Read Imbabura Highland Quichua 1 REYES 6 Bible Online

1 REYES 6 - Imbabura Highland Quichua bible

1 REYES 6

¹Israelcuna, Egiptomanda llujshimushca chuscu patsaj pusaj chunga huata jipami Salomonbash, Israel llactataca ña chuscu huatata mandai callarijurca. Chai huatapaj Zif shuti ishcai quillapimi, Mandaj Diospaj huasitaca shayachi callarirca.

²Mandaj Diosman, jatun mandaj Salomón shayachishca huasica, ishcai chunga canchis metro largomi carca. Shinallata iscun metro anchomi carca, vichaiman medijpica, chunga quimsa metro chaupimi carca.

³Diospaj huasi ñaupajman tiajuj corredorca, Diospaj ucu largoshnallatami, iscun metrota charirca. Shinallata Diospaj ucu ñaupajpica, chuscu metro chaupi anchomi carca.

⁴Diospaj huasi ventanacunataca, ucuman anchota canllaman quichijitami rurachirca.

⁵Shinallata chai huasi jatun pircapi quimichishpami, uchilla ucucunatapash muyundipi rurachirca. Diospajlla shicanyachishca ucu pata muyundipipashmi, chashnallata ucucunata rurachirca.

⁶Pirca muyundipi tiajuj callari ucuca, ishcai metro ishcai chunga picha centímetro anchomi carca. Chai ucupaj jahuapi tiajuj ucuca, ishcai metro canchis chunga centimetromi carca. Chai ishcai ucupaj jahuaman tiajuj ucuca, quimsa metro chunga picha centimetromi carca. Huasi canlla lado patacunataca, quichijiyachishpami rurashca carca. Diospaj huasi patacunapi caspicunata ama marcachishpa churangapajmi, chashna rurashca carca.

⁷Diospaj huasita shayachingapaca, rumicunatapash ña aliguta rurashcatallami apamurca. Chaimandami huasita rurajujpica tacana jirrucuna, jachacuna, imatalla rurana shuj jirrucuna tsilinlla huacajpash na uyarirca.

⁸Chaupi altibajopi tiaj ucuman yaicuna punguca, Diospaj huasi ali ladomanmi carca. Chaupi altibajoman, vichai ringapajpash, chai altibajomanda ashtahuan jahua altibajoman vichai ringapajpash, muyushpa vitsiana gradastami rina carca.

⁹Salomonga, Diospaj huasita labrashpa tucuchishpaca, cedro caspicunahuanmi jahuacunataca, juyaillaguta rurashpa quilparca.

¹⁰Shinallata Diospaj huasi tucuilla muyundipica, ishcai metro ishcai chunga picha centimetrota charij huasicunatami shayachirca. Chai huasicunaca, Diospaj huasi pircapi cedro caspicunahuan marcachishcami carca.

¹¹Chai jipami Mandaj Diosca, Salomonda cashna nirca:

¹²“Can shayachishca cai huasimandaca, caitami ningapaj munani: Ñuca escribishcacunata cazushpa, ñuca villachishcacunata uyashpa, ñuca mandashca shimicunata tucuita pactachishpa aliguta causajpica, cambaj taita Davidman ñuca imatalla nishcataca, canhuanmi pactachