Read Imbabura Highland Quichua 1 REYES 1 Bible Online

1 REYES 1 - Imbabura Highland Quichua bible

1 REYES 1

¹Jatun mandaj Davidca, ña ashtaca huatacunata charij rucugu cajpimi, churajunacunahuan quilpanajun carca. Shina quilpajpipash, na cunujyanllu carca.

²Chaimandami paita servijcunaca, cashna ninajurca: “Jatun mandajpaj ladopi cuidashpa, paipaj ladopi puñushpa paita cunuchijuchunga, jarihuan nara tacarishca chairalla viñai shuj cuitsaguta, ñuca amo jatun mandajman mascaichi. Shina puñujpimi, ñuca amo jatun mandajca cunujyanga” ninajurcami.

³Shina nijpimi, tucuilla Israel llactapica, shuj juyailla cuitsaguta mascashpa, sunamitapura Abisag shuti cuitsaguta tarirca. Paitaca, jatun mandajmanmi apamunajurca.

⁴Chai cuitsaguca, juyaillagumi carca. Paimi, jatun mandajtaca cunujyachishpa servishpa causajurca. Shina cajpipash jatun mandajca, ima horallapash paipica na tacarircachu.

⁵Shinamandami, Haguit shuti huarmipaj churi Adonías runaca: “Ñucami mandana cani” nishpa, jariyashpa purijurca. Shina nishpami carretacunata rurachishpa, caballopi purij soldadocunatapash tandachirca. Paipaj ñaupajpi calpachunga, picha chunga soldadocunatapashmi charirca.

⁶Shina cajpipash paipaj taitaca, ima horallapash paipaj tucui causaipi: “¿Imashpata chashna rurangui?” nishpallapash, na rimashpa llaquichishcachu carca. Adonías runaca, juyailla runami carca. Paitaca, Absalonbaj catimi ungushca carca.

⁷Paica, Sarvia shuti huarmipaj churi Joab runahuan, Abiatar shuti curahuan yachachirishpa, shujlla yuyai tucushcami carca. Paicunami, Adoniastaca ayudan carca.

⁸Shina cajpipash Sadoc shuti curapash, Joiada shuti runapaj churi Benaía shuti runapash, Dios ima nishcata villaj Natanbash, Simei shuti, Rei shuti runacunapash, Davidhuan tiaj tucuilla jatungunapash Adoniastaca na catircachu.

⁹Ashtahuangarin Adonías runaca, Rogel shuti yacu pugyu ladopi tiaj, Zohelet shuti jaca rumi ladopimi llamacunata, huagracunata, ashtahuan virayashca shuj animalcunatapash huañuchishpa, jatun micuita rurajurca. Chai micuimanmi, jatun mandajpaj churi tucuilla paipaj huauquicunata cayarca. Shinallata jatun mandajta servinajuj, Judá llactamanda tucuilla runacunatapashmi cayarca.

¹⁰Shina cayashpapash, Dios ima nishcata villaj Natán runata, Benaía shuti runata, Davidhuan tiaj jatungunata, paipaj huauqui Salomondaca na cayarcachu.

¹¹Chaimandami Natán runaca, Salomonbaj mama Betsabé shuti huarmitaca cashna nijurca: —Ñucanchi amo Davidpash na yachajta, Haguit shuti huarmipaj churi Adonías runa mandajujtaca, ¿nachu uyashcangui?

¹²Ricui, cunanga cambash, cambaj churi Salomonbash ama huañuchi tucungapaca, ali yuyaita ñuca cushcata uyai.

¹³Chai jipaca, jatun mandaj Davidpajman rishpa, cashna nigringui: ‘Ñuca amo jatun mandajlla. ¿Nachu canda servij ñucataca, cashna nishpa juramenturcangui: Ñucapaj catica, cambaj churi Salomonmi, jatun mandaj tucunga. Paimi, ñuca mandashpa tiajushcapica tiaringa nijurcangui? Shina cashpaca, ¿imashpata Adonías runara mandajun?’ nigringui.

