Read Imbabura Highland Quichua 1 REYES 16 Bible Online

1 REYES 16 - Imbabura Highland Quichua bible

1 REYES 16

¹Mandaj Diosca, Baasa shuti runata llaquichinatami, Hanani shuti runapaj churi Jehú shuti runaman, cai shimicunata villarca:

²“Candaca, ñutu alpamandashna jatarichishpami, ñuca agllashca israelcunata mandaj cachun churarcani. Ashtahuangarin canga, Jeroboam runashnallata nalita rurashpami, ñuca agllashca israelcunatapash juchata rurachishcangui. Can rurashca juchacunahuanmi ñucataca, ninandapacha fiñachihuangui.

³Ricui, chaimandami Baasa shuti runapaj miraicunatapash, paipaj huasi ucu purapaj miraicunatapash, fichashpa shitanshna tucuchisha. Paipaj huasi ucu purataca, Nabat runapaj churi Jeroboam runapaj huasi ucu puratashnami tucuchisha.

⁴Baasa shuti runapaj puracunamanda maijan cashpapash pueblopi huañujpica, alcucunami micunga. Paipaj puramandallata maijan cashpapash pambapi huañujpica, jahuata rij alasyu animalcunami micunga” nircami.

⁵Baasa shuti runa ashtahuan imatalla rurashcacunapash, ashtahuan imatalla rurashcapash, ninan ushaita charishcapash, ¿nachu Israel llactata jatun mandajcuna imashna causashcata villajuj libropi tucuilla escribishca tiajun?

⁶Baasa shuti runa huañushpa paipaj ñaupa taitacunahuan tandanajujpica, Tirsa shuti pueblopimi pambarca. Baasa shuti runa huañujpica, Ela shuti paipaj churimi, paipaj randi mandajurca.

⁷Mandaj Diosca, pai ima nishcata villaj Hanani shuti runapaj churi Jehú shuti runaguhuanmi, Baasa shuti runatapash, paipaj huasi ucu puratapash llaquichinata villachirca. Mandaj Diospaj ñaupajpi Baasa shuti runa nalita rurashpa, paipaj maquihuambash nalitalla rurashpa Diosta fiñachishcamanda, Jeroboam runapaj huasi ucu puratashna tucuchingapajmi, chashna villachirca. Paicunata imamanda tucuchishcatapashmi villachirca.

⁸Judá llactata jatun mandaj Asa shuti runaca, ishcai chunga sucta huatata ña mandajujpimi, Baasa shuti runapaj churi Ela shuti runaca, Israel llactata Tirsa shuti pueblopi mandai callarirca. Paica, ishcai huatatami mandajurca.

⁹Carretacunapi purij shuj chaupi soldadocunata mandaj Zimri shuti paita servij runami, huañuchingapaj shujcunahuan pacalla parlarirca. Ela shuti runaca, Tirsa shuti pueblopimi, Arsa shuti paipaj mayordomopaj huasipi ufiashpa, machashca tiajurca.

¹⁰Chashna tiajujpimi Zimri shuti runaca, Ela shuti runata chugrichishpa huañuchishpaca, paipaj randi mandajurca. Judá llactata jatun mandaj Asa shuti runaca, ñami ishcai chunga canchis huatata mandajurca.

¹¹Mandangapaj tiarinapi Zimri shuti runa tiarishpa mandai callarishpaca, Baasa shuti runapaj tucuilla huasi ucu purataca, shujtallapash na saquishpami, paipaj huasi ucu puratapash, paipaj cumbacunatapash huañuchirca.

¹²Zimri shuti runaca, chashnami Baasa shuti runapaj tucuilla huasi ucu purataca tucuchirca. Paica, Baasa shuti runata imashna llaquichinata Dios ima nishcata villaj Jehú shuti runaguhuan, Mandaj Dios villachishcashnallatami llaquichirca.

¹³Baasa shuti runapash, paipaj churi Ela shuti runapash chai tucui juchacunata rurashpa, israelcunatapash chai juchatallata rurachishcamandami, chashna tucuchirca. Paicunapaj yanga dioscunata mañashpami, israelcunata Mandaj Taita Diostaca ninandapacha fiñachirca.

¹⁴Ela shuti runa ashtahuan imatalla rurashcacunapash, tucui imatalla rurashcapash, ¿nachu Israel llactata jatun mandajcuna imashna causashcata villajuj libropi tucuilla escribishca tiajun?

¹⁵Judá llactata jatun mandaj Asa shuti runaca, ishcai chunga canchis huatata ña mandajujpimi, Zimri shuti runaca mandai callarirca. Paica, canchis punllatallami Tirsa shuti pueblopi mandarca. Israelcunaca, filisteocunapaj llactapi tiaj Gibetón shuti pueblopi causajcunahuan macanajungapaj rishpami, carpacunata shayachishpa tianajurca.

¹⁶Chai carpacunapi tianajuj israelcunami: “Zimri shuti runaca, shujcunahuan pacalla parlarishpami, jatun mandajtaca huañuchishca” nijta uyarca. Chaimandami tucuilla israelcunaca, chai macanajuna pambapillata, chai punllallata soldadocunata mandaj Omri shuti runata, paicunata jatun mandaj cachun churanajurca.

