Read Imbabura Highland Quichua 2 SAMUEL 5 Bible Online

2 SAMUEL 5 - Imbabura Highland Quichua bible

2 SAMUEL 5

¹Chai jipami, tucuilla Israel aillucuna, Hebrón shuti pueblopi Davidpajman shamushpa, cashna ninajurca: “Ricui, ñucanchica cambaj tullu, cambaj aichallatami canchi.

²Saúl ñucanchita mandajui punda punllacunapipash, israelcunataca canmi macanajuiman pushan carcangui. Canllatami cutin pushashpa tigramun carcangui. Candaca, Mandaj Diosllatami cashna nirca: ‘Canmi, ñuca agllashca israelcunataca michingui. Canmi, Israel llactapica mandangui’ nircami” ninajurcami.

³Israelcunata mandaj rucucuna, Hebrón pueblopi jatun mandajpajman tucuilla shamujpimi, jatun mandaj Davidca, Mandaj Diospaj ñaupajpi, paicunahuan Hebrón pueblopi ari nijurca. Chaipimi paicunaca, israelcunata jatun mandaj cachun Davidtaca, aceiteta talishpa javinajurca.

⁴Davidca, quimsa chunga huatata charishpami, mandai callarirca. Paica, chuscu chunga huatatami mandajurca.

⁵Davidca, Judá llactataca canchis huata sucta quillatami, Hebrón pueblopi mandajurca. Shinallata Israel llactatapash, Judá llactatapashmi, quimsa chunga quimsa huatacaman Jerusalenbi mandajurca.

⁶Chai jipami jatun mandaj Davidca, paipaj runacunata pushashpa, Jerusalenbi causaj jebuseo nishca runacunahuan macanajungapaj rirca. Paicunami, Davidtaca cashna ninajurca: “Canga, caiman yaicumuitaca, na ushanguichu. Can ama caiman yaicumuchunga ñausacuna, suchu runacunami jarcanga” ninajurcami. (Paicunaca, Davidca na caiman yaicumui ushangachu yashpami, chashna ninajurca).

⁷Shina ninajujpipash Davidca, shinlli torrehuan jarcashca Sion pueblotaca quichurcallami. Chai puebloca, Davidpaj pueblomi.

⁸Chai punllapillatami Davidca, cashna nirca: “Jebuseocunata huañuchingapaj tucuilla rijcunaca, yacu rijuj larca ucuta vichai rishpa, David ninanda na ricunayachij suchucunatapash, ñausacunatapash huañuchigrichi” nircami. Chaimandami: “Ñausapash, suchupash Diospaj huasiman yaicuitaca na ushangachu” ninajun carca.

⁹Davidca, shinlli torrehuan jarcashca chai pueblopi causai callarishpami, “Davidpaj Pueblo” nishpa shutichirca. Shinallata Milo nishca pushtumanda callarishpami, pai mandashpa tiajuj huasicaman, shuj jatun pircata muyundi rurachirca.

¹⁰Davidca, ashtahuan ñaupajman rishpami, jatunyachi tucujurca. Tucuita Mandaj Taita Diosmi, paihuan carca.

¹¹Tiro shuti pueblota jatun mandaj Hiram shuti runaca, paipaj randi parlajcunatami, Davidpajman cachamurca. Shinallata cedro caspicunatapash, carpinterocunatapash, rumita juyaillata rurashpa imatalla rurajcunatapashmi cachamurca. Paicunami, Davidpaj huasitaca rurarca.

¹²Chaita ricushpami, israelcunata jatun mandaj cachunga, Mandaj Diosllata shinllitapacha churashcata Davidca yacharca. Shinallata Dios agllashca israelcunata juyaimandaca, pai mandanata jatunyachishcatapashmi yacharca.

¹³Davidca, Hebrón shuti pueblomanda shamushpaca, ashtahuan caishuj huarmicunahuambash, Jerusalenbi causaj huarmicunahuambashmi cazararca. Chai huarmicunahuanmi churicunatapash, ushicunatapash, ashtahuan charirca.

¹⁴Jerusalenbi pai charishca churicunapaj shuticunaca, caicunami: Samúa, Sobab, Natán, Salomón,

¹⁵Ibhar, Elisúa, Nefeg, Jafía,

¹⁶Elisama, Eliada, Elifelet shuticunami carca.

¹⁷Israelcunata jatun mandaj cachun, Davidta aceiteta talishpa javishcata filisteocuna uyashpami, tucuilla filisteocuna, Davidta mascangapaj vichai shamunajurca. Chaita David yachashpami, jatun pircahuan jarcashca ucupi pacajungapaj urai rirca.

¹⁸Filisteocuna shamushpaca, Refaim shuti pugru pambapimi, pamba junda tianajurca.

¹⁹Chaimandami Davidca, Mandaj Diostaca cashna nishpa tapurca: —¿Filisteocunahuan macanajungapaj, vichai rinallachu capani? ¿Paicunataca, ñuca maquipi churanachu cangui?— nircami. Shina nijpimi Mandaj Diosca, Davidtaca: —Rilla, filisteocunataca cambaj maquipi churashapachami— nirca.

²⁰Shina nijpimi Davidca, Baal-perazim shuti pambaman shamurca. Davidca, chaipi filisteocunahuan macanajushpa mishashpami, cashna nirca: “Mandaj Diosca, ñucata fiñajcunataca jatun yacu apanshnami, ñuca ñaupajpica tucuchirca” nishpami, chai pambataca, “Baal-perazim” nishpa shutichirca.

²¹Filisteocunaca, paicunapaj yanga dioscunata saquishpami rinajurca. Chaicunatami Davidpash, paipaj runacunapash rupachinajurca.

²²Filisteocunaca, Refaim shuti pugru pambaman cutin tigramushpami, pamba junda tianajurca.

²³Chaimandami Davidca, Mandaj Diosta cutin tapujpi cashna nirca: —Ama vichai ringuichu, ashtahuangarin huashata muyushpa, bálsamo nishca yuracunapaj chimba purata, paicunapajman shamungui.

²⁴Bálsamo nishca fanga jahuata purinshnalla uyarijpica, macanajungapaj llujshinguilla. Mandaj Dios ñucami, chai filisteo soldadocunata chugrichishpa huañuchingapaj ñaupasha— nircami.

²⁵Shina nijpimi Davidca, Mandaj Dios mandashcashnallata chashna rurashpa filisteocunataca, Geba shuti pueblomanda Gezer shuti pueblocaman huañuchijurca.