Read Imbabura Highland Quichua 1 REYES 14 Bible Online

1 REYES 14 - Imbabura Highland Quichua bible

1 REYES 14

¹Chai huatacunapimi, Jeroboam runapaj churi Abías runaca ungushpa, huañunalla carca.

²Chaimandami Jeroboam runaca, paipaj huarmitaca cashna nirca: —Ñuca huarmi cajta ama rijsichunga, shuj churajunata churajushpa, jatarishpa Silo shuti puebloman ri. Dios ima nishcata villaj Ahías runaca, chaipimi causan. Cai llactapi jatun mandaj tucunataca, paimi villahuarca.

³Paiman carangapaca, chunga tandata, mishqui tandata, balun mishquitapash, mangapi apashpa paipajman ri. Paimi, cai huahua ima tucunataca villanga— nircami.

⁴Jeroboam runapaj huarmica, tucuita chashna rurashpami jatarishpa, Silo shuti puebloman shamushpa, Ahías runapaj huasiman shamurca. Ahías runaca, ña rucu rucugu cashpami, paipaj ñavi amsayajpi, na ali ricui ushajurca.

⁵Ashtahuangarin Mandaj Diosmi, Ahías runataca cashna nishca carca: “Uyai, Jeroboam runapaj huarmimi, paipaj huañujuj huahua ima tucunata tapuj shamunga. Pai shamujpica, cashna chashna nishpa tigrachingui. Paita ama rijsichunga, shuj churajunata churajushpami shamunga” nishcami carca.

⁶Huasi punguta chai huarmi yaicumujujta Ahías runa uyashpami, cashna nirca: —Jeroboam runapaj huarmi, yaicumuilla. ¿Imashpata shuj huarmishnalla tucushpa shamungui? Ricui, ñucami ninan llaqui tucunata canman villachun cachamushca runa cani.

⁷Jeroboam runapajman rishpa, cashna villagri: Israelcunata Mandaj Taita Diosca cashnami nin: ‘Ñucami candaca, israelcunapaj chaupimanda agllashpa, ñuca agllashca israelcunata mandaj cachun churarcani.

⁸Davidpaj huasi ucu puracuna mandanata quichushpami, canman curcani. Canga, na ñucata servij Davidshna canguichu. Davidca, ñuca mandashcacunata pactachishpami, tucui shungu cazushpa ñuca ñaupajpi alitalla rurashpa causajurca.

⁹Ashtahuangarin canga, cambaj punda taitacunatapash, tucuita yalimi nalita rurashcangui. Canga, shuj dioscunata rurangapaj rishpami, orota yacuyachishpa imamambash rijchajcunata rurashpa, ñucata fiñachihuangui. Chashna rurashpami ñucataca, huashaman saquihuangui.

¹⁰Chaimandami Jeroboam runapaj huasi ucu purapica, jatun llaquita cachamugrini. Jeroboam runapaj miraicunataca servij cachun, na servishpa causaj cachumbash tucui jaricunatami, Israel puramandaca tucuchisha. Jeroboam runapaj huasi ucu puramanda miraicunataca, shujllatapash na saquishpami, huanuta fichashpa shitanshna tucuillata tucuchisha.

¹¹Jeroboam runapaj mirai puramanda pueblopi huañujpica, alcucunami micunga. Maijambash pambapi huañujpica, jahuata rij alasyu animalcunami micunga. Mandaj Diosmi chashna nishca’ ninmi nishpa villangui.

¹²Canga jatarishpa, cambaj huasiman rilla. Puebloman can chayajhuanmi, huahuaca huañunga.

¹³Paitaca, tucui israelcunami, yarishpa yarishpa huacashpa pambanajunga. Jeroboam runapaj mirai puramandaca, paillami israelcunata Mandaj Taita Diospaj ñaupajpica, ashallatapash ali ricurishca. Shina cashcamanda Jeroboam runapaj huasi ucu puramandaca, paillami pambai tucunga.

¹⁴Israelcunata paipaj randi mandachunga, shuj jatun mandajtami Mandaj Diosca churanga. Paimi, Jeroboam runapaj huasi ucu purataca, cai punllallata tucuchinga. Chaitaca, cunanllatami ruranga.

