Read Imbabura Highland Quichua 1 REYES 4 Bible Online

1 REYES 4 - Imbabura Highland Quichua bible

1 REYES 4

¹Jatun mandaj Salomonga, tucui israelcunatami mandajurca.

²Salomón churashca mandajcunaca, caicunami carca: Sadoc shuti curapaj churi Azariasca, curacunata mandajmi carca.

³Elihoref shuti runahuan, Sisa shuti runapaj churi Ahías shuti runahuanga, escribijcunami carca. Ahilud shuti runapaj churi Josafat runaca, paicunata mandajmi carca.

⁴Joiada shuti runapaj churi Benaía shuti runaca, soldadocunata mandajmi carca. Sadoc shuti, Abiatar shuti runacunaca, curacunami carca.

⁵Natán runapaj churi Azariasca, llactacunapi mandajcunata mandajmi carca. Natán runapaj churi Zabud shuti runaca, jatun mandajman ali yuyaicunata cuj, paipaj ali cumbami carca.

⁶Ahisar shuti runaca, mayordomomi carca. Abda shuti runapaj churi Adoniram shuti runaca, impuestota japijmi carca.

⁷Salomonga, tucui Israel llactapimi, chunga ishcai mandajcunata charirca. Paicunami jatun mandajmambash, paipaj huasipi causajcunamambash imata cashpapash apamuna carca. Paicunaca, huatapi cada quillapimi ima minishtirishcatapash, tucuicuna jatun mandajman shuj shuj apamunajurca.

⁸Chai mandajcunapaj shuticunaca, caicunami: Efraín urcupica, Hur shuti runapaj churimi mandajurca.

⁹Macaz, Saalbim, Bet-semes, Elón, Bet-hanán shuti pueblocunapica, Decar shuti runapaj churimi mandajurca.

¹⁰Arubot shuti pueblopica, Hesed shuti runapaj churimi mandajurca. Soco shuti pueblotapash, Hefer shuti tucui llactatapash, paillatami mandajurca.

¹¹Dor shuti tucui llactacunapica, Abinadab shuti runapaj churimi mandajurca. Paica, Tafat shuti Salomonbaj ushitami, paipaj huarmi cachun japirca.

¹²Ahilud shuti runapaj churi Baana shuti runaca, Taanac shuti, Meguido shuti pueblocunatapash, Saretán shuti pueblo ladolla tiajuj Bet-seán shuti tucuilla llactatapashmi mandajurca. Saretán shuti puebloca, Jezreel shuti pueblo ura ladomanmi carca. Bet-seán shuti pueblomandaca, Abel-mehola shuti pueblocaman, shinallata chimba lado Jocmeam shuti pueblocamambashmi mandajurca.

¹³Geber runapaj churica, Galaad llactapi tiaj Ramot pueblotami mandajurca. Paica, Galaad llactapi tiajuj Manasespaj churi Jair shuti runa rurachishca pueblocunatapashmi mandajurca. Shinallata Basán llactapi tiaj Argob shuti llactatapashmi mandajurca. Chai llactapica, pircacunahuan muyundi jarcashca sucta chunga pueblocunami tiarca. Chai pueblocunapaj pungucunaca, bronce aldabacunahuanmi carca.

¹⁴Iddo shuti runapaj churi Ahinadab shuti runaca, Mahanaim shuti pueblotami mandajurca.

¹⁵Ahimaas shuti runaca, Neftalí shuti llactatami mandajurca. Salomonbaj ushi Basemat shuti cuitsatapashmi, paipaj huarmi cachun japirca.

¹⁶Husai shuti runapaj churi Baana shuti runaca, Aser shuti llactatapash, Alot shuti pueblotapashmi mandajurca.

¹⁷Parúa shuti runapaj churi Josafat shuti runaca, Isacar llactatami mandajurca.

¹⁸Ela shuti runapaj churi Simei shuti runataca, Benjamín llactata mandachunmi churarca.

¹⁹Uri shuti runapaj churi Geber shuti runaca, Galaad llactatami mandajurca. Chai llactaca, amorreocunata jatun mandaj Sehón shuti runapaj, shinallata Basán llactata jatun mandaj Og shuti runapajpashmi carca. Chai llactapica, Geber shuti runallami mandajurca.

