Read Imbabura Highland Quichua 1 REYES 21 Bible Online

1 REYES 21 - Imbabura Highland Quichua bible

1 REYES 21

¹Chashna tucushca jipacunallami, cashna tucurca: Jezreel shuti pueblopi causajuj Nabot shuti runami, Samaria llactata jatun mandaj Acab runa mandana huasi ladollapi uvasta tarpushca alpata charirca.

²Chaimandami Acab runaca, Nabot runataca cashna nirca: —Uvasta can tarpushca alpataca, yacuta jichashpa huertata rurangapaj cuhuai. Ñuca huasi ladollapi cajpimi, chashna nini. Chai alpamandaca, uvas tarpushca shuj ashtahuan ali alpatami cusha. Na cashpaca, cambaj ashtahuan ali cajpica, chai alpa mashna valijpipash culquita cushallami— nircami.

³Shina nijpimi Nabot runaca, Acab runataca cashna nirca: —Ñuca taitacuna carashca alpata canman cunataca, Mandaj Diosllata jarcahuachun— nircami.

⁴Jezreel shuti pueblopi causajuj Nabot runaca: “Ñuca taitacuna carashca alpataca, na cushachu” nishpa tigrachishcamandami, Acab runaca llaquirishpa fiñarishca, paipaj huasiman shamurca. Chaipimi, paipaj camapi sirijushpa, ñavita ladoman tigrachishpa, micungapajpash na munarca.

⁵Chashna cajpimi, Jezabel shuti paipaj huarmica, paipaj ladoman shamushpa cashna nirca: —¿Imashpata cambaj shungupica ninan llaquilla cashpa, micungapajpash na munangui?— nircami.

⁶Shina nijpimi, paica cashna nirca: —Jezreel pueblopi causajuj Nabot runahuan parlashpami, cashna nircani: ‘Uvasta tarpushca cambaj alpata cuhuai. Chai alpamandaca culquita, na cashpaca ashtahuan munajpica uvasta tarpushca shuj alpatallata cushallami’ nircanimi. Shina nijpimi paica: ‘Uvasta tarpushca ñuca alpataca na cushachu’ nihuarca— nircami.

⁷Shina nijpimi, Jezabel shuti paipaj huarmica, cashna nirca: —¿Nachu cunanga, canga Israel llactata jatun mandaj cangui? Jatarishpa micushpa cushijui. Jezreel pueblopi causajuj Nabot runapaj uvas tarpushca alpataca, ñuca cushallami— nircami.

⁸Chashna nishpami chai huarmica, Acab runapaj shutipi cartacunata escribichishpa, paipaj surtijashuanllata sellota churashpa, Nabot causajuj pueblopillata causanajuj mandaj rucucunaman, shuj mandajcunamambash cacharca.

⁹Chai escribishca cartacunapica, cashnami nijurca: “Na micunachu nishpa, villaichi. Chai jipaca, gentecunapaj ñaupajpi Nabot runataca churaichi.

¹⁰Shinallata: ‘Taita Diostapash, jatun mandajtapash nalicachishpami rimarcangui’ nishpa llullashpa villachun, jatun nalita ruraj ishcaipura runacunata paipaj ñaupajpi churaichi. Paicuna chashna villajpica, pueblomanda llujchishpa rumicunahuan pegashpa huañuchinguichi” nijurcami.

¹¹Chaimandami, Nabot runa causajuj pueblopillata causajcunapash, mandaj rucucunapash, shuj mandajcunapash, Jezabel huarmi mandashcashnallata ruranajurca. Chai cartacunapi escribishpa mandashcashnallatami ruranajurca.

¹²Na micunachu nishpa tandachishpami, Nabot runataca chai gentecunapaj ñaupajpi tiachinajurca.

¹³Chaipi tiajujpimi, jatun nalita ruraj ishcaipura runacuna shamushpa, chai runapaj ñaupajpi tiarirca. Chai jatun nali runacunami, Nabot runataca: “Cai Nabot runami Taita Diostapash, jatun mandajtapash nalicachishpa rimarca” nishpa, juchachishpa villanajurca. Shina villajpimi, pueblomanda canllaman llujchishpa, rumicunahuan huañuchirca.

¹⁴Chai jipami: “Nabot runaca, rumicunahuanmi huañuchi tucurca” nishpa, Jezabel huarmiman villachun cacharca.

