Read Imbabura Highland Quichua 1 REYES 13 Bible Online

1 REYES 13 - Imbabura Highland Quichua bible

1 REYES 13

¹Ricuichi, Dios ima nishcata villaj shuj runagumi, Mandaj Dios cachamujpi, Judá llactamanda Bet-el shuti puebloman shamurca. Inciensota cushnichingapaj altar ladopi Jeroboam runa shayajujpimi, paica shamurca.

²Paica, Mandaj Dios mandajpimi chai altarta fiñashpa, cashna nishpa caparirca: “Altar, altar. Mandaj Diosca, cashnami nin: ‘Cunanga, Davidpaj huasi ucu puramandami, Josías shuti shuj huahua huacharinga. Lomacunapi tiaj, cambaj jahuapi inciensota cushnichij curacunataca, paimi cambaj jahuapillata huañuchinga. Runacunapaj tullucunatapash, cambaj jahuapillatami rupachinajunga’ ninmi” nircami.

³Chai punllallatami, shuj ricuchinata ricuchishpa cashna nirca: “Mandaj Dios rimashca shimi pactanataca, cashna rurashpami ricuchigrini: Ricui, cai altarca faquirigrinmi. Chai jahuapi tiajuj uchufapash talirigrinmi” nircami.

⁴Bet-el shuti pueblopi tiaj altarca faquiringami, nishpa, Taita Diospaj runagu caparijtami, jatun mandaj Jeroboam runaca, altar ladopi shayajushpa uyarca. Chaimandami, paipaj maquita chutashpa ricuchishpaca: “¡Chai runata japichi!” nirca. Ashtahuangarin chutashpa ricuchishca maquica chaquijpimi, cutin cuyuchitaca na usharca.

⁵Shinallata altarpash faquirijpimi, chai altar jahuapi tiajuj uchufapash talirirca. Mandaj Dios mandajpi, Taita Diospaj runagu shuj ricuchinata ricuchishpa villashcashnallatami, chashna tucurca.

⁶Chaimandami jatun mandajca, Taita Diospaj runagutaca: —Ñuca maqui ali tucuchun, canda Mandaj Taita Diospaj ñaupajpi ñucamanda ninanda mañapai— nirca. Shina nijpimi Taita Diospaj runaguca, Mandaj Diosta mañarca. Shina mañajpimi, jatun mandajpaj maquica ali tucushpa, punda ali cashcashnallata quedarca.

⁷Chai jipami jatun mandajca, Taita Diospaj runagutaca cashna nirca: —Ñuca huasipi micunaguta micungapaj ripashun. Imagutallapash carangapajmi munapani— nircami.

⁸Ashtahuangarin Taita Diospaj runaguca, jatun mandajtaca cashnami nirca: —Cambaj huasipi ima tiashcata chaupita carana cajpipash, canhuanga na rishachu. Cai llactapica, imatallapash na micushachu, yacutallapash na ufiashachu.

⁹Mandaj Diosmi ñucataca, cashna rimashpa mandahuarca: ‘Imatallapash ama micunguichu, yacutallapash ama ufianguichu. Can rishca ñandallapash, ama tigramunguichu’ nihuarcami— nircami.

¹⁰Shina nishpami, paica shuj ñanda tigrashpa rirca. Bet-el puebloman, maijan ñanda shamushcataca na tigrarcachu.

¹¹Bet-el shuti pueblopimi, Dios ima nishcata villaj shuj rucu runagu causajurca. Chai runagumanmi, paipaj churi shamushpaca, Taita Diospaj runagu, Bet-el pueblopi chai punlla imatalla rurashcata tucuita villarca. Shinallata jatun mandajta imatalla nishcatapashmi, paipaj taitaman villanajurca.

¹²Shina villajpimi, paipaj taitaca: —¿Maijan ñandata rirca?— nishpa tapurca. Shina tapujpimi paipaj churicunaca, Judá llactamanda shamushca, Taita Diospaj runagu maijan ñanda tigrashcatapash ricuchinajurca.

¹³Chaimandami, paipaj churicunataca: —Tiarinata burropi churapaichi— nishpa mandarca. Chai tiarinata paicuna ña churajpimi, paica burropi tiarirca.

¹⁴Shina tiarishpami, Taita Diospaj runaguta catishpa rishpaca, encina nishca quiru ucupi tiajujta japigrirca. Chaipi tiajujpi chayashpami: —¿Canllu Judá llactamanda shamushca, Taita Diospaj runagu cangui?— nishpa tapurca. Shina tapujpimi: —Ari, ñucami cani— nirca.

¹⁵Shina nijpimi: —Ñuca huasipi micunaguta micungapaj ripashun— nirca.

¹⁶Ashtahuangarin chai runaguca, cashnami nirca: —Canhuan tigrashpa ritaca na ushanichu, canhuanga napacha rishachu. Cai llactapica, canhuanga imatallapash na micushachu, yacutallapash na ufiashachu.