²⁰Judá llactapi, Israel llactapi causajcunaca, mama cucha manñapi tiaj t'iyu alpashna ashtacapachami carca. Paicunaca micushpa, ufiashpami cushijushpa causanajurca.

²¹Salomonga, Eufrates jatun yacu ladolla tucui llactacunamandaca, filisteocunapaj llacta ladocaman, chaimandaca Egipto llacta linderocamanmi mandajurca. Tucui chai llactapi causajcunami, Salomón huañungacaman imatapash cuna cashcata cushpa, paita servishpa causanajurca.

²²Salomonbaj imalla tiachunga punllandimi, patsaj quimsa chunga ishcai quintalta pezaj ashtahuan ali jacuta apamunajurca. Ishcai patsaj sucta chunga chuscu quintalta pezaj yangalla jacutapashmi apamunajurca.

²³Shinallata vira vira chunga huagratapash, michijpi viñashca ishcai chunga huagratapash, patsaj llamatapashmi apamunajurca. Tarugacunata, gacela shuti, corzo shuti tarugacunata, vira vira atalpacunatacarin na cuentashcachu carca.

²⁴Salomonga, Eufrates yacumandaca, indi huashajuj tucui ladotami mandajurca. Shinallata Tifsa shuti pueblomandaca, Gaza shuti pueblocamanmi mandajurca. Paimi, Eufrates yacumandaca, indi huashajuj ladoman tiaj llactacunata jatun mandajcunataca mandajurca. Chaimandami chai muyundi llactacunapi causajcunapash, na macanajushpa casilla aliguta causanajurca.

²⁵Salomón causajui tucui punllacunapica, Judá llactapi, Israel llactapi causajcunaca Dan pueblomanda, Beerseba pueblocamanmi, paicunapaj uvas yura ucupi, jigos yura ucupi casilla aligutapacha causanajurca.

²⁶Chai jahuapash Salomonga, caballocuna shayana huasicunapica, macanajuna carretacunata aisaj, chuscu chunga huaranga caballocunatami charirca. Caballopi tiarij, chunga ishcai huaranga soldadocunatapashmi charirca.

²⁷Chai chunga ishcai mandajcunami, jatun mandaj Salomonmambash, jatun mandaj Salomonbaj mezapi micungapaj tucui shamujcunamambash, imapash ama illachun ricuriashpa, quillapi quillapi apamunajurca.

²⁸Shinallata caballocunamambash, aparishpa purij shuj animalcunamambashmi, pai maipi cajpipash cebadata, ujsha jupata apashpa rinajuchun mandan carca. Shinami paicunaca, maijan apana urmajpipash, quillapi quillapi apanajurca.

²⁹Taita Diosca, alipacha yachaita, aligutapacha yarishpa causana yuyaitami Salomonman curca. Mama cucha manñapi tiaj t'iyu alpatashna, jatun yuyaitapashmi curca.

³⁰Salomonga, indi llujshij ladolla tucui llactacunapi causajcunata, Egipto llactapi causanajuj ninan yachajushca tucui runacunatapash ashtahuan yali yachajushcapachami carca.

³¹Paica, tucui runacunata yali ashtahuan ali yachajpachami carca. Ezraíta nishcapura Etán shuti runatapash, Mahol shuti runapaj Hemán, Calcol, Darda shuti churicunatapash yali alipacha yachajmi carca. Chaimandami paitaca, muyundi tucui llactacunapi causajcunaca rijsirca.

³²Salomonga yarichij shimicunataca, quimsa huaranga shimicunata, huaranga picha candanacunatami escribirca.

³³Shinallata yuracunamandapashmi yachachijurca. Líbano llactapi tiaj cedro quirumanda callarishpa, patapi viñaj hisopo shuti uchilla yuragucamanmi yachachijurca. Shinallata jatun animalcunamandapash, jahuata rij alasyu animalcunamandapash, llucashpa purij animalcunamandapash, pijicunamandapashmi yachachijurca.

³⁴Salomonbaj ali yachaita uyangapaca, tucui pueblocunapi causajcunapash, tucui llactacunamanda jatun mandajcunapashmi shamunajurca. Shinallata paipaj ali yachai maicamanlla uyarishcamandami shamunajurca.