¹⁵Nabot runataca, rumicunahuan huañuchishcata Jezabel yachashpami, Acab runataca cashna nirca: —Jezreel pueblopi causajushca, Nabot runapaj uvas tarpushca alpataca jatarishpa japigrilla. Chai alpataca, culquipajpash na jatungapaj munarcachu. Nabot runaca ña na causajunllu, ñami huañushca— nircami.

¹⁶Nabot runa huañushcata yachashpami Acab runaca, Jezreel pueblopi causashca Nabot runapaj uvas tarpushca alpata japingapaj jatarishpa urai rirca.

¹⁷Chaimandami Mandaj Diosca, Tisbe shuti pueblopi causajuj Eliasman cai shimicunata cashna nirca:

¹⁸“Israel llactata jatun mandaj Acab runahuan tuparingapaj jatarishpa urai ri. Paica, Samaria pueblopimi. Ricui paica, uvasta tarpushca Nabot runapaj alpapimi. Paica, chai alpata japingapajmi urai rishca.

¹⁹Paitaca cashna ningui: Mandaj Diosca, cashnami nin: ‘¿Nachu paita ña huañuchishpa, alpatapash quichushcangui?’ ningui. Cutin cashnatapash ningui: Mandaj Diosca, cashnami nin: ‘Maipimi Nabot runapaj yahuarta alcucuna lambirca, chaipillatami cambaj yahuartapash alcucuna lambinga, cambaj yahuartapachami lambinga’ ninmi ningui” nircami.

²⁰Chaimandami Acab runaca, Eliastaca: —Ñucata fiñaj runamari, caipi tuparij shamushcangui— nirca. Shina nijpimi Eliasca, cashna nirca: —Canllata jaturinshna, Mandaj Diospaj ñaupajpi nalita rurashcamandami, canhuan tuparij shamurcani.

²¹Diosca cashnami nin: ‘Ricui, cunanmi jatun llaquita cambaj jahuaman apamugrini. Cambaj miraicunataca, fichashpa shitanshnami tucuchisha. Acab runapaj huasi ucu purataca, shuj runatallapash na saquishpami, Israel llactapica servishpa causajcuna cajpi, na servishpa causajcuna cajpipash, tucuillata tucuchisha.

²²Cambaj huasi ucu purataca, Nabat runapaj churi Jeroboam runapaj huasi ucu puratashna, Ahías runapaj churi Baasa shuti runapaj huasi ucu puratashnami ruragrini. Ñucata na cazushpa, ñucata fiñachishcamanda, israelcunatapash juchata rurachishcamandami, chashna ruragrini’ ninmi.

²³Jezabel huarmimandapash, Mandaj Diosca cashnami nin: ‘Jezabel huarmitaca, Jezreel pueblo patapimi alcucuna micunga’ ninmi.

²⁴Acab runapaj mirai puramanda pueblopi huañujpica, alcucunami micunga. Pambapi huañujpica, jahuata rij alasyu animalcunami micunga— nircami.

²⁵(Mandaj Diospaj ñaupajpi, Acab runashna paipaj munai nalitalla ruraj runaca, napacha pipash tiarcachu. Jezabel shuti paipaj huarmi nali yuyaita cujpimi, chashna rurajurca.

²⁶Acab runaca, jatun millanayaicunatami rurajurca. Yanga dioscunata catishpami, amorreocuna tucui nalita rurashcashnallata rurashpa causajurca. Chai amorreocunataca, Mandaj Diosmi israelcunapaj ñaupajmanda llujchishpa cacharca).

²⁷Acab runaca, Elías chashna villajta uyashpami, pai churajushcata liquishpa, cañamuta churajurca. Shinallata ninanda llaquirishpa purijushpami, micuitapash na micushpa, chai cañamuta churajushcallata puñujurca.

²⁸Chaimandami Mandaj Diosca, Tisbe shuti pueblopi causajuj Eliasman, cai shimicunata cashna nirca:

²⁹“Ñuca ñaupajpi Acab runa ninanda llaquirijtaca, ¿nachu ricungui? Ñuca ñaupajpi chashna llaquirishcamandami, pai causajui punllacunapillataca, na llaquita cachamusha. Paipaj churi mandajui punllacunapimi, paipaj huasi ucu purataca llaquichisha” nircami.