Read Imbabura Highland Quichua 1 REYES 15 Bible Online

1 REYES 15 - Imbabura Highland Quichua bible

1 REYES 15

¹Nabat shuti runapaj churi jatun mandaj Jeroboam shuti runaca, chunga pusaj huatata israelcunata ña mandajujpimi Abiam shuti runaca, Judá llactata mandai callarirca.

²Paica, quimsa huatatami Jerusalenbi mandajurca. Paipaj mamaca, Abisalom shuti runapaj ushi Maaca shutimi carca.

³Abiam shuti runaca, pai nara tiajpillata, paipaj taita tucui juchata rurashpa causashcashnallatami, paipash rurashpa causarca. Paipaj shungupash, paita Mandaj Taita Diospaj ñaupajpica, na paipaj taita Davidpaj shungushna ali carcachu.

⁴Shina cajpipash paita Mandaj Taita Diosca, Davidta juyaimandami, lámpara rupajujtashna Jerusalenbi saquirca. Paipaj catica, paipaj churita mandachun churashpami, Jerusalendaca shinllichishpa catirca.

⁵Davidca, imatapash aligutalla rurashpami, Mandaj Diospaj ñaupajpica causashca carca. Imatalla mandashcacunatapash tucuita cazushpami, paipaj tucui causaipi causajurca. Paica, heteopura Urías shuti runata llaquichishpallami, Taita Diostaca fiñachirca.

⁶Roboam runaca, Jeroboam runahuanga paicunapaj tucui causaipimi macanajushpalla causanajurca.

⁷Abiam shuti runa ashtahuan imatalla rurashcacunapash, tucui imatalla rurashcapash, ¿nachu Judá llactata jatun mandajcuna imashna causashcata villajuj libropi escribishca tiajun? Abiam runahuan, Jeroboam runahuanga macanajushpa catinajurcallami.

⁸Abiam runa huañushpa paipaj ñaupa taitacunahuan tandanajujpica, Davidpaj pueblopimi pambarca. Paipaj randica, Asa shuti paipaj churimi mandajurca.

⁹Jatun mandaj Jeroboam runa ña ishcai chunga huatata Israel llactata mandajujpimi, Asa shuti runaca, Judá llactata mandai callarirca.

¹⁰Paica, chuscu chunga shuj huatatami, Jerusalenbi mandajurca. Paipaj mamaca, Abisalom shuti runapaj ushi Maaca shutimi carca.

¹¹Asa shuti runaca, paipaj ñaupa taita Davidshnallami, Mandaj Diospaj ñaupajpi aligutalla rurajurca.

¹²Paica, jari purallata siririj sodomita nishcacunatapash, paipaj ñaupa taitacuna rurashca, yanga dioscunatapash, tucuillatami chai llactamandaca anchuchirca.

¹³Shinallata Asera shuti huarmi diosta rurashcamandami, paipaj mama Maaca shuti huarmitapash, jatun mandaj canata quichurca. Asa shuti runaca, chai jahuapashmi, paipaj mamapaj yanga diosta faquishpa, Cedrón shuti huaicu yacu ladopi rupachirca.

¹⁴Ashtahuangarin lomapi tiaj altarcunataca, na anchuchircachu. Shina cashpapash, Asa shuti runapaj shunguca tucui causaipimi, Mandaj Dioshuan ali carca.

¹⁵Shinallata paipaj taitapash, paipash orota, culquita, ashtahuan shuj juyailla charishcacunata Diospajlla cachun carashcatapashmi, Mandaj Diospaj huasiman aparca.

¹⁶Asa shuti runahuan, Israel llactata jatun mandaj Baasa shuti runahuanga, paicunapaj tucui causaipimi macanajushpalla causanajurca.

¹⁷Israelcunata jatun mandaj Baasa shuti runaca, Judá llactapi causajcunahuan macanajungapaj vichai rishpami, Ramá shuti pueblopi jatun pircata shayachirca. Judá llactata jatun mandaj Asa shuti runapajman pipash ama richun, paipajmandapash pipash ama yalichunmi chashna rurarca.

¹⁸Chaimandami Asa shuti runaca, Mandaj Diospaj huasipipash, mandashpa tiajuna huasipipash, imalla ninan valishcacunata alichinapi quedashca culquita, orotaca tucuillata llujchirca. Chaicunatami, Siria llactata jatun mandaj Ben-adad runaman cuchun, paita servijcunaman cushpa cacharca. Ben-adad runaca, Damasco pueblopimi causajurca. Paica, Tabrimón shuti runapaj churimi carca. Tabrimón shuti runaca, Hezión shuti runapaj churimi carca. Asa shuti runaca, paicunataca cashna nichunmi cacharca:

¹⁹“Ñuca taitahuan, cambaj taitahuan ari ninajushcashnallata, ñucanchipash ari nipashun. Ricui, canmanmi cai culquitapash, orotapash cachamuni. Cunanga, Israel llactata jatun mandaj Baasa shuti runapajman rishpa, can ari nijushcataca yangapi churashpa saquilla. Chashna rurajpimi, ñucataca saquihuanga” nichunmi cacharca.

²⁰Ben-adad runaca, jatun mandaj Asa shuti runa mañashcata ari nishpami, Israel llacta pueblocunapi causajcunahuan macanajuchun, paipaj soldadocunata mandajcunata cacharca. Paicunami, Ijón, Dan, Abel-bet-Maaca shuti pueblocunatapash, Cineret shuti tucui llactatapash, Neftalí shuti tucui llactatapash mishashpa quichurca.

²¹Chaita yachashpami Baasa shuti runaca, Ramá shuti pueblopi jatun pircata shayachijushcata saquishpa, Tirsa shuti pueblopi quedarca.

²²Chaimandami jatun mandaj Asa shuti runaca, Judá llactapi causajcunataca shujtallapash na saquishpa, tucuillata tandachirca. Paicunahuanmi Ramá shuti pueblopi, jatun pircata Baasa shuti runa rurachijushca rumicunata, caspicunata anchuchirca. Chaicunahuanga, jatun mandaj Asa shuti runaca, Benjamín llactapi tiajuj Geba shuti, Mizpa shuti pueblocunatami shayachirca.

²³Asa shuti runa ashtahuan imatalla rurashcacunapash, tucui ushaita charishcapash, tucui imata rurashcapash, pueblocunata shayachishcapash, ¿nachu Judá llactata jatun mandajcuna imashna causashcata villajuj libropi escribishca tiajun? Ashtahuangarin pai ña rucugu cashca punllacunapimi, chaqui nanai japirca.

²⁴Asa shuti runa huañushpa paipaj ñaupa taitacunahuan tandanajujpica, paipaj ñaupa taita Davidpaj pueblopimi pambarca. Paipaj randica, paipaj churi Josafat runami mandajurca.

²⁵Judá llactata jatun mandaj Asa shuti runaca, ishcai huatata ña mandajujpimi, Jeroboam runapaj churi Nadab shuti runaca, israelcunata mandai callarirca. Paica, ishcai huatatami Israel llactata mandajurca.

²⁶Paica, Mandaj Diospaj ñaupajpica, nalitami rurajurca. Paipash, paipaj taita juchacunata rurashpa, israelcunatapash juchata rurachishca ñandallatami catijurca.

²⁷Isacar aillupura Ahías runapaj churi Baasa shuti runami, Nadab shuti runata huañuchingapaj shujcunahuan pacalla parlarirca. Shina parlarishpami, filisteocunapaj Gibetón shuti pueblopi chugrichishpa huañuchirca. Nadab shuti runaca, tucuilla israelcunandimi, Gibetón shuti pueblota japingapaj, ña chaupipi churashca carca.

²⁸Nadab runataca, jatun mandaj Asa shuti runa ña quimsa huatata Judá llactata mandajujpimi, Baasa shuti runaca huañuchirca. Chashna huañuchishpami, Nadab runapaj randica paillata mandajurca.

²⁹Pai mandai callarishpaca, Jeroboam runapaj huasi ucu purataca, shujllatapash causajtaca na saquishpami, tucuillata tucuchingacaman huañuchirca. Jeroboam runapaj miraicunataca, Mandaj Diosta servij Ahías runaguhuan villachishcashnallatami chashna rurarca. Ahías runaca, Silo shuti pueblopimi causajurca.

³⁰Jeroboam runaca, pai juchacunata rurashpa, israelcunatapash chai juchatallata rurachishpa, israelcunata Mandaj Taita Diosta ninandapacha fiñachishcamandami chashna tucurca.

³¹Nadab runa ashtahuan imatalla rurashcacunapash, tucui imatalla rurashcapash, ¿nachu Israel llactata jatun mandajcuna imashna causashcata villajuj libropi escribishca tucuilla tiajun?

³²Asa shuti runahuan, Israel llactata jatun mandaj Baasa shuti runahuanga, paicunapaj tucui causaipimi, macanajushpalla causanajurca.

³³Judá llactata jatun mandaj Asa shuti runaca, quimsa huatata ña mandajujpimi, Ahías shuti runapaj churi Baasa shuti runaca, tucui Israel llactata Tirsa shuti pueblopi mandai callarirca. Paica, ishcai chunga chuscu huatatami mandajurca.

³⁴Baasa shuti runaca, Mandaj Diospaj ñaupajpica, nalitami rurajurca. Jeroboam runa nalita rurashpa, israelcunatapash juchata rurachishca ñandallatami, paipash catijurca.