Read Imbabura Highland Quichua 2 SAMUEL 23 Bible Online

2 SAMUEL 23 - Imbabura Highland Quichua bible

2 SAMUEL 23

¹Tucuripi David rimashca shimicunaca, caicunami: Davidca, Isaipaj churimi. Paica, alicachi tucunapi churai tucushca runami. Paitaca, Jacobopaj Taita Diosmi aceiteta talishpa javirca. Paica, israelcunaman juyaillaguta candajmi. Paimi cashna nijurca:

²“Mandaj Diospaj Espiritumi, ñucamanda rimashca. Pai rimashca shimicunaca, ñuca jallupimi.

³Israelcunapaj Taita Diosmi rimahuarca. Jatun Rumishna israelcunapaj Diosmi, ñucaman cashna nihuarca: ‘Gente purapica, imatapash cashcatapacha rurashpa mandaj shuj runami tianga. Paica, Taita Diosta manllashpami, aliguta mandajunga.

⁴Paica, tutamandata punchayachinshnami canga. Fuyu illaj tutamandapi, indi punchapamba shitajunshnami canga. Alpapi jihuata viñachij, juyailla tamiagushnami canga.

⁵Ashtahuangarin ñuca familiacunaca, Taita Dioshuanga na chashnachu. Shina cajpipash tucuipi alita rurangapajmi, ñucahuanga causaita causaicaman Diosca ari nirca. Chaitaca alichishpami charinga. Tucui imamanda ñuca quishpirinata, ñuca imatalla munashcata nara rurashpapash, paica ñami ari nirca.

⁶Ashtahuangarin Diosta na manllajcunaca, tucuicunami cashacunata sapimanda llujchishpa shitashcashna canga. Chaicunataca, pipash na maquihuanlla japinllu.

⁷Maijan cashpapash japingapaj munashpaca jirruhuan, na cashpaca lanzahuanmi japin. Shina japishpaca, chaipillatami tucuillata rupachin’ nihuarcami” nijurcami.

⁸David charishca ninan shinlli soldadocunapaj shuticunaca, caicunami: Tacmonitapura Joseb-basebet shuti runaca, soldadocunata mandajcunata mandajmi carca. Paica, shuj macanajuipimi, pusaj patsaj runacunata paipaj lanzahuan huañuchishca carca. Paica, eznitapura Adino shutimi carca.

⁹Paipaj catica, ahohitapura Dodo shuti runapaj churi Eleazarmi carca. Eleazarca, Davidhuan tandanajushca quimsapura ninan shinlli runa puracunami carca. Macanajushunchi nishpa filisteocuna rimanajujpimi, paipash chaipi carca. Chai macanajuimandaca, israelcunaca manllashpami rishca carca.

¹⁰Pai jatarishpami filisteocunataca, paipaj maqui shaijungacaman huañuchijurca. Chaimandami paipaj maquipash, espadapi llutarishpa quedarca. Chai punllami Mandaj Diosca, jatun macanajuita mishachirca. Chai jipami israelcunaca, imalla tiashcacunata tandachingapajlla, Eleazarta catishpa rinajurca.

¹¹Paipaj catica, araritapura Age shuti runapaj churi Sama shuti runami carca. Filisteocunaca, Lehi shuti pueblo ladopi lentejas cashcata tarpushca shuj uchilla pambapimi tandanajushca carca. Chaimandapashmi israelcunaca, filisteocunata manllashpa calpashca carca.

¹²Ashtahuangarin Sama shuti runaca, chai pamba chaupipi jarcashpa shayarishpami, filisteocunataca huañuchijurca. Shinami Mandaj Diosca, jatun macanajuita mishachirca.

¹³Cozechana punllacunapimi, chunga quimsa mandaj puramanda chai quimsa runacunaca, Adulam shuti jatun utuju ñaupajpi Davidhuan tuparingapaj urai shamurca. Filisteocunapaj carpacunaca, Refaim shuti pambapimi shayanajurca.

¹⁴Davidca, pacajungapaj rurashca pirca huashapimi carca. Belén pueblopica, filisteo soldadocunami cuidashpa shayanajurca.

¹⁵Chaipimi Davidca, cai munaita charishpa, cashna nirca: “¡Belén pueblo pungu ladopi allashca jatun utujumanda yacuta apamushpa maijan cashpapash, ñucaman ufiachun carashpachari ali canman!” nircami.

