Read Imbabura Highland Quichua 2 SAMUEL 7 Bible Online

2 SAMUEL 7 - Imbabura Highland Quichua bible

2 SAMUEL 7

¹Muyundi llactacunapi causanajuj tucuilla paita fiñajcunamanda Mandaj Dios samachijpimi, jatun mandaj Davidca pai mandashpa tiajuna huasipi causajurca. Chaipimi cashna tucurca:

²Jatun mandaj Davidca, Dios ima nishcata villaj Natán runatami, cashna nirca: —Ricui, ñucaca cunanga cedro caspihuan rurashca huasipimi causajuni. Ashtahuangarin Taita Diospaj arcarami, cortinacunahuan quilpashca chaupipilla tiajun— nircami.

³Shina nijpimi Natán runaca, jatun mandajtaca cashna nirca: —Cambaj shungupi imata yarijushcata rurangapaj rilla, Mandaj Diosca canhuanmi— nircami.

⁴Chai tutallatami, cashna tucurca: Mandaj Diosmi, Natán runaman cai shimicunata, cashna nishpa villajurca:

⁵“Ñucata servij Davidpajman rishpa, cashna nigri: Mandaj Diosca cashnami nin: ‘Ñuca causana huasitaca, ¿canllu shayachina cangui?

⁶Ñucaca, israelcunata Egiptomanda llujchimushca punllamandapacha cunangaman, napacha huasicunapica causashcanichu. Ashtahuangarin yanga carpapi, jatun carpapimi causajurcani.

⁷Tucui israelcunahuan, cai tucui huatacunata purijushpapash, ¿maijan Israel aillutapash imatallapash nishcanichu? Ñuca agllashca israelcunata pushachun, ñuca churashca runacunatapash: ¿Imashpata cedro caspihuan huasita ñucaman na ruranguichi nishpa tapushcanichu?

⁸Cunanga, ñucata servij Davidtaca cashna ningui: Tucuita Mandaj Diosca, cashnami nin: Ñucami, candaca llama corralta cuidanamandapash, llamacunata michishpa catinamandapash llujchishpa, ñuca agllashca israelcunata mandachun churarcani.

⁹Shinallata can maita purijpipash, canhuanmi carcani. Canda ñaupashpa rishpami, canda fiñajcunatapash tucuillata tucuchircani. Candaca, imashnami cai pachapica tucuicuna rijsishca runacuna tian, chashnallatami candapash tucuicuna rijsishca cachun churarcani.

¹⁰Shinallata ñuca agllashca israelcuna causachunga, ñucami shuj llactata agllashpa tarpunshna churasha. Chai llactamandaca, ima horapash pipash na ashtahuan anchuchingachu. Chaipica, nali runacunapash callari punllapishnaca na ashtahuan llaquichingachu.

¹¹Ñuca agllashca israelcunata mandachun juezcunata churashca punllacunamandapachami llaquichinajurca. Cunanga candaca, canda tucui fiñajcunamanda samachishami. Shinallata cambaj huasi ucu purapash, mandajcuna cachun ñucallata churanata can yachachunmi, Mandaj Dios ñucallata villani.

¹²Can huañuna punllacuna chayajpi huañushpa, cambaj taitacunahuan tandanajujpipash, cambaj churicunamanda shujtami, can mandajushca llactapica shinllitapacha churasha.

¹³Paimi, ñuca shutipi mañana huasitaca shayachinga. Shinallata pai mandashpa tiarinatapash, ñucami causaita causaicaman shinllitapacha churasha.

¹⁴Ñucaca, paipaj taitami casha. Paica, ñuca churimi canga. Pai ima nalita rurajpipash, runacuna varahuan llaquichinshnami llaquichisha. Huañuna aichayu runacuna astinshnami llaquichisha.

¹⁵Shina cashpapash ñucaca, paitaca llaquijushallami. Paitaca, Saulta llaquinata saquishcashnaca na saquishachu. Saultaca, cambaj ñaupajpillatami anchuchircani.

¹⁶Shinallata cambaj miraicunapash, can mandajushca llactapash, ima horapash na tucurichunmi, cambaj ñaupajpillata shinllitapacha churasha. Can mandashpa tiarinapash na tucurishpami, causaita causaicaman tianga’ ninmi nigri” nishpami villajurca.

¹⁷Natán runaca, imashna tucuita pai uyashcashnallata, imashna muscuipishna ricushcashnallatami, tucuita chashnatapacha Davidman villarca.

¹⁸Chaita villajpimi jatun mandaj Davidca, Mandaj Diospaj ñaupajman yaicushpa cashna nijurca: “Mandaj Jatun Dioslla. Ñucata caiman pushamungapaca ñucapash, ñuca huasi ucu purapash, ¿imata canchiyari?

¹⁹Mandaj Jatun Dioslla. Chaita rurashami nijushcapash, cambaca ashallami ricurin. Shinallata canda servij ñucapaj huasi ucu puracuna jipa punllacunapi imashna canamandapashmi villachishcangui. Mandaj Jatun Dioslla. ¿Maijan runapash, canshna rurai ushanllu?

²⁰David ñucaca canhuanga, ¿imatata ashtahuan parlai ushapashayari? Mandaj Taita Dioslla, canda servijtaca canllata rijsihuanguimi.

²¹Cai tucui jatun ruranacunataca, can nishcashnallata, cambaj shungupi yarishcashnallata rurashpami, canda servij ñuca yachachunga villahuashcangui.

²²Shina cashcamanda Mandaj Taita Dioslla, canllatami jatunyachi tucushcangui. Shina cashcamanda ñucanchi rinrihuambacha tucuita imashna uyashcashnallata, canshnaca pipash na tianllu.

²³Shinallata cai pachapica, ¿pita can agllashca gentecunashnaca tian? ¿Pita Israel llactashna, shuj llactaca tian? Can Taita Diosllatami, cambaj agllashcacuna cachun, tucui llactacunapi rijsishca cachun llujchimushcangui. Paicunapaj ali cachun jatun manllarinayaicunata rurangapajmi llujchimushcangui. Canga juyashpallami, Egiptomandapash, shuj gentecunapajmandapash, chai gentecunapaj dioscunapajmandapash, cambajlla cachun llujchimushcangui.

²⁴Can agllashca israelcunataca, canmi causaita causaicaman cambajlla cachun churarcangui. Shina churashpami, can Mandaj Diosca, paicunapaj Taita Dios tucurcangui.

²⁵Cunanga, Mandaj Taita Dioslla, canda servij ñucamambash, ñuca miraicunamambash, imatalla rurasha nishcataca, causaita causaicaman shinllitapacha rurapangui. Imaguta can rurasha nijushcatapash rurapailla.

²⁶Cambaj shutica, causaita causaicaman jatunyachi tucushca cachun. Shinallata: ‘Tucuita Mandaj Diosmi, israelcunapaj Taita Dios’ ninajuchun. Canda servij Davidpaj huasi ucu purapash, cambaj ñaupajpica shinlli cachun.

²⁷Tucuita Mandaj, israelcunapaj Taita Dios canllatami, canda servij ñucapaj rinripi uyajta: ‘Cambaj miraicunataca, mandajcuna cachunmi churasha’ nishpa villahuarcangui. Chaimandami canda servij ñucaca, cambaj ñaupajpi cashna mañajungapaca, ñuca shungupi shinlli tucui ushashcani.

²⁸Cunanga, Mandaj Taita Dioslla, canllami Taita Dios cangui. Can imata nishcapash, na llullachu. Chaimandami canda servij ñucamanga, cashna juyaillaguta rurashapacha nihuarcangui.

²⁹Cunanga, canda servij ñucapaj huasi ucu purataca, causaita causaicaman cambaj ñaupajmanda ama anchurichun, alicachishpa bendiciapailla. Mandaj Taita Dios, canllatami shina nircangui. Can bendiciajpimi, canda servij ñucapaj huasi ucu puracunaca, causaita causaicaman bendiciai tucunajunga” nijurcami.