Read Imbabura Highland Quichua 1 REYES 2 Bible Online

1 REYES 2 - Imbabura Highland Quichua bible

1 REYES 2

¹David huañuna punllacuna ña chayamujpimi, paipaj churi Salomondaca cashna nishpa mandajurca:

²“Ñucaca, cai pachamanda tucuicuna rina ñandallatami catishpa rigrini. Shina cajpipash canga shinlli tucushpa, shinlli shayaringui.

³Canda Mandaj Taita Dios imatalla rurachun nishcatapash pactachishpa, paipaj ñambi puringui. Moisés mandashcapi nijunshnallata, pai escribichishcacunata, mandashcacunata, pai villachishcacunata, imashna causanata pai yachachishcacunata ali ricushpa cazungui. Can chashna ali pactachijpica, imata can rurashpapash, imata rurai callarijushcapash tucuimi ali llujshinga.

⁴Ñucaman imatalla nishcata Mandaj Dios pactachijuchunmi, chashna cazuna cangui. Paica, ñucata cashnami nihuarca: ‘Cambaj churicuna ñuca ñambi purishpa, ñuca ñaupajmanda na anchurishpa tucui shunguhuan, tucui almahuan ali cazujpica, cambaj miraicunamanda israelcunata mandajcunaca, ima horallapash na illangachu’ nihuarcami.

⁵Sarvia shuti huarmipaj churi Joab runa ñucata imatalla rurashcatapash, Israel soldadocunata mandaj, Abner shuti runapaj churi Ner shuti runata, Jeter shuti runapaj churi Amasa shuti runata, chai ishcai runacunata imatalla rurashcatapash, canllata ña yachanguimi. Paica, casilla ali causajui punllacunami, macanajui punllacunapishna paicunataca yahuarta jichashpa huañuchirca. Pai chumbilishca carapipash, chaquipi churajushcapipashmi, macanajui punllapishna yahuarta jicharca.

⁶Canga, ali yachaita charinshnallata rurangui. Joab runa rucuyashpa yuraj ajcha tucushpa, Seolman casilla urai richunga ama saquinguichu.

⁷Ashtahuangarin galaadita nishcapura Barzilai shuti runapaj churicunataca llaquishpa, can micuj mezaman cayashpa micuchishpa charingui. Cambaj huauqui Absalonda pacajushpa ñuca rijujpica, paicunapash chashnallatami charihuarca.

⁸Benjamín llactapi tiaj Bahurim shuti pueblopi causajuj Gera shuti runapaj churi Simei shuti runatapashmi, canga charingui. Paica, Mahanaim shuti puebloman ñuca rijui punllami, ima llaquipash japishpaca alichari canman nishpa, ninandapacha rimahuarca. Shina cashpapash paillatami ñucataca, Jordán yacu ladopi tuparingapaj urai shamurca. Chaimandami paitaca: ‘Candaca, napacha espadahuan huañuchishachu’ nishpa, Mandaj Diospaj shutipi juramenturcani.

⁹Ashtahuangarin cunanga, ama saquinguichu. Canga, alipacha yachajushca runami cangui. Imashna paita llaquichinatapash, canllata yachanguimi. Pai ña rucuyashpa yuraj ajcha tucujpica, huañuchishpa yahuarta jichashpa Seolman urai cachangui” nijurcami.

¹⁰David huañushpa, paipaj ñaupa taitacunahuan tandanajujpica, paipaj pueblopillatami pambarca.

¹¹Israelcunata David mandajushca punllacunaca, chuscu chunga huatacunami carca. Hebrón shuti pueblopica, canchis huatatami mandajurca. Jerusalenbica, quimsa chunga quimsa huatacunatami mandajurca.

¹²Salomonmi, paipaj taita David mandashpa tiajushcapica tiarirca. Pai mandajushcapash, ninan shinllipachami carca.

¹³Shina cajpimi Haguit shuti huarmipaj churi Adonías runaca, Salomonbaj mama Betsabé huarmipajman shamurca. Chaimandami, Betsabé huarmica: —¿Ali yuyaihuanllu shamungui?— nishpa tapujpi, Adonías runaca: —Ari, ali yuyaihuanmi shamujuni— nirca.

¹⁴Shina nishpallami, Adonías runaca: —Shuj shimiguta ningapajmi munapani— nijpi, Betsabé huarmica: —Imata cashpapash nilla— nirca.

¹⁵Shina nijpimi Adonías runaca, cashna nijurca: —Canllata yachanguimi, llactata mandanaca ñucapajmi carca. Shinallata tucui israelcunami, paicunata mandachunga ñucata shuyanajurca. Shina cajpipash llactata mandanataca, ñuca huauquipajman yalichijpimi paipaj quedarca. Mandaj Diosllatami, pai mandachun curca.

¹⁶Cunanga, caigutami candaca mañangapaj munapani. Ama na nihuanguichu— nijurcami. Shina nijpimi, Betsabé huarmica: —Imata cashpapash parlailla— nirca.