¹⁴Jatun mandajhuan can chashna parlajujpillatami, ñucapash canda catishpa yaicumusha. Chaipimi, can imashna nijushcapash chashnapacha cajta villasha— nijurcami.

¹⁵Shina nijpimi Betsabé huarmica, jatun mandaj Davidpaj ucuman yaicurca. Jatun mandajca, ña rucugupachami carca. Shina cajpimi, sunamitapura Abisag shuti cuitsagu servishpa causajurca.

¹⁶Betsabé huarmica, jatun mandajta cazushcata ricuchingapajmi, paipaj ñaupajpi cungurirca. Chaimandami jatun mandajca: —¿Imatata ningui?— nishpa tapurca.

¹⁷Shina tapujpimi Betsabé huarmica, cashna nirca: —Ñucata mandajlla, canda servij ñucamanmi, canda Mandaj Taita Diospaj shutipi, cashna nishpa juramenturcangui: ‘Cambaj churi Salomonmi, ñucapaj catica mandanga. Paimi, ñuca mandashpa tiajushcapica tiaringa’ nircanguimi.

¹⁸Ricui, cunanga Adonías runami mandajun. Chaitaca, ñuca amo can jatun mandajca, cunangaman nara yachapanguica.

¹⁹Paica huagracunatapash, ashtahuan ali virayashca shuj animalcunatapash, ashtaca llamacunatapash huañuchishpami, shuj jatun micuita rurashca. Chai micuimanmi, can jatun mandajpaj tucuilla caishuj churicunatapash, Abiatar shuti curatapash, soldadocunata mandaj Joab runatapash cayashca. Ashtahuangarin canda servij Salomondaca, na cayashcachu.

²⁰Shina cashcamandaca, ñuca amo jatun mandajlla, tucui israelcunami ñuca amo can jatun mandaj mandashpa tiajushcapi cambaj randica, pi mandashpa tiarinatapash villachun, canda shuyanajun.

²¹Can na chashna rurajpica, ñuca amo can jatun mandaj huañushpa, cambaj ñaupa taitacunahuan tandanajugrishca jipami ñucapash, ñuca churi Salomonbash juchachi tucushun— nircami.

²²Jatun mandajhuan Betsabé huarmi chashna parlajujpillatami, Dios ima nishcata villaj Natán runaca ñapash shamurca.

²³Pai ña chayamujpica: “Ricui, Dios ima nishcata villaj Natanmi shamushca” nishpami, jatun mandajman villanajurca. Pai ña yaicushpaca, jatun mandajpaj ñaupajpi cungurishpami, alpaman chayajta urai cumurirca.

²⁴Chai jipami, Natán runaca cashna nirca: —Ñuca amo jatun mandajlla, ¿canllu cashna nircangui?: ‘Ñucapaj catica, Adonías runami jatun mandaj tucunga. Paimi, ñuca mandashpa tiajushcapica tiaringa’ ¿nircangui?

²⁵Cunanmi paica huagracunata, virayashca shuj animalcunata, ashtaca llamacunatapash huañuchishpa, jatun micuita rurangapaj urai rishca. Chai micuimanmi, can jatun mandajpaj tucuilla caishuj churicunata, soldadocunata mandajcunata, shinallata Abiatar shuti curatapash cayashca. Ricui, paicunaca paipaj ñaupajpimi micushpandi, ufiashpandi: ‘¡Jatun mandaj Adonías runaca causajuchunlla!’ nishpa caparinajun.

²⁶Shina cashpapash canda servij ñucata, Sadoc shuti curata, Joiada shuti runapaj churi Benaía shuti runata, canda servij Salomondaca na cayashcachu.

²⁷¿Chashna rurachunga, can jatun mandaj ñuca amollatachu mandarcangui? Can jatun mandaj ñuca amo mandashpa tiajushcapi, cambaj cati maijan tiarina cajtapash, canda servijcunaman ¿na villashpachu chashna rurarcangui?— nircami.