¹⁷Taita Diosca, cashna nishpami mandahuarca: ‘Chai llactapica, imatallapash ama micunguichu, yacutallapash ama ufianguichu. Can rishca ñandallapash ama tigramunguichu’ nishpami mandahuarca— nircami.

¹⁸Shina nijpimi chaishuj runaca, llullashpalla cashna nirca: —Ñucapash canshnallata, Dios ima nishcata villaj runami cani. Mandaj Dios cachamujpi, shuj ángel shamushpami: ‘Tandaguta micuchun, yacutapash ufiachun, cambaj huasiman pushamugri’ nihuarca— nircami.

¹⁹Shina nijpimi paihuan tigrashpaca, paipaj huasipi micunata micushpa, yacutapash ufiarca.

²⁰Mezapi micushpa ña tianajujpimi, cashna tucurca: Dios ima nishcata villaj chai tigrachimuj runatami, Mandaj Diosca rimarca.

²¹Shina rimajpimi, Judá llactamanda shamushca, Dios ima nishcata villaj runataca, caparishpa cashna nirca: —Mandaj Diosca, cashnami nin: ‘Mandaj Dios mandashcataca, na cazushcanguichu. Canda Mandaj Taita Dios mandashcataca na pactachishcanguichu.

²²Ashtahuangarin chai llactapica, micunatapash ama micunguichu, yacutapash ama ufianguichu nishpa, Mandaj Dios villashca pushtuman tigramushpami, micunatapash micushcangui, yacutapash ufiashcangui. Chaimandami can huañushpaca, cambaj ñaupa taitacunata pambashca utujupica, na pambai tucungui’ ninmi— nircami.

²³Diospaj runagu micushpa, ufiashpa ña tucuchijpimi, tigrachimuj runaca, tiarinata burropi churarca.

²⁴Chai burropi tiarishpa rijujpimi, shuj león ñambi tuparishpa huañuchirca. Ñambi pai huañushca sirijujpimi burropash, leonbash chai huañushcapaj ladopi sirinajurca.

²⁵Shuj runacuna chai ñanda yalinajushpami, huañushca sirijujtapash, chai huañushcapaj ladopi león sirijujtapash ricunajurca. Shina ricushpami, Dios ima nishcata villaj rucu runagu causajuj puebloman shamushpa villanajurca.

²⁶Ñanmanda tigrachimuj, Dios ima nishcata villaj runa uyashpami, cashna nirca: “Taita Diospaj runagumi canga. Paica, Mandaj Dios mandashcatami na cazushca. Chaimandami Mandaj Diosca, shuj leonman cushcanga. Chai leonmi, Mandaj Dios imashna nishcashnallata, ñutushpa huañuchishcanga” nircami.

²⁷Chai jipami, paipaj churicunataca: “Tiarinata shuj burropi churaichi” nijpi, paicunaca tiarinata churarca.

²⁸Chai burropi pai rishpami, Diospaj runagutaca, ñambi huañushca sirijujta tarigrirca. Shinallata burropash, leonbash chai huañushcapaj ladopillatami carca. Leonga huañuchishpapash, na micushcachu carca, burrotapash nimata na rurashcachu carca.

²⁹Shinamandami, Dios ima nishcata villaj runaca, Taita Diospaj runagu huañushcataca, burropi apachishpa aparca. Dios ima nishcata villaj rucu runaca, yarishpa yarishpa huacashpa pambangapajmi, puebloman shamurca.

³⁰Paita pambachun rurachishca utujupi ña pambashpami: “¡Aij, ñuca huauquigulla!” nishpa, yarishpa yarishpa huacanajurca.

³¹Chashna pambashca jipami, paipaj churicunataca cashna nirca: —Ñuca huañujpica, Taita Diospaj runaguta pambashca utujupillata pambahuanguichi. Ñuca tullucunataca, paipaj tullu ladopillata churapanguichi.

³²Mandaj Dios rimashca shimita pai caparishpa villashcapash pactangapachami. Paica, cashna nishpami villashca: ‘Bet-el shuti pueblopi tiaj altarpash, Samaria llacta pueblocunapaj lomacunapi tiaj tucui altarcunapash urmangami’ nishpami villashca— nircami.

³³Chashna tucunata yachashpapash Jeroboam runaca, pai nalita rurashpa causajushcataca, na saquircachu. Ashtahuangarin rurashcalla dioscunaman lomacunapi tiaj altarcunapi curacuna cachunmi, Israel puramanda agllashpa churarca. Paica, maijambash chai munaita charijtaca, lomacunapi tiaj altarcunapi cura cachun churanllami carca.

³⁴Chashnami Jeroboam runaca, juchata rurarca. Chaimandami paipaj huasi ucu puracunaca, cai pachamanda anchuchi tucushpa chingachi tucunajurca.