¹⁵Mandaj Diosca, yacu manñapi cuyurinajuj totoratashnami, israelcunataca caiman chaiman cuyuchijunga. Paimi israelcunataca, paicunapaj ñaupa taitacunaman cushca ali llactamanda llujchishpa, Eufrates yacu chimba ladocunaman, caiman chaiman cachanga. Asera shuti huarmi diosman rijchajcunata rurashpa, Mandaj Diosta fiñachishcamandami, chashna ruranga.

¹⁶Jeroboam runaca, juchata rurashpami, israelcunatapash juchata rurachishca. Chaimandami Diosca, Jeroboam juchata rurashcamandaca, israelcunataca shujcunapaj maquipi churanga— nircami.

¹⁷Shina nijpimi, Jeroboam runapaj huarmica jatarishpa rirca. Shina rishpami, Tirsa shuti puebloman shamurca. Huasi punguta chai huarmi ña yaicujujpimi, huahuaca huañurca.

¹⁸Chai huahuataca, tucui israelcunami yarishpa yarishpa huacashpa pambanajurca. Mandaj Dios villashcashnallatami tucurca. Chaitaca, paimanda villaj, paita servij Ahías runahuanmi villachishca carca.

¹⁹Jeroboam runa ashtahuan imatalla rurashcapash, jatun macanajuicunata rurashcapash, pai imashna mandajushcapash Israel llactata jatun mandajcuna imatalla rurashcata escribishca libropimi tucuilla tiajun.

²⁰Jeroboam runa mandajushca huatacunaca, ishcai chunga huatami carca. Pai huañushpa, paipaj ñaupa taitacunahuan tandanajujpica, Nadab shuti paipaj churimi, paipaj randi mandajurca.

²¹Judá llactataca, Salomonbaj churi Roboam shuti runami mandajurca. Roboam runaca, chuscu chunga shuj huatata charishpami, mandai callarirca. Paica, chunga canchis huatatami, Jerusalenbi mandajurca. Chai pueblotaca Mandaj Diosmi, tucui Israel aillu puramandaca, paipaj shutita chaipi churangapaj agllarca. Roboam runapaj mamaca, amonitapura Naama shutimi carca.

²²Judá llactapi causajcunaca, mandaj Diospaj ñaupajpimi nalita ruranajurca. Paicunaca, paicunapaj ñaupa taitacuna tucui juchata rurashcatapash, ashtahuan yali nalita rurashpami, ninanda fiñachirca.

²³Paicunapashmi, tucui loma jahuacunapi, fanga junda tucui quiru ucucunapi, Asera shuti huarmi diosman rijchaj rurashcalla dioscunata shayachinajurca.

²⁴Chai llactapica, jari purallata siririj sodomita nishca runacunapashmi tiarca. Israelcunapaj ñaupajmanda, Mandaj Dios llujchishpa cachashca gentecuna tucui millanayaicunata ruraj cashcashnallatami, paicunapash ruranajurca.

²⁵Roboam runaca, ña picha huatata mandajujpimi, Egipto llactata jatun mandaj Sisac shuti runaca, Jerusalenbi causajcunahuan macanajungapaj, vichai shamurca.

²⁶Shina shamushpami, Mandaj Diospaj huasimandapash, jatun mandajpaj huasimandapash, imalla ninan valishcacunata alichishcata llujchishpa, tucuillata aparca. Shinallata Salomón rurachishca, oro escudocunatapashmi tucuillata aparca.

²⁷Chai escudocunapaj randica, jatun mandaj Roboam runaca, bronce escudocunatami rurachirca. Chai escudocunataca, jatun mandaj mandana huasiman yaicuna pungupi cuidaj soldadocunata mandajcunamanmi curca.

²⁸Mandaj Diospaj huasiman jatun mandaj yaicujpica, cuidaj soldacuna shamushpami, chai escudocunata apashpa paihuan rinajun carca. Chai jipaca, cuidaj soldadocunapaj ucupimi, tigrashpa saquigrin carca.

²⁹Roboam runa ashtahuan imatalla rurashcacunapash, tucui imatalla rurashcapash, ¿nachu Judá llactata jatun mandajcuna, imashna causashcata villajuj libropi escribishca tiajun?

³⁰Roboam runaca, Jeroboam runahuanga tucui causaipimi macanajushpalla causanajurca.

³¹Roboam huañushpa, paipaj ñaupa taitacunahuan tandanajujpica, paipaj ñaupa taitacunata pambashca ladopillatami Davidpaj pueblopi pambarca. Paipaj mamaca, amonitapura Naama shutimi carca. Paipaj randica, Abiam shuti paipaj churimi mandajurca.