²⁸Shina nijpimi, jatun mandaj Davidca, Betsabé huarmita cayamupaichi nirca. Shina cayajpimi paica, jatun mandajpaj ñaupajman yaicushpa, jatun mandajpaj ñaupajpi shayarirca.

²⁹Chaipimi jatun mandajca, cashna nishpa juramenturca: —Tucui llaquimanda ñuca almata quishpichij, Mandaj Diosca causajumbachami.

³⁰Ñucaca, israelcunata Mandaj Taita Diospaj shutipimi, cashna nishpa juramenturcani: ‘Ñucapaj randica, cambaj churi Salomonmi jatun mandaj tucunga. Paimi, ñuca mandashpa tiajushcapica tiaringa’ nircanimi. Chashna nishcashnallatami, cunanga pactachigrini— nircami.

³¹Shina nijpimi Betsabé huarmica, jatun mandajpaj ñaupajpi cungurishpa, pai jatun mandajta cazushcata ricuchingapaj, alpaman chayajta urai cumurishpa, cashna nirca: —Ñuca amo jatun mandaj Davidca, causaita causaicaman causajuchunlla— nircami.

³²Chai jipami, jatun mandaj Davidca cashna nirca: —Sadoc shuti curata, Dios ima nishcata villaj Natán runata, Joiada shuti runapaj churi Benaía shuti runatapash cayamupaichi— nircami. Shina cayamujpi, paicuna jatun mandajpaj ñaupajman ña yaicujpimi,

³³jatun mandajca cashna nijurca: —Cunanga, cangunapaj amo ñucata servijcunata tandachishpa, ñuca churi Salomondaca, ñuca tiarina mulapi tiachishpa, Gihón shuti pugyuman pushaichi.

³⁴Chaipimi Sadoc curapash, Dios ima nishcata villaj Natanbash Salomondaca, israelcunata jatun mandaj cachun aceiteta talishpa javinga. Shinallata trompetatapash huacachishpa: ‘¡Jatun mandaj Salomonga causajuchunlla!’ nishpa caparinguichi.

³⁵Chai jipaca, paita catiria cangunapash shamunguichi. Pai shamushpami, ñuca mandashpa tiajushcapi tiarishpa, ñucapaj randi mandanga. Paitami Israel llactata, Judá llactata mandaj cachun agllarcani— nijurcami.

³⁶Shina nijpimi, Joiada shuti runapaj churi Benaía runaca, jatun mandajtaca cashna nirca: —Shina cachun. Ñuca amo jatun mandajta Mandaj Taita Diospash, chashnallata nishpami ali canman.

³⁷Mandaj Diosca, imashnami ñuca amo can jatun mandajhuan carca, chashnallata Salomonhuambash cachun. Pai mandanataca, ñuca amo can jatun mandaj David mandajushcatapash ashtahuan yali jatunyachishca cachun— nircami.

³⁸Chai jipaca, Sadoc shuti curapash, Dios ima nishcata villaj Natanbash, Joiada shuti runapaj churi Benaía shuti runapash, cereteo nishca, peleteo nishca runacunapash urai rishpami, Salomondaca jatun mandaj David tiarina mulapi tiachishpa, Gihón shuti pugyuman pushanajurca.

³⁹Chaipica Sadoc shuti curami, Diospaj jatun carpamanda apashca cachupi aceiteta talishpa Salomonda javirca. Chai jipaca, trompetata huacachinajujpimi: “¡Jatun mandaj Salomonga causajuchunlla!” nishpa, tucuicuna caparinajurca.

⁴⁰Chai jipaca, tucuicunami candashpa, gaitacunata tocashpa, ninanda cushijushpa, Salomonda catishpa vichai rinajurca. Alpa mamapash huashajungatashnami, ninandapacha caparinajurca.

