Read Imbabura Highland Quichua 1 REYES 5 Bible Online

1 REYES 5 - Imbabura Highland Quichua bible

1 REYES 5

¹Tiro shuti pueblomanda jatun mandaj Hiram shuti runaca, Davidpaj tucui causaipimi, ninanda juyan carca. Chaimandami Salomonda, paipaj taita Davidpaj randi jatun mandaj cachun aceiteta talishpa javishcata yachashpaca, paita servijcunata cachamurca.

²Shinamandami Salomonbash, Hiram shuti runaman cashna nichun cacharca:

³“Ñuca taita Davidca, cai muyundi llactacunapi causajcunahuan macanajujushpami, paita Mandaj Taita Diospaj shutipi mañana huasita shayachitaca na usharca. Paita fiñajcunataca, Mandaj Diosllata ñuca taitapaj chaqui ucupi churangacamanmi, na shayachi usharca. Chaitaca, cambash yachanguimi.

⁴Cunanga, ñucata Mandaj Taita Diosmi, maipi cashpapash, aliguta casilla causachun churahuashca. Chaimandami maijan na ricunayachijpash illajpi, imata manllanapash illajpi causani.

⁵Shina cashcamanda ñucami, ñucata Mandaj Taita Diospaj shutipi mañana huasita shayachingapaj yarircani. Mandaj Diosmi, ñuca taita Davidtaca cashna nishca carca: ‘Can mandashpa tiajushcapica, cambaj churitami cambaj randi churasha. Paimi, ñuca shutipi mañana huasitaca shayachinga’ nishcami carca.

⁶Chashna cashcamanda cunanga, Líbano urcupi shayanajuj cedro quirucunata cuchuchun, canda servijcunata cachapai. Ñucata servijcunatapash, paicunahuanmi cachasha. Canda servijcunamandaca, mashna culquita cuhuai nijpipash cushallami. Ñucanchi puramandaca, maijanllapash Sidón llactapi causajcunashna, caspicunata labraitaca na yachanllu. Chaitaca, canllata alimi yachangui” nichunmi cacharca.

⁷Hiram shuti runaca, Salomón chashna nishcata uyashpami, ninandapacha cushijushpa cashna nirca: “Cunanga, Mandaj Diosca alicachi tucushca cachun. Paimi, cai tucui jatun llactata mandachunga, alipacha yachajushca churita Davidman cushca” nircami.

⁸Hiram shuti runapash, Salomonman cashna nichunmi cacharca: “Can imatalla nichun cachamushcatapash uyaparcanimi. Cedro caspicunata, ciprés caspicunata, can imata rurachun munajpipash, tucuita rurashallami.

⁹Chai caspicunataca ñucata servijcunami, Libanomandaca mama cuchacaman apanga. Chaimandaca, can maiman cachamui nijpipash, chai pushtucamanmi mama cucha yacutaca balsamopi cachamusha. Chaiman chayashpa pascajpi japinguilla. Shinallata cambash ñuca mañashcashnallata, ñuca familiacunaman micunata cachamungui” nichunmi cacharca.

¹⁰Chashnami Hiram shuti runaca, cedro caspicunata, ciprés caspicunataca, Salomón mashna munashcata curca.

¹¹Shinallata Salomonbash, Hiram shuti runamanga, pusaj huaranga pusaj patsaj quintal trigota, quimsa huaranga chuscu patsaj litro ashtahuan ali aceitetami, paipaj familiacuna micuchun cujurca. Chaicunataca Salomonga, cada huatami Hiram shuti runaman cujurca.

¹²Mandaj Diosca, Salomonman imashna nishcashnallatami, ali yachaita curca. Hiram shuti runahuan, Salomonhuanga casilla aligutami causanajurca. Paicunaca, chashna causangapajmi ishcandimanda ari ninajurca.

¹³Jatun mandaj Salomonga, tucui Israel llactapimi imatalla rurachingapaj tandanajuchun mandarca. Imatalla rurangapaj tandanajushcacunaca, quimsa chunga huaranga runacunami carca.

¹⁴Paicunataca, Líbano llactamanmi, chunga huaranga, chunga huaranga huashan huashan, quillapi quillapi cachajurca. Chashnami paicunaca shuj quillataca, Líbano llactapi ishcai quillataca, paicunapaj huasipi yalinajurca. Imatalla rurangapaj tandanajushcacunata ricushpa mandangapaca, Adoniram shuti runami mingai tucushca carca.

¹⁵Salomonga aparijcunatapash, canchis chunga huaranga runacunatami charirca. Urcupi rumita labrajcunatapash, pusaj chunga huaranga runacunatami charirca.

¹⁶Imatalla ruranajuj gentecunata ricushpa mandachun, Salomón churashca, quimsa huaranga quimsa patsaj mandajcunataca, na cuentashcachu carca.

¹⁷Jatun mandajca, Diospaj huasi callaripi churangapaca, ashtahuan jatun, ashtahuan valishca, ali labrashca rumicunatami apamuchun cacharca.

¹⁸Huasichinata yachaj runacunaca, Salomonbaj runacunapash, Hiram shuti runapaj runacunapash, Gebal shuti pueblomanda runacunapashmi carca. Paicunami, caspicunata cuchushpa huasita rurangapajpash, rumita labrashpa alichinajurca.