¹⁶Shina nijpimi, ninan shinlli chai quimsa runacunaca, filisteocuna carpacunata shayachishca tianajuj chaupita yalishpa rirca. Chashna rishpami, Belén pueblo pungu ladopi allashca jatun utujumanda yacuta llujchishpa, Davidman apamurca. Ashtahuangarin paica na ufiangapaj munashpami, Mandaj Diosman carashpa cashna nishpa alpapi talirca:

¹⁷“Paicuna huañunatapash na manllashpa rishca, ¿cai runacunapaj yahuarta ufiashallachu? Mandaj Dioslla, cai yacuta ufianamandaca jarcahuayari” nishpami, na ufiangapaj munarca. Ninan shinlli chai quimsa runacunami, chai yacutaca apamugrirca.

¹⁸Sarvia shuti huarmipaj churi Joab runapaj huauqui Abisai runaca, quimsa chunga runacunata mandajmi carca. Paica paipaj lanzahuanmi, quimsa patsaj runacunata huañuchishca carca. Chaimandami paica, chai quimsa runacunashnallata ali rijsishca tucurca.

¹⁹Paica, quimsa chunga runacunata yali rijsishcami carca. Chaimandami, paicunata mandaj tucurca. Shina cashpapash, caishuj quimsa runacunashnaca, na carcachu.

²⁰Chai jipaca, Joiada shuti runapaj churi Benaía shuti runami carca. Paica, Cabseel shuti pueblopi causajushca, ninan manllarinacunata rurashca shuj runapaj churimi carca. Paica, Moab llactapimi ishcai leongunata huañuchirca. Shinallata rasu urmajui punllapi, shuj utujuman paillata uriajushpami, shuj leonda huañuchirca.

²¹Shinallata paica, Egiptomanda shuj jatun runatapashmi huañuchirca. Egiptomanda chai runaca, lanzata apashcami rijushca carca. Shina cajpipash Benaía runaca, shuj caspihuanlla rishpami, chai jatun runapaj lanzata quichushpa, paipaj lanzahuanllata huañuchirca.

²²Chashna rurashpami, Joiada runapaj churi Benaía runaca, chai quimsa shinlli runacunashnallata, ali rijsishca tucurca.

²³Paica, caishuj quimsa chunga runacunashnallata ali rijsishcami carca. Shina cashpapash, caishuj quimsa runacunashnaca, na carcachu. Davidca, paita cuidaj soldadocunata mandaj cachunmi churarca.

²⁴Chai quimsa chunga shinlli runa purapica, Joab runapaj huauqui Asael runapashmi carca. Shinallata Belén pueblomanda Dodo shuti runapaj churi Elhanán shuti runapashmi carca.

²⁵Haroditapura Sama shuti runapash, harodita purallata Elica shuti runapashmi carca.

²⁶Paltitapura Heles shuti runapash, tecoaitapura Iquis shuti runapaj churi Ira shuti runapashmi carca.

²⁷Anatotitapura Abiezer shuti runapash, husitapura Mebunai shuti runapashmi carca.

²⁸Ahoahitapura Salmón shuti runapash, netofatitapura Maharai shuti runapashmi carca.

²⁹Netofatita purallata Baana shuti runapaj churi Heleb shuti runapashmi carca. Benjamín aillupaj Gabaa pueblomanda, Ribai shuti runapaj churi Itai shuti runapashmi carca.

³⁰Piratonitapura Benaía shuti runapash, Gaas shuti jatun larca yacu ladomanda Hidai shuti runapashmi carca.

³¹Arbatitapura Abi-albón shuti runapash, bahurimitapura Azmavet shuti runapashmi carca.

³²Saalbonitapura Eliaba shuti runapash, Jasén shuti runapaj miraimanda Jonatán runapashmi carca.

³³Araritapura Sama shuti runapash, ararita purallata Sarar shuti runapaj churi Ahíam shuti runapashmi carca.

³⁴Ahasbai shuti runapaj churi Elifelet shuti runapashmi carca. Ahasbai runaca, Maaca shuti runapaj churimi carca. Gilonitapura Ahitofel shuti runapaj churi Eliam runapashmi carca.

³⁵Carmelitapura Hezrai shuti runapash, arbitapura Paarai shuti runapashmi carca.

³⁶Soba shuti pueblomanda Natán runapaj churi Igal shuti runapash, gaditapura Bani shuti runapashmi carca.

³⁷Amonitapura Selec shuti runapash, beerotitapura Naharai shuti runapashmi carca. Paica, Sarvia shuti huarmipaj churi Joab runapaj escudota apaj runami carca.

³⁸Itritapura Ira shuti runapash, itrita purallata Gareb shuti runapashmi carca.

³⁹Heteopura Urías shuti runapashmi carca. Tucui paicunaca, quimsa chunga canchis purami carca.