⁴¹Adonías runapash, jatun micuiman tucuilla pai cayashcacunapash ña micuita tucuchishca jipami, trompetata huacachijta uyarca. Shina uyashpami, Joab runaca: —¿Imashpata pueblopica, ninanda caparinajun?— nirca.

⁴²Pai shina nijujpillatami, Abiatar shuti curapaj churi Jonatanga ñapash shamurca. Pai chayamujpimi Adonías runaca, cashna nirca: —Yaicumuilla, canga imatapash na manllaj runami cangui. Canga, ali villanatami apamujungui— nirca.

⁴³Shina nijpimi Jonatanga, Adoniastaca cashna nijurca: —Na llullashpami nini. Ñucanchipaj amo jatun mandaj Davidca, Salomondami jatun mandaj cachun churarca.

⁴⁴Pai jatun mandajca, Sadoc shuti curata, Dios ima nishcata villaj Natán runata, Joiada shuti runapaj churi Benaía runata, cereteo nishca, peleteo nishca runacunatapashmi, Salomonhuan cacharca. Paicunami Salomondaca, jatun mandajpaj mulapi tiachirca.

⁴⁵Shinallata Sadoc shuti curahuan, Dios ima nishcata villaj Natán runahuanga, Gihón shuti pugyu ladopimi Salomondaca, jatun mandaj cachun aceiteta talishpa javirca. Chaimandami paicunaca, ninanda cushijushpa vichai rirca. Pueblopipash ninandami caparinajun. Chai caparinajujtami, cangunaca uyashcanguichi.

⁴⁶Shinallata Salomonbashmi, mandangapaj tiarinapica ña tiarirca.

⁴⁷Jatun mandajta servijcunapashmi, ñucanchi amo jatun mandaj Davidta, cashna nishpa bendiciangapaj shamunajurca: ‘Taita Diosca, Salomonbaj shutitaca, cambaj shutitapash ashtahuan yali rijsinajuchun rurashpami ali capanman. Shinallata pai mandanatapash, can mandajushcataca ashtahuan yali jatunyachishpami ali capanman’ ningapajmi shamunajurca. Chaimandami jatun mandajca, paipaj camapillata Diosta ninanda alicachijurca.

⁴⁸Jatun mandajca, cashnatapashmi nirca: ‘Israelcunata Mandaj Taita Diosca, alicachi tucujuchunlla. Cunanga, paimi ñuca mandashpa tiajushcapi tiarichunga, ñuca ñavihuambacha ricujta churashca’ nircami— nijurcami.

⁴⁹Chashna villajpimi micuiman Adonías runa cayashcacunaca, manllarishpa chujchunajurca. Chaimandami, paicunaca jatarishpa tucuicuna paicunapaj ñanda japishpa rinajurca.

⁵⁰Ashtahuangarin Adonías runaca, Salomonda ricunata manllashpami, jatarishpa Diospaj carpaman rishpa, chaipi tiajuj altar cachucunapi charirirca.

⁵¹Chaitami cashna nishpa, Salomonman villanajurca: —Adonías runaca, can jatun mandaj Salomonda manllashpami, altar cachucunapi charirishpa cashna nijun: ‘Jatun mandaj Salomonlla. Canda servij ñucataca, espadahuan na huañuchishachu nishpa, cunanda juramentuhuayari’ nijunmi— ninajurcami.

⁵²Shina villajpimi Salomonga, cashna nirca: —Pai alita ruraj runa cajpica, paipaj umamandaca shuj ajchallapash na urmangachu. Ashtahuangarin nalita pai rurashca ricurijpica, huañungapachami— nircami.

⁵³Jatun mandaj Salomón, Adonías runata pushamuchun cachajpimi, altar ladomanda pushamurca. Adonías runa ña chayamushpami, jatun mandaj Salomonbaj ñaupajpi urai cumurirca. Chaipimi Salomonga: —Cambaj huasiman rilla— nishpa cacharca.