Read Imbabura Highland Quichua 1 REYES 18 Bible Online

1 REYES 18 - Imbabura Highland Quichua bible

1 REYES 18

¹Tauca punllacuna yalishpa ña quimsa huata tucujpimi Mandaj Diosca, Eliasman cai shimicunata cashna nirca: “Acab shuti runapaj ñaupajpi ricuringapaj ri. Ñucami, cai pachapi tamiachisha” nircami.

²Shina nijpimi Eliasca, Acab runapaj ñaupajpi ricuringapaj rirca. Samaria pueblopica, jatun yarjaimi tiarca.

³Chaimandami Acab runaca, Abdías shuti paipaj mayordomota cayashca carca. Abdías runaca, Mandaj Diosta ninanda manllaj runami carca.

⁴Jezabel huarmi mandajpimi, Mandaj Dios ima nishcata villajcunata tucuchinajurca. Chaimandami Abdías runaca, chai villajcunataca patsaj runacunata apashpa pacarca. Paicunataca, picha chungataca shuj jatun utujupi, shuj picha chungataca caishuj jatun utujupimi pacarca. Chaipimi tandata, yacuta carashpa charirca.

⁵Chai Abdías runatami, Acab runaca cashna nirca: —Ima animalcunapash illaj ama quedangapaca, cai llactapi tiaj tucui pugyucunaman, tucui huaicu yacucunaman ri. Chaicunapi jihuata tarishpaca caballocunata, mulacunata causajta chari usharingapashchari— nircami.

⁶Chai jipami, chai llactata maitalla muyugrinatapash, paipura chaupirirca. Acab runaca caishuj lado ñanda, Abdías runaca shuj ladotami pailla rijurca.

⁷Chai ñanda rijushpallatami Abdías runaca, Elías runahuan tuparirca. Shina tuparishpaca, Elías cajta rijsishpami Abdías runaca, urai cumurishpa cungurishpaca: —Canga, ¿nachu ñucata mandaj Elías capangui?— nirca.

⁸Shina nijpimi, Eliasca: —Ari, ñucami cani: ‘Eliasca caipimi’ nishpa, canda mandajman villagri— nirca.

⁹Shina nijpimi Abdías runaca, cashna nirca: —Canda servij ñucata huañuchijuchun, Acab runapaj maquipi churangapaca, ¿ima juchatata rurapashcaniyari?

¹⁰Canda Mandaj Taita Diosca causajumbachami. Tucui llactacunaman, tucui mandajcunapajmanmi ñucata mandaj Acab runaca, canda mascachun cacharca. Tucui paicunami: ‘Eliasca na caipichu’ ninajurca. Shina nijpimi, chai mandajcunatapash, chai llactacunapi causajcunatapash canda na ricushcata juramentuchirca.

¹¹¿Chashna cajpitachu cunanga: ‘Eliasca caipimi nishpa, cambaj amoman villagri’ nihuangui?

¹²Ñuca rishca jipaca, cashnami tucunga: Mandaj Diospaj Espiritumi, candaca ñuca na yachai ushanallaman apanga. Chashna apashca cajpi, Acab runaman ñuca villagrijpi, canda na caipi tuparij shamushpaca, ñucatami huañuchinga. Canda servij ñucaca, huambramandapachami Mandaj Diosta manllashpa causani.

¹³Mandaj Dios ima nishcata villajcunata, Jezabel huarmi huañuchijujpi, ñuca imatalla rurashcataca, ¿nachu ñucata mandajman imatallapash villaparca? Mandaj Dios ima nishcata villajcunataca, picha chungataca shuj jatun utujupi, caishuj picha chungataca caishuj jatun utujupimi pacarcani. Chashna pacashpami tandata, yacuta carashpa charircani.

¹⁴¿Ñucata pai huañuchijuchun munashpachu, cunanga: ‘Eliasca caipimi nishpa, canda mandajman villagri’ nihuangui?— nircami.

¹⁵Shina nijpimi Eliasca, cashna nirca: —Tucuita Mandaj Diosca causajumbachami. Paipaj ñaupajpimi cani. Cunanga, Acab runapaj ñaupajpi ricurishallami— nirca.

¹⁶Shina nijpimi Abdías runaca, Acab runahuan tuparingapaj rishpa, Eliasta tuparishcata villarca. Shina villajpimi Acab runaca, Elías runahuan tuparingapaj shamurca.

¹⁷Acab runaca, Eliasta ña ricushpami: —¿Canllu israelcunata pandachij cangui?— nirca.

¹⁸Shina nijpimi Eliasca, cashna nirca: —Israelcunataca, na ñuca pandachircanichu. Ashtahuangarin canhuan, cambaj taitapaj huasi ucu purahuanmi, Mandaj Dios mandashcacunata saquishpa, Baal shuti dioscunatara catishpa pandachinguichi.

¹⁹Cunanga, tucui israelcunata Carmelo shuti urcupi tandanajuchun cachai. Shinallata Baal shuti diosmanda villaj chuscu patsaj picha chunga runacunatapash, Asera shuti huarmi diosmanda villaj chuscu chunga runacunatapash tandanajuchun cachangui. Paicunamanga, Jezabel shuti huarmimi micunata carashpa charin— nircami.

²⁰Acab runaca, tucui israelcunata cayachishpami villajcunataca, Carmelo shuti urcupi tandachirca.

²¹Chai tucuilla gentecunapaj ladoman Elías quimirishpami, cashna nirca: —¿Ima horascamanda cangunaca, cashna ishcai yuyaihuan causagringuichi? Mandaj Dios, Taita Dios cajpica, paita catichi. Ashtahuangarin Baal shuti dios, Taita Dios cajpica, paita catishpa richilla— nircami. Shina nijpica gentecunaca, nimatallapash na nircachu.

²²Eliasca, gentecunataca cutinmi cashna nirca: —Mandaj Dios ima nishcata villaj runaca, ñucallami puchushcani. Ashtahuangarin Baal shuti diosmanda villajcunaca, chuscu patsaj picha chunga runacunami tian.

²³Shina cashcamanda ishcai huagrata cuhuaichi. Chaitaca, chai villaj runacuna agllashpa, shujta japichun. Chai agllashcataca huañuchishpa, asha asha fitishpa yamda jahuapi churachun. Ashtahuangarin chai yamda ucupica, ninata ama churachun. Shinallata caishuj huagrataca, ñucami alichisha. Ñucapash yamda ucupica, ima ninatapash na churashachu.

²⁴Chai jipaca cangunapash, cangunapaj dioscunapaj shutipi mañaichilla. Ñucapash, Mandaj Diospaj shutipimi mañasha. Mañajujta uyashpa, maijan Dios cashpapash ninata cachamushpaca, chaimi Taita Diospacha canga— nircami. Shina nijpimi, tucuilla gentecuna: —Alitapachamari ningui— ninajurca.

²⁵Shina nijpimi Eliasca, Baal shuti diosmanda villajcunataca cashna nirca: —Canguna ashtaca cashcamandaca, cangunara shuj huagrata agllashpa pundaca alichishpa churaichi. Chai jipaca, cangunapaj dioscunapaj shutipi mañaichi. Ashtahuangarin yamda ucupica, ninata na churanachu canguichi— nircami.

²⁶Shina nijpimi, chai villaj runacunaca, paicunaman cushca huagrata japishpa huañuchirca. Chashna huañuchishpa alichishpami, tutamandata callarishpaca, chaupi punllacaman: “¡Baal, ñucanchi mañajujta tigrachihuayari!” nishpa, Baal shuti diospaj shutipi mañanajurca. Ashtahuangarin parlajllapash, maijan tigrachijllapash na uyarircachu. Paicunaca, paicunallata rurashca altar ladopimi fahuashpa muyunajurca.

²⁷Ña chaupi punlla tucujpimi, cashna tucurca: Eliasca, paicunata asishpa ricushpami, cashna nirca: —Paica diosmari, shinllita caparichilla. Paica, imatapashmi aliguta yarijunga, na cashpaca imatapashmi rurajunga. Na cashpaca maimambashmi rishcanga, na cashpaca puñujungami, rijchachinami canga— nircami.

²⁸Shina nijpimi paicunaca, ashtahuan shinllita caparinajurca. Paicuna imashna ruranata yachan cashcashnallatami cuchillocunahuan, uchilla lanzacunahuan chugririshpa yahuarsapa tucunajurca.

²⁹Ña chaupi punlla yalishcapipash paicunaca, Diosman animalta carashpa huañuchina horascamanmi, loco tucushcashna caparinajurca. Chashna caparinajujpipash, pipash na parlarcachu, pipash na uyashpa tigrachircachu.

³⁰Chaimandami Eliasca, tucui gentecunataca: —Ñuca ladoman quimirimuichi— nirca. Shina nijpimi, tucui gentecuna quimirinajurca. Chaipimi Eliasca, Mandaj Diospaj altarta urmachishcata alichirca.

³¹Eliasca, Jacobopaj churicuna chunga ishcai aillucuna cashcashnallatami, chunga ishcai rumicunata japirca. Mandaj Diosca, Jacobotaca: “Cambaj shutica, Israelmi canga” nishcami carca.

³²Chai rumicunahuanmi, Mandaj Diospaj shutipi shuj altarta rurarca. Chai jipami, chai altar muyundipi uchilla larcata rurarca. Chaipica, ishcai taza granota medishpa churai valimi carca.

³³Chai jipaca, altar jahuapi yamdata churashpami, huagrata huañuchishpa asha asha fitishpa, yamda jahuapi churarca.

³⁴Chai jipami, cashna nirca: —Chuscu fundupi yacuta jundachichi. Chaitaca, Diosman cushpa tucuilla rupachina aicha jahuapipash, yamda jahuapipash talichi— nijpimi, chashna talinajurca. Chai jipapash: —Cutin shujtapash talichilla— nijpimi, cutimbash talinajurca. Chashna talijpipash: —Cutimbash talichilla— nijpimi, caihuanga ña quimsacaman talinajurca.

³⁵Chashna talijpica, altar muyundita yacu jicharishpami, chai muyundi larcapipash yacu jundarca.

³⁶Diosman animalta cushpa tucuillata rupachina horas ña chayajpimi, Dios ima nishcata villaj Eliasca, altarman quimirishpa cashna nishpa mañarca: “Abraham, Isaac, Israel shuti taitacunata Mandaj Taita Dioslla, Israel llactapica canlla Taita Dios cajta cunanga ricuchipairi. Shinallata ñucapash canda servij cajta, can mandajpi tucui caicunatapash rurajushcata ricuchipairi.

³⁷Mandaj Dioslla, ñuca mañajujta uyashpa tigrachihuayari, tigrachihuayari. Chashna tigrachijpimi, can Mandaj Diostaca, Taita Diospacha cajta yachanga. Paicunapaj yuyaitapash, canllata cambajman tigrachij cajtapashmi yachanga” nishpami mañarca.

³⁸Chashna mañajpimi, Mandaj Dios cachamujpi nina urai shamushpa, Diosman carashpa tucuilla rupachina aichatapash, yamdatapash, rumitapash, alpatapash rupachirca. Shinallata uchilla larcapi jundashca yacutapashmi chaquichirca.

³⁹Chaita tucui gentecuna ricushpami cungurishpa: “¡Mandaj Diosmari, Taita Diospacha. Mandaj Diosmari, Taita Diospacha!” ninajurca.

⁴⁰Chaimandami Eliasca, cashna nirca: —Baal shuti diosmanda villajcunaca, shujllapash ama pacajushpa richun, tucuillata japichi— nircami. Shina nijpimi, tucuillata japinajurca. Shina japijpimi Eliasca, Cisón shuti huaicu yacuman apashpa, chai villaj runacunataca cungata muchushpa huañuchirca.

⁴¹Chai jipami Eliasca, Acab runataca cashna nirca: —Micushpa, ufiashpa tiajungapaj vichai rilla. Ñamari ninan tamia uyarimujun— nircami.

⁴²Shina nijpimi Acab runaca, micushpa ufiashpa tianajungapaj vichai rirca. Eliasca, Carmelo shuti urcu jahuamanmi vichai rirca. Chaipimi Eliasca alpapi cungurishpa, paipaj ñavitapash cunguri chaupipi churashpa tiajurca.

⁴³Chaipimi, paita servij runataca: —Cunanga, vichai rishpa mama cuchata ricugri— nirca. Shina nijpi, pai vichai rishpa ricushpami: —Imapash na ricurinllu— nirca. Shina nijpimi, Eliasca: —Canchiscaman tigrashpa ricugri— nirca.

⁴⁴Shina nijpi, ña canchiscaman ricungapaj rishpami, cashna nirca: —Shuj runapaj maqui tablashnalla asha fuyutami, mama chuchamanda vichai jatarijujta ricuni— nircami. Shina nijpimi Eliasca, chai runataca cashna nirca: —‘Ama tamia japichun, caballocunapi carretata huatashpa ucha urai rilla’ ninmi nishpa, Acab runaman villagri— nircami.

⁴⁵Chashna villajpi ña alichirinajujpimi, cashna tucurca: Huairahuan fuyu shamushpami, jahua pacha yanayashpa ninandapacha tamiarca. Chaimandami Acab runaca, carretapi vitsiashpa Jezreel shuti puebloman shamurca.

⁴⁶Ashtahuangarin Eliasca, Mandaj Dios paipaj maquihuan pushajpimi, pai ali chumbilirishpaca, Acab runata mishashpa, Jezreel shuti puebloman chayajta calparca.