Read Imbabura Highland Quichua 1 REYES 12 Bible Online

1 REYES 12 - Imbabura Highland Quichua bible

1 REYES 12

¹Jatun mandaj cachun Roboam runata churangapajmi, tucui israelcuna Siquem shuti puebloman shamushca carca. Chaimandami Roboam runaca, chai Siquem shuti puebloman rirca.

²Chaipimi cashna tucurca: Nabat shuti runapaj churi Jeroboam runaca, Egiptopi cashpa chaita yachashpami, Egiptomanda tigramurca. Paica, jatun mandaj Salomonbaj ñaupajmanda pacajushpa rishcami, Egiptopi causajurca.

³Chaipi causajujtami cayachun cacharca. Shina cayajpi shamushpami Jeroboam runapash, tandanajushca tucui israelcunapash, Roboam runataca cashna ninajurca:

⁴—Yugota aparishcashna llaquita apanajujpipash, cambaj taitaca, ashtahuanmi ñucanchitaca llaquichirca. Ashtahuangarin cunanga, llasha yugota apachinshna, cambaj taita shinllita servichishpa charishcamandaca, canga ashallatapash fangallayachiyari. Chashna rurajpica, canda servishpami causashun— ninajurcami.

⁵Shina ninajujpimi Roboam runaca, cashna nirca: —Cunanga richilla, cunanmanda quimsa punllacaman ñucapajman tigramunguichi— nijpimi, gentecunaca rinajurca.

⁶Chai jipami, jatun mandaj Roboam runaca, paipaj taita Salomón causajujpi, servishpa causanajushca mandaj rucucunataca, yuyaita cuchun mañashpa cashna tapurca: —Cai gentecunataca, ¿ima nishpa tigrachishpata ali canman, cangunaca ima yuyaitata cuhuanguichi?— nircami.

⁷Shina nijpimi paicunaca, cashna ninajurca: —Cunanga, cai gentecunata servingapaj munashpa paicunata servishpa, juyailla shimicunahuan parlajpica paicunapash, paicunapaj tucui causaipimi, canda servishpa causanga— ninajurcami.

⁸Ashtahuangarin paica, chai mandaj rucucuna cushca yuyaitaca saquishpami, paihuanllata viñashca, paipaj ñaupajpi servij chairalla runacunatara, yuyaita cuhuaichi nishpa mañarca.

⁹Paicunataca cashnami nirca: —Ñucataca cashnami ninajuhuarca: ‘Cambaj taita ñucanchiman llasha yugota apachinshna, shinllita servichishpa charishcamandaca, ashallatapash fangallayachi’ ninajuhuarcami. Shina ningapaj shamuj gentecunataca, ¿ima nishpa tigrachishpata ali canman, cangunaca ima yuyaitata cuhuanguichi?— nircami.

¹⁰Shina nijpimi, Roboam runahuan viñashca, chairalla runacunaca, cashna nishpa tigrachinajurca: —‘Yugota aparishcashna llaquita apanajujpipash, cambaj taitaca ashtahuanmi ñucanchitaca llaquichirca. Ashtahuangarin canga, ashallatapash fangallayachiyari’ ningapaj shamuj gentecunataca, cashna ningui: ‘Ñucapaj uchilla dedoca, ñuca taitapaj huasha lomotapash yali racumi.

¹¹Ñuca taitaca llasha yugota apachinshnami llaquichijurca. Shina cashcamanda ñucacarin, ashtahuanmi chai yugotaca llashayachisha. Ñuca taitaca, azialcunahuanmi astishpa llaquichijurca. Ñucacarin, alacrangunahuanmi llaquichisha’ ningui— ninajurcami.

¹²Jatun mandaj Roboam runaca: “Quimsa punlla tucujpi ñucapajman tigramunguichi” nishcami carca. Shina nishcashnallatami, ña quimsa punlla tucujpica Jeroboam runaca, tucui gentecunandi, Roboam runapajman shamurca.

¹³Shina shamujpimi, jatun mandaj Roboam runaca, mandaj rucucuna nishcataca yangapi churashpa, shinllitapacha rimarca.

¹⁴Chai huambracuna yuyaita cushcashnallatami, cashna nishpa rimarca: “Ñuca taitaca, llasha yugota apachinshnami llaquichirca. Ashtahuangarin ñucaca chai yugotaca, ashtahuanmi llashayachisha. Ñuca taitaca, azialcunahuan astishpami llaquichirca. Ñucacarin, alacrangunahuanmi llaquichisha” nircami.

¹⁵Jatun mandajca, israelcuna mañashcataca na uyanayachircachu. Mandaj Diosllatami, chashna rurarca. Mandaj Diosca, Silo shuti pueblopi causajuj Ahías runaguhuan, Nabat runapaj churi Jeroboam runaman villachishca pactachunmi, chashna rurarca.

¹⁶Tucui israelcunaca, paicuna mañashcata jatun mandaj na uyanayachijpimi, cashna ninajurca: “Davidmandaca, ¿imatallapash japinachu canchi? Isaí runapaj churimandaca, imata japinatapash na charishpami causanchi. ¡Israelcuna, cangunapaj carpacunaman richilla! ¡David, cunanga cambaj huasi ucu puracunata ricunguilla!” ninajurcami. Shina nishpami israelcunaca, paicunapaj carpacunaman rinajurca.

¹⁷Ashtahuangarin Roboam runaca, Judá llactapi tiaj pueblocunapi causanajuj israelcunatallami mandajurca.

¹⁸Jatun mandaj Roboam runaca, tributota japij Adoram shuti runatami, israelcunapajman cacharca. Ashtahuangarin paica, tucuilla israelcuna rumicunahuan pegajpimi huañurca. Chaimandami jatun mandaj Roboam runaca, shuj carretapi ucha vitsiashpa, Jerusalenman pacajushpa rirca.

¹⁹Chashnami israelcunaca, Davidpaj huasi ucu puramandaca shicanyanajurca. Cunangamanmi chashnallata causanajun.

²⁰Chai jipami, cashna tucurca: Jeroboam runa Egiptomanda tigramushcata tucui israelcuna yachashpami, paicuna tandanajushcaman cayachun cacharca. Chaipimi, tucui israelcunata jatun mandaj cachun churanajurca. Israel aillu puramandaca, Davidpaj miraicuna mandajujtaca, shujllapash na catircachu. Judá aillu runacunallami catinajurca.

²¹Roboam runa Jerusalenman shamushpaca, israelcunahuan macanajungapajmi, Judapaj tucui aillumandapash, Benjamín aillumandapash, macanajunata ali yachaj, patsaj pusaj chunga huaranga agllashca soldacocunata tandachirca. Salomonbaj churi Roboam runaca, pai mandajushca llactata cutin paipajman tigrachingapajmi, chashna rurajurca.

²²Ashtahuangarin Mandaj Diosca, pai Taita Diospaj Semaías shuti runagumanmi, cai shimicunata cashna nishpa villarca:

²³“Salomonbaj churi, Judá llactata jatun mandaj Roboam runatapash, Judapaj, Benjaminbaj tucui aillucunatapash, tucui gentecunatapash cashna nigri:

²⁴Mandaj Diosca, cashnami nin: ‘Cangunapaj huauqui israelcunahuanga, na macanajungapaj rinachu canguichi. Cangunapaj huasicunaman tucuilla tigraichilla. Caitaca, ñucallatami chashna rurajuni’ ninmi nigri” nircami. Paicunaca, Taita Dios mandashcata uyashpami, Mandaj Dios mandashcashnallata tigranajurca.

²⁵Chai jipami, Jeroboam runaca, Efraín shuti urcupi tiaj Siquem shuti pueblota cutin alichishpa, chaipi causajurca. Chaimanda llujshishpaca, Penuel shuti pueblotapashmi cutin alichirca.

²⁶Chai jipami Jeroboam runaca, paipaj shungupica cashna yajurca: “Cunanga, ñuca mandajuj cai llactaca, cutinmi Davidpaj huasi ucu purapajmanllata tigranga.

²⁷Cai israelcunaca, Mandaj Diospaj huasipimi, animalcunata Diosman cushpa huañuchingapaj Jerusalenman vichai rinajunga. Chashna vichai rinajushpaca, cai gentecunaca Judá llactata jatun mandaj paicunapaj amo Roboam runapajman tigrarinatami, paicunapaj shungupica yarinajunga. Chashnashpaca ñucata huañuchishpami, Judá llactata jatun mandaj Roboam runapajman tigranajunga” yajurcami.

²⁸Chashna yarijushcata shujcunaman parlajpi, yuyaita cujpimi, jatun mandaj Jeroboam runaca, orota rurashca ishcai shicucunata rurashpa, israelcunataca cashna nijurca: “Cangunaca, ashtacacunami Jerusalenman vichai rinajunguichi. Ricuichi, cangunapaj dioscunaca caipimi. Paicunami cangunataca, Egipto llactamanda llujchimurca” nijurcami.

²⁹Chai shicucunataca shujtaca, Bet-el shuti pueblopi, caishujtaca Dan shuti pueblopimi churarca.

³⁰Chaicunahuanmi israelcunaca, juchata rurarca. Paicunaca ninanda alicachingapajmi, caishuj shicupaj ñaupajman, Dan shuti pueblocaman rinajurca.

³¹Shinallata Jeroboam runaca, chai dioscunapaj huasicunata lomacunapi rurashpami, na Leví runapaj miraipura cajpipash, yangalla gentecunamanda agllashpa churarca.

³²Chai huatapaj pusaj quilla chunga picha punllapimi Jeroboam runaca, Judá llactapi jatun fiestata rurashcashnallata, jatun fiestata rurashpa callarichirca. Shinallata shuj altar jahuapimi, animalta cushpa huañuchirca. Paica, chashnami Bet-el pueblopica, pai rurachishca shicucunaman animalcunata cushpa huañuchirca. Shinallata rurashcalla dioscunata mañangapaj, Bet-el pueblo lomacunapi pai rurashca huasicunapipashmi curacunata churarca.

³³Jeroboam runaca, Bet-el pueblopi pai rurashca altar jahuapimi, animalta cushpa huañuchirca. Paica, pusaj quilla chunga picha punllapimi, chashna rurajurca. Chai quillapimi paipaj shungupi yarishpalla, israelcunaman jatun fiestata rurarca. Shinallata inciensota cushnichingapajmi, altarman vichai rirca.