.

¹⁸Chaipimi chai huarmica, cutin cashna nirca: —Ñaupa punllacunaca: ‘Imata yachangapaj munashpapash, Abel pueblopimi tapugrina’ ninajunmi carca. Chashnami, imata cashpapash alichin carca.

¹⁹Ñucaca, tucuilla Israel llactapi causajcuna puramanda casilla aliguta causaj ali cazujmi cani. Ashtahuangarin canga, Israel llactapica mamashna tiaj pueblotami tucuchingapaj munangui. ¿Imashpata canga, Mandaj Dios cushca pueblota tucuchingapaj munangui?— nircami.

²⁰Shina nijpimi Joab runaca, cashna nirca: —Ñuca chashna ruranaca, ima horallapash ama chayachun. Ñuca tucuchishpa llaquinayaita saquinaca, ima horallapash ama chayachun.

²¹Na chashnachu, ashtahuangarin Efraín urcupi causaj Bicri shuti runapaj churi Seba shuti runami, jatun mandaj Davidta fiñashpa macanajungapaj jatarirca. Chai runata cujpica, cai pueblomanda anchurishpa rishallami— nijpimi chai huarmica, Joab runataca: —Ricui paipaj umataca, pirca jahuamanda shitamushunllami— nirca.

²²Chai huarmica, alipacha yachajushca cashpami, tucui gentecunaman villagrirca. Shina villajpimi paicunaca, Bicri shuti runapaj churi Seba shuti runapaj umata fitishpa, Joab runapajman shitamurca. Chai jipami Joab runaca, trompetata huacachijurca. Shina huacachijujpimi, chai pueblomandaca tucuilla anchurishpa, paicunapaj carpacunaman rinajurca. Shinallata Joab runaca, Jerusalenbi jatun mandajpajmanmi tigrarca.

²³Shinami Joab runaca, tucui Isarel soldadocunata mandaj tucurca. Shinallata Joiada shuti runapaj churi Benaía runaca, cereteo nishca, peleteo nishca runacunata mandajmi tucurca.

²⁴Adoram shuti runaca, impuestota japijcunata mandajmi tucurca. Ahilud shuti runapaj churi Josafad runaca, llactapi imalla tucushcata escribijmi carca.

²⁵Seva shuti runaca, escribijmi carca. Sadoc shuti, Abiatar shuti runacunaca, curacunami carca.

²⁶Jair shuti pueblomanda Ira shuti runapash, Davidpaj curami carca.