¹⁷Omri shuti runaca, tucuilla israelcunandi Gibetón shuti pueblomanda vichai rishpami, Tirsa shuti pueblota japingapaj chaupipi churarca.

¹⁸Ashtahuangarin Zimri shuti runaca, chai pueblota ña quichujta ricushpami, mandashpa tiajuna huasi ucuman yaicushpa, chai huasipi ninata japichishpa chaipi rupashpa huañurca.

¹⁹Mandaj Diospaj ñaupajpi nalita rurashpa juchata rurashcamanda, shinallata Jeroboam runa juchata rurashpa, israelcunatapash juchata rurachishca ñandallata catishpa causashcamandami, chashna tucurca.

²⁰Zimri shuti runa ashtahuan imatalla rurashcapash, Ela shuti jatun mandajta huañuchingapaj shujcunahuan pacalla parlarijushcapash, ¿nachu Israel llactata jatun mandajcuna imashna causashcata villajuj libropi escribishca tucuilla tiajun?

²¹Israelcunaca ishcaipi chaupirishpami shicanyanajurca. Shuj chaupica, Ginat shuti runapaj churi Tibni shuti runatami, jatun mandaj cachun churashun ninajurca. Caishuj chaupica, Omri shuti runatami catinajurca.

²²Ashtahuangarin Omri shuti runata catij gentecunami, Ginat shuti runapaj churi Tibni shuti runata catijcunataca misharca. Tibni shuti runa huañujpimi, Omri shuti runa jatun mandaj tucurca.

²³Judá llactata jatun mandaj Asa shuti runaca, quimsa chunga shuj huatata ña mandajujpimi Omri shuti runaca, Israel llactata mandai callarirca. Paica, chunga ishcai huatatami mandajurca. Sucta huatataca, Tirsa shuti pueblopimi mandajurca.

²⁴Omri shuti runaca, Semer shuti runatami, Samaria urcuta shuj quintal chunga pusaj kilota pezaj culquipaj randirca. Chai urcupi shuj pueblota rurashpami, chai urcuta jatuj runapaj shutica, Semer shuti cashcamanda chai pueblotaca, Samaria shutita shutichirca.

²⁵Omri shuti runaca, Mandaj Diospaj ñaupajpica, nalita rurashpami causajurca. Paica, paipaj punda mandanajushca mandajcunatapash ashtahuan yali nalitami rurajurca.

²⁶Paica, Nabat shuti runapaj churi Jeroboam runa tucui nalita rurashpa, israelcunatapash juchata rurachishca chai juchatallatami rurashpa causarca. Paicunapaj yanga dioscunata mañashpami, israelcunata Mandaj Taita Diostaca, ninandapacha fiñachirca.

²⁷Omri shuti runa ashtahuan imatalla rurashcacunapash, tucui imatalla rurashcapash, pai ali shinlli runa cashcapash, ¿nachu Israel llactata jatun mandajcuna imashna causashcata villajuj libropi escribishca tucuilla tiajun?

²⁸Omri shuti runa runa huañushpa, paipaj ñaupa taitacunahuan tandanajujpica, Samaria pueblopimi pambarca. Paipaj randica, paipaj churi Acab shuti runami mandajurca.

²⁹Judá llactata jatun mandaj Asa shuti runaca, quimsa chunga pusaj huatata ña mandajujpimi, Omri shuti runapaj churi Acab runaca, Israel llactata mandai callarirca.

³⁰Omri shuti runapaj churi Acab runaca, ishcai chunga ishcai huatatami, Samaria pueblopi mandajurca. Omri shuti runapaj churi Acab runaca, Mandaj Diospaj ñaupajpica, paipaj punda mandanajushca tucui mandajcunata ashtahuan yali nalitami rurajurca.

³¹Paica, Nabat runapaj churi Jeroboam runashnallata juchacunata rurashpapash, ima juchatapash na ruranichu yajurcami. Paica, Sidón llactata jatun mandaj Et-baal shuti runapaj ushi Jezabelhuanmi cazararca. Chashna cazarashpami, Baal shuti diosta ninanda alicachishpa, servishpa causangapaj rirca.

³²Paica, Baal shuti diosman Samaria pueblopi rurachishca huasipimi, Baal shuti chai diosmanllata shuj altartapash rurachirca.

³³Acab runaca, Asera shuti huarmi diosman rijchajtapashmi rurachirca. Chashnami Acab runaca, Israel llactata paipaj punda mandanajushca tucui mandajcunatapash yali ashtahuan nalita rurashpa, israelcunata Mandaj Diostaca ninandapacha fiñachirca.

³⁴Acab runa mandajui huatacunapica, Bet-el shuti pueblopi causajuj Hiel shuti runami, Jericó pueblota cutin alichirca. Chai pueblo muyundipi jatun pircata shayachingapaj callari rumita churajpica, Abiram shuti paipaj punda churipaj causaitami quichurca. Chai pircapi punguta shayachijpica, Segub shuti cati churipaj causaitami quichurca. Nun shuti runapaj churi Josuehuan, Mandaj Dios villachishcashnallatami, chashna tucurca.