Read Imbabura Highland Quichua 2 SAMUEL 6 Bible Online

2 SAMUEL 6 - Imbabura Highland Quichua bible

2 SAMUEL 6

¹Davidca, macanajungapaj agllashca israelcunatami, tucuillata cutin tandachirca. Paicunaca, quimsa chunga huaranga runacunami carca.

²Chai jipami Davidca, tucuilla paipaj runacunandi, Taita Diospaj arcata apamungapaj, Judá llactapi tiaj Baala shuti pueblomanda llujshishpa rirca. Chai arcapimi, tucuita Mandaj Diospaj shutipi imata cashpapash mañan carca. Paica, querubín nishcacunapaj chaupipimi causajun.

³Taita Diospaj arcataca, shuj mushuj carretapi churashpami, Abinadab shuti runapaj huasimanda apamurca. Paipaj huasica, shuj lomapimi shayajurca. Chai mushuj carretataca, Abinadab shuti runapaj Uza shuti, Ahío shuti churicunami ñaupashpa rinajurca.

⁴Abinadab runapaj huasimanda, Taita Diospaj arcata apashpa rinajujpica, Ahío shuti runami ñaupashpa rijurca. Chai huasica, lomapimi shayajurca.

⁵Davidca, tucuilla israelcunandimi, haya shuti yuramanda caspita rurashca tocanacunata tocashpa, Mandaj Diospaj ñaupajpi danzashpandi rinajurca. Paicunaca arpacunata, salteriocunata, panderocunata, gaitacunata, cimbalocunata tocashpami rinajurca.

⁶Nacón shuti runapaj trillana pambaman chayashpaca, huagracuna nitijajpimi Uza shuti runaca, paipaj maquita chutashpa Taita Diospaj arcata charirca.

⁷Chaimandami Mandaj Diosca, Uza shuti runahuanga nina japirinshna, ninanda fiñarirca. Urmanata manllashpa charirishcamandami, Taita Dios huañuchijpi, Taita Diospaj arca ladollapita huañurca.

⁸Uza shuti runata, Mandaj Dios chashna huañuchishcamandami, Davidca ninandapacha llaquirirca. Chaimandami chai pambataca, “Pérez-uza” nishpa shutichirca. Chai pambaca, cunangamanmi chai shutillata.

⁹Chai punllapica Davidca, Mandaj Diosta ninandapacha manllashpami: “Mandaj Diospaj arcataca, ¿imashnata ñucapajman apamushayari?” nirca.

¹⁰Davidca, Mandaj Diospaj arcata paipaj puebloman na apamungapaj munashpami, Gat pueblomanda Obed-edom shuti runapaj huasiman apachun mandarca.

¹¹Mandaj Diospaj arcapash, Gat shuti pueblomanda Obed-edom shuti runapaj huasipica, quimsa quillacamanmi tiajurca. Chaimandami Mandaj Diosca, Obed-edom shuti runatapash, tucui paipaj huasi ucu puratapash bendiciarca.

¹²Cashna nishpami, jatun mandaj Davidman villanajurca: “Obed-edom shuti runapaj huasipi Taita Diospaj arca tiajushcamandami, Mandaj Diosca paipaj huasi ucu puratapash, pai imatalla tucui charishcatapash bendiciashca” ninajurcami. Shina villajpimi Davidca, Obed-edom shuti runapaj huasiman rishpa, Taita Diospaj arcataca, cushijushpa Davidpaj puebloman aparca.

¹³Taita Diospaj arcata apashpa rijcuna suctata pasujhuanmi, paica shuj huagrata, virayashca shuj jari llamata, Diosman cushpa huañuchijurca.

¹⁴Davidca, tucui ushaihuanmi Mandaj Diospaj ñaupajpi danzajurca. Davidca, linota rurashca efod nishcata churajushcami carca.

¹⁵Shinami Davidpash, tucuilla israelcunapash, Mandaj Diospaj arcataca, ninanda cushijushpa caparishpa, trompetacunata huacachishpa apanajurca.

¹⁶Mandaj Diospaj arcapash, Davidpaj puebloman ña chayajpimi, Saulpaj ushi Mical huarmica, ventanamanda chapajurca. Chaimanda chapajushpami, jatun mandaj Davidtaca fahuashpa danzashpa, Mandaj Diospaj ñaupajpi shamujujta ricurca. Chaita ricushpami, paipaj shungupica nalicachirca.

¹⁷Mandaj Diospaj arcataca, David rurachishca carpapimi, maipi churana cashcapillata chaupi ucupi churanajurca. Chaipimi Davidca, Diosman animalcunata cushpa huañuchishpa tucuillata rupachirca. Shinallata paihuan ali cangapaj, shuj caranacunatapashmi, Mandaj Diospaj ñaupajpi carajurca.

¹⁸Diosman cushpa tucuillata rupachinatapash, paihuan ali cangapaj caranacunatapash carashca jipami, Davidca gentecunataca, tucuita Mandaj Diospaj shutipi bendiciarca.

¹⁹Chai jipami tucui gentecunaman, ashtaca tandanajushca tucui israelcunamanga jaricunamambash, huarmicunamambash tucuimanllata shuj tandata, asha fiti aichata, uvasta chaquichishpa rurashca shuj tandata cararca. Shina carajpica, tucuilla gentecuna paicunapaj huasiman rircallami.

²⁰Chai jipami Davidca, paipaj familiacunata bendiciangapaj tigrarca. Mical huarmica, Davidta tuparingapaj llujshishpami, cashna nirca: —¡Cunanga, israelcunata jatun mandajca, paita servij huarmicunapaj, servij jaricunapaj ñaupajpi, maijambash pingai illaj runashna, churajunata llujchirishpa danzajushpaca, alicachi tucushcamari!— nircami.

²¹Shina nijpimi Davidca, Mical huarmitaca cashna nijurca: —Mandaj Diospaj ñaupajpimi danzajurcani. Paimi ñucataca, cambaj taitapaj randi, cambaj tucuilla familiapaj randi, pai Mandaj Dios agllashca israelcunata mandachun churahuarca. Chaimandami, Mandaj Diospaj ñaupajpica danzajushalla.

²²Can nalicachishpa ricuna cajpipash, cunanmandacarin ashtahuanmi imapajpash na valinshna tucusha. Shina cashpapash can nijushcashnami, chai servij huarmicunapaj ñaupajpica, ashtahuan alicachi tucusha— nijurcami.

²³Chaimandami Saulpaj ushi Mical huarmica, pai huañuna punllacaman huahuacunataca na tarirca.