¹⁷Shina nijpimi Adonías runaca, cashna nirca: —Sunamita nishcapura Abisag shuti huarmihuan cazarangapaj ñucaman cuhuachun, jatun mandaj Salomonhuan parlagripai. (Can mañajpica, ari ningallami)— nircami.

¹⁸Shina nijpimi, Betsabé huarmica: —Ari, canmandaca jatun mandajhuan parlagrishallami— nirca.

¹⁹Chai jipami Betsabé huarmica, jatun mandaj Salomonhuan, Adonías runamanda parlangapaj shamurca. Shina shamujpimi, jatun mandajca chasquingapaj jatarishpa, paipaj ñaupajpi urai cumurirca. Chai jipaca, pai mandashpa tiajushcapi cutin tiarishpami, paipaj mama tiarichun shuj tiarinata apamuchun cacharca. Ña apamujpica, paipaj ali ladomanmi tiarirca.

²⁰Chaipi tiajushpami Betsabé huarmica, cashna nirca: —Shuj ashalla mañanagutami, candaca mañangapaj munapani. Ama na nihuanguichu— nircami. Shina nijpimi, jatun mandajca: —Ñuca mamitalla, imata cashpapash mañailla, cushallami— nirca.

²¹Shina nijpimi, paipaj mamaca: —Sunamita nishcapura Abisag shuti huarmitaca, cambaj huauqui Adoniasman, paipaj huarmi cachun cupai— nirca.

²²Shina nijpimi, jatun mandaj Salomonga, paipaj mamataca cashna nirca: —Sunamita nishcapura Abisag shuti huarmitaca, ¿imashpata Adoniasman cuchun mañahuangui? Paica, llactata mandanatapashmi mañajun. Paica, ñucapaj rucu huauqui cashpami, Abiatar shuti curatapash, Sarvia shuti huarmipaj churi Joab runatapash ña charin— nircami.

²³Shina nishpami jatun mandaj Salomonga, Mandaj Diospaj shutipi cashna nishpa juramenturca: “Adonías runaca, paillata huañuchi tucungapajmi, cai shimicunataca nishca. Paita na huañuchijpica, Taita Diosca ninandapacha llaquichihuachun.

²⁴Cunanga, Mandaj Diosca causajumbachami. Paimi ñuca mandachun, shinllitapacha churashpa, ñuca taita David mandashpa tiarinapi tiachihuarca. Pai imashna nishcashnallatami, ñuca miraicunatapash mandashpa causachun churashapachami nirca. Adonías runaca, cunandami huañunga” nircami.

²⁵Shina nishca jipami, jatun mandaj Salomonga, Joiada shuti runapaj churi Benaía shuti runataca, Adonías runata huañuchigri nishpa cacharca. Chaimandami Adoniastaca, cungashcapi ñapash huañuchijpi huañurca.

²⁶Jatun mandajca, Abiatar shuti curataca cashnami nirca: “Canga, caimanda llujshishpa, Anatot shuti pueblopi tiaj cambaj cachun cushca alpacunaman ri. Cambash huañunapachami cangui. Shina cajpipash candaca, na cunanda huañuchigrinichu. Canmi, Mandaj Jatun Diospaj arcatapash, ñuca taita Davidpaj ñaupajpi apashpa purishcangui. Shinallata ñuca taita ima llaquita apajujpipash, cambashmi llaquita apajushcangui” nircami.

²⁷Shinami Salomonga, Abiatar shuti curataca, Mandaj Diospaj cura cashcamanda llujchishpa cacharca. Elí shuti curapaj miraicuna imalla tucunata Silo shuti pueblopi, Mandaj Dios rimashca shimi pactachunmi chashna tucurca.

²⁸Chashna tucushcatami, Joab runaman villanajurca. Paica, Absalonbaj lado na tucushpapash, Adonías runapaj ladomi tucushca carca. Chaimandami Joab runaca, Mandaj Diospaj jatun carpaman pacajungapaj rishpa, altar cachucunapi charirirca.

²⁹Joab runaca, Mandaj Diospaj jatun carpaman pacajungapaj rishpami, altar ladopi shayajun nishpami, Salomón yachachun villarca. Chaimandami Salomonga, Joiada shuti runapaj churi Benaía shuti runataca: —Joab runata cungashcapi ñapash huañuchigri— nirca.

³⁰Shina nijpimi Benaía runaca, Mandaj Diospaj jatun carpaman yaicushpa, cashna nirca: —Jatun mandajca, caimanda llujshi ninmi— nijpimi, Joab runaca: —Na llujshishachu, caipimi huañusha— nirca. Shina nijpimi Benaía runaca, Joab runa imatalla nishcata jatun mandajman villaj shamushpa, cashna nirca: —Joab runaca, cashna chashna nishpami tigrachihuan— nircami.

³¹Shina villajpimi jatun mandajca, cashna nirca: —Pai nishcashnallata rurailla. Huañuchishpa chaipillata pambanguilla. Shina rurashpaca, yangamanda Joab runa huañuchishpa yahuarta jichashcataca ñucamandapash, ñuca taitapaj familia puramandapash anchuchingui.

³²Mandaj Diosca, chai yahuartaca paimanllatami tigrachinga. Paica, paitapash yali imatapash cashcatapacha ruraj ishcai ali runacunatami huañuchishca. Paicunataca, ñuca taita Davidpash na yachajtami, espadahuan huañuchishca. Ner shuti runapaj churi Abner shuti runaca, Israel soldadocunata mandajmi carca. Jeter shuti runapaj churi Amasa shuti runaca, Judá llacta soldadocunata mandajmi carca.

³³Paicunapaj yahuarca, Joab runapaj jahuapillata, paipaj miraicunapaj jahuapillatami, causaita causaicaman urmamunga. Ashtahuangarin Davidpaj jahuapipash, paipaj miraicunapaj jahuapipash, paipaj huasi ucu puracunapaj jahuapipash, pai mandangapaj tiarina jahuapipash, Mandaj Dios cachamushca casilla ali causaimi, causaita causaicaman tianga— nircami.

³⁴Shina nijpimi, Joiada shuti runapaj churi Benaía shuti runaca, vichai rishpa Joab runataca cungashcapi ñapash huañuchirca. Paitaca, jichushca pambapi tiajuj paipaj huasi ladopimi pambarca.

³⁵Chai jipami jatun mandajca, Joab runapaj randi soldadocunata mandachunga, Joiada runapaj churi Benaía runata churarca. Shinallata Abiatar shuti curapaj randica, Sadoc shuti runatami cura cachun jatun mandajca churarca.

³⁶Chai jipami, jatun mandaj Salomonga, Simei shuti runata cayachun cachashpa, cashna nirca: —Jerusalenbi shuj huasita rurashpa, chaipi causai. Chaimandaca, maimambash amapacha llujshinguichu.

³⁷Na llullashpami nini, canllata yachanguimi. Maijan punlla cashpapash, caimanda llujshishpa, Cedrón shuti yacuta chimbashpa rishpaca, chai punllallatami huañungui. Cambaj yahuarca, cambaj jahuallatami canga— nircami.

³⁸Shina nijpimi Simei shuti runaca, jatun mandajtaca cashna nirca: —Alitami nihuangui, ñuca amo can jatun mandaj nishcashnallatami, canda servij ñucaca rurapasha— nircami. Shina nishpami Simei shuti runaca, tauca punllacunata Jerusalenbi causajurca.

³⁹Ashtahuangarin quimsa huata yalishca jipami, cashna tucurca: Simei shuti runapaj ishcai servijcunaca pacalla llujshishpa rishpami, Gat shuti pueblota jatun mandaj Maaca shuti runapaj churi Aquis shuti runapajpi causangapaj rirca. Chaitami, Simei shuti runaman cashna nishpa villanajurca: “Ricui, canda servijcunaca, Gat pueblopimi” ninajurcami.

⁴⁰Chaimandami Simei shuti runaca jatarishpa, paipaj burropi tiarinata churashpaca, paipaj servijcunata mascangapaj Gat shuti pueblopi causajuj Aquis shuti runapajman rirca. Chashna rishpami Simei shuti runaca, paipaj servijcunataca Gat pueblomanda pushamurca.

⁴¹Chai jipami Simei shuti runaca, Jerusalenmanda Gat puebloman rishpa, cutin tigramushcataca Salomonman villanajurca.

⁴²Chaimandami jatun mandajca, Simei shuti runata cayachun cachashpa, cashna nirca: —¿Nachu candaca: ‘Caimanda llujshishpa maimambash rishpaca, chai punllallatami huañuna cangui’ nishpa shinllita rimashpa, Mandaj Diospaj shutipi juramentuchircani? Chaitaca, canllata alimi yachangui nircanimi. Shina nijpimi cambash: ‘Alitami nihuangui, ñucaca chaita cazupashami’ nircangui.

⁴³Shina cashpaca, ¿imashpata Mandaj Diospaj ñaupajpi juramentushcatapash, can pactachijuchun nishpa ñuca mandashcatapash na pactachircangui?— nircami.

⁴⁴Shinallata jatun mandajca, Simei shuti runataca cashnatapashmi nirca: —Ñuca taita Davidta fiñashpa, tucui nalita rurashpa can llaquichishcataca, cambaj shungupica alimi yachangui. Mandaj Diosca, chai llaquitallatami cambajman tigrachishca.

⁴⁵Ashtahuangarin jatun mandaj Salomón ñucaca, bendiciai tucushcami casha. Chaimandami David mandashpa tiajushcapash, Mandaj Diospaj ñaupajpica, causaita causaicaman shinllipacha canga— nircami.

⁴⁶Chaimandami jatun mandajca, Joiada shuti runapaj churi Benaía shuti runata cacharca. Pai llujshishpa rishpami, Simei shuti runata chugrichishpa huañuchirca. Chashnami llactata mandanaca, Salomonbaj maquipi shinllipacha tucurca.