Read Imbabura Highland Quichua 2 SAMUEL 4 Bible Online

2 SAMUEL 4 - Imbabura Highland Quichua bible

2 SAMUEL 4

¹Hebrón shuti pueblopi Abner shutita huañuchishcata yachashpami, Saulpaj churica ushai illanshna tucurca. Shinallata tucui israelcunami, ninanda manllarinajurca.

²Saulpaj churica, shuhua runacunata mandaj ishcaipura runacunatami charirca. Paicunaca, shujca Baana shuti, caishujca Recab shutimi carca. Paicunaca, Benjaminbaj mirai Beerot shuti pueblopi causanajuj, Rimón shuti runapaj churicunami carca. (Beerot pueblotapash, Benjaminbaj mirai purallatami ninajunmi carca.

³Beerot pueblopi causajcunaca, Gitaim shuti pueblomanda pacajushpa rishpami, shuj llactamanda shamushcacunashna, cunan punllacunacaman chaipi causanajun).

⁴Saulpaj churi Jonatanga, na puri ushaj suchu churitami charirca. Paica, picha huatata charijpimi, Saulpash, Jonatanbash huañushcami nishpa, Jezreel pueblomanda villaj shamurca. Shinamandami paita viñachij mamaca, paita marcashpa pacajushpa calpajurca. Shina ninanda calpajujpimi, huahuaca urmarca. Shina urmashpami, paica suchu quedarca. Paica, Mefi-boset shutimi carca.

⁵Beerot shuti pueblopi causanajuj, Rimón shuti runapaj Recab shuti, Baana shuti churicunami, ninandapacha indijui horaspi, Is-boset runapaj huasiman rishpa yaicugrirca. Ña micushca jipami, paica paipaj huasi ucupi puñujushca carca.

⁶Shinallata huasi pungupi cuidaj huarmipash, trigomanda mapata anchuchijushpami, puñushpa quedashca carca. Shina puñujujpimi Recab shuti runapash, paipaj huauqui Baana shuti runapash, huasiman pacalla yaicurca.

⁷Shina yaicujpimi Is-boset runaca, paipaj huasi ucu camapi puñujushca carca. Chaipi puñujujpimi chugrichishpa huañuchishpaca, umata fitirca. Chai umata apashpami, Arabá shuti pambapi tiaj ñandaca, tucui tuta shamunajurca.

⁸Shina shamushpami, Is-boset runapaj umataca, Hebrón shuti pueblopi Davidpajman apamurca. Chaipimi, jatun mandaj Davidtaca, cashna ninajurca: —Ricui, Saulca canda fiñashpami, huañuchisha nishpa purirca. Chaimandami, paipaj churi Is-boset runapaj umataca apamunchi. Mandaj Diosca, ñuca amo can jatun mandajta llaquichishcamandami Saultapash, paipaj miraicunatapash chashnallata, cunanga llaquichijun— ninajurcami.

⁹Shina nijpimi Davidca, Beerot pueblomanda Rimón shuti runapaj churi Recab shuti runatapash, paipaj huauqui Baana shuti runatapash cashna nijurca: —Tucui llaquimanda ñuca almata quishpichij, Mandaj Diosca causajumbachami.

¹⁰Shuj runapash: ‘Ricui, Saulca huañushcami’ nishpami, villaj shamuhuarca. Paica, alitami villaj shamuni yashpami, chashna villahuarca. Ashtahuangarin chaita villashcamandaca paita japishpami, Siclag shuti pueblopi huañuchircani.

¹¹Cangunacarin nali runacuna cashpami, imatapash cashcatapacha ruraj runaguta, paipaj huasi ucu camapi huañuchishcanguichi. Cunanga, paita huañuchishpa cangunapaj maquihuan yahuarta jichashcamandaca, ¿nachu cangunatapash huañuchina cani? ¿Nachu cangunatapash, cai pachamanda anchuchina cani?— nijurcami.

¹²Chai jipami Davidca, paita servijcunataca chai runacunata huañuchinajuchun mandarca. Chashna mandajpi huañuchishpami maquitapash, chaquitapash fitishpa, Hebrón shuti pueblo ladopi tiaj cuchayashca yacu ladopi huarcurca. Chai jipaca, Is-boset runapaj umata japishpami, Hebrón pueblopi Abner runata pambashca utuju ladopillata pambarca.