Read Imbabura Highland Quichua 1 REYES 10 Bible Online

1 REYES 10 - Imbabura Highland Quichua bible

1 REYES 10

¹Sabá shuti llactata jatun mandaj huarmica, Salomondaca Mandaj Diospaj shutimanda tucuicuna alicachishpa parlanajujta uyashpami, na tigrachi ushanalla tapunacunata tapushpa yachangapaj shamurca.

²Chai huarmica, ashtaca gentecunata catichishpami, Jerusalenman shamurca. Paica, mishquillagu ashnajuj jambicunata, ashtaca orota, juyailla rumigucunata, camellocunapi apachishpami shamurca. Salomonbajman chayamushpaca, paipaj shungupi tucui imatalla yarijushcatami, tucuita tapujurca.

³Salomonga, chai huarmi tapushcataca tucuitami tigrachijurca. Jatun mandaj na tigrachi ushanaca, imallapash na tiarcachu.

⁴Sabá shuti llactata jatun mandaj huarmica, Salomonbaj tucui ali yachaitapash, paipaj huasita shayachishcatapashmi ricujurca.

⁵Shinallata paipaj mezapi micunatapash, paita servijcuna causana ucucunatapash, chai servijcuna churajushcatapash, paiman micunata yalichijcunatapashmi ricujurca. Shinallata Mandaj Diospaj huasipi animalcunata cushpa tucuillata rupachijtapashmi ricujurca. Chaita ricushpami, ninanda manllarishpa ricunman quedarca.

⁶Chaimandami jatun mandajtaca, cashna nijurca: “Ñuca llactapi cashpallatami, can imata rurashcacunatapash, can alipacha yachajushcatapash uyarcani. Chaica, na llullachu cashca.

⁷Ashtahuangarin ñuca caiman nara shamushpaca, na crijurcanichu. Ñuca ñavihuambacha cunan ricujpicarin, chaupitallapash na parlahuashcachu. Can alipacha yachajushca cajta, ninan charij cajta tucuicuna parlanajushcataca, ashtahuan yalitami ricujuni.

⁸Cambaj runacunaca, ninanda cushijushcami. Cambaj ali yachaita cambaj ñaupajpi, punllandi uyaj canda servij cai runacunaca ninanda cushijushcami.

⁹Canda Mandaj Taita Diosca, alicachi tucushca cachun. Paica, canda alicachishpami, israelcunata mandashpa tiarinapi churashca. Mandaj Diosca, israelcunata juyajujlla cashpami, candaca jatun mandaj cachun churashca. Tucuicunapaj alita rurashpa, imatapash cashcatapacha rurashpa mandachunmi churashca” nijurcami.

¹⁰Shina nishca jipami, chai huarmica, pusaj chunga shuj quintal chaupi yalita pezaj orota, mishquillagu ashnajuj ashtaca jambicunata, juyailla rumigucunata, jatun mandajman cararca. Sabá shuti llactata jatun mandaj huarmi, jatun mandaj Salomonman, mishquillagu ashnajuj jambita ashtacata carangapaj apamushcashnaca, ima horallapash nara apamurcachu.

¹¹Hiram runapaj jatun barcocunami, Ofir shuti llactamanda orota apamushca carca. Chai barcocunallatami, sándalo nishca caspicunatapash, juyailla rumicunatapash, chai Ofir shuti llactamanda apamurca.

¹²Chai sándalo caspicunahuanmi, jatun mandaj Salomonga, Mandaj Diospaj huasipipash, mandana huasicunapipash balaustre nishcacunata rurarca. Candajcunaman arpacunata, salteriocunatapashmi rurachirca. Chashna ashtaca sándalo caspicunataca, ima horallapash na apamushcachu carca. Cunangamambash, chashnataca nara ricushcachu.

¹³Jatun mandaj Salomonga, tucui imatalla pai carashca jahuapash, Sabá llactata jatun mandaj huarmi tucui imata munashcata, imata mañashcatami cararca. Chai jipami chai huarmica, paita servij runacunandi paipaj llactaman tigrarca.

¹⁴Huatapi huatapi impuestota Salomón japishpaca, chuscu patsaj picha chunga ishcai quintal, chuscu chunga chuscu kilo orotami japijurca.

¹⁵Randishpa jatushpa causajcuna, mishquillagu ashnajuj jambicunata caru llactamanda apamushpa jatujcuna, Arabia llactata tucui jatun mandajcuna, pai mandajuj llactapi churashca mandajcuna cushcacunatacarin, na cuentashcami carca.

¹⁶Jatun mandaj Salomonga, ishcai patsaj jatun escudocunatami, orota tacashpa rurachirca. Chai escudocunapica, tucui escudopimi, sucta kilo chaupi yalita pezaj orota churarca.

¹⁷Shinallata quimsa patsaj escudocunatapashmi, orota tacashpa rurachirca. Chaicunapica cada escudopimi, quimsa libra orota churarca. Chaicunataca jatun mandajca, Líbano urcu caspicunahuan rurashca huasipimi alichirca.

¹⁸Jatun mandajca, mandangapaj tiarinatapash marfilhuanmi rurachirca. Chaitaca, ashtahuan ali orohuanmi jahualla quilparca.

¹⁹Chai tiarinaman vitsiangapaca, sucta gradasmi tiarca. Chai tiarina huashapica, redondollata rurashca jatunmi carca. Rigrata samachishpa tiajungapajpash, ishcandi ladomanmi rurashca carca. Chai samachina ishcandi ladocunapica, leongunata rurashpami shayachishca carca.

²⁰Chai sucta gradaspipash, chunga ishcai leongunatami, tucui gradaspi ishcandi ladoman shuj shuj churashca carca. Chashna tiarinataca, maijan mandajuj llactapillapash na rurashcachu carca.

²¹Jatun mandaj Salomón ufiana tucuilla vasocunapash, orota rurashcami carca. Shinallata Líbano urcu caspicunahuan shayachishca huasipi tiaj tucui platocunapash, ashtahuan ali orota rurashcami carca. Salomón mandajui punllacunapica, culquitaca na munanllu carca. Chaimandami culquitaca, imatallapash na rurachirca.

²²Jatun mandaj Salomonga, Tarsis pueblomanda paipaj jatun barcocunatami, Hiram runapaj barcocunahuan mama cuchapi charirca. Chai barcocunapica, Tarsis pueblomanda orota, culquita, marfilta, monocunata, pavo realcunata apamushpami, quimsa huatapi muyunajun carca.

²³Chashnami jatun mandaj Salomonga, charij canapipash, ashtahuan alipacha yachajushca canapipash, shuj llactacunata jatun mandajcunataca, tucuita yali carca.

²⁴Tucui llactacunapi causajcunami, Salomonbaj ñavita ricungapaj munan carca. Paipaj shungupi ali yachaita Taita Dios carashcahuan parlajta uyangapajmi, chashna munan carca.

²⁵Tucuicunami paiman carangapaca, orota, culquita rurashca juyailla charishcacunata, churajunacunata, macanajunacunata, mishquillagu ashnajuj jambicunata, caballocunata, jari mulacunata, huatapi huatapi apamunajun carca.

²⁶Salomonga, macanajuna carretacunata, caballopi tiarij soldadocunatami tandachirca. Paica, huaranga chuscu patsaj carretacunata, caballocunapi tiarij chunga ishcai huaranga soldadocunatami charirca. Paicunatami huaquingunataca, macanajuna carretacunata alichishca pueblocunapi, shujcunataca pai jatun mandajpaj ladopi, Jerusalenbi churarca.

²⁷Jatun mandaj Salomonga, culquitaca rumitashnami Jerusalenbica charirca. Cedro caspicunatapash, Sefela pambacunapi tiaj sacha jigos yuracunatashnami ashtacatapacha charirca.

²⁸Caballocunata, telacunataca, Egiptomandami Salomonman apamunajun carca. Jatun mandaj Salomón cachashca, tandanajushca runacunallatami, caballocunata, telacunata randishpa apamunajun carca. Paicunaca, randishpa jatushpa purijcunami carca.

²⁹Egiptomandaca, shuj carretatallami, sucta patsaj culquipaj randishpa apamunajun carca. Caballotaca, patsaj picha chunga culquipajmi randinajun carca. Salomonbaj chai runacunallatami, heteocunata jatun mandajcunamambash, Siria llactata jatun mandajcunamambash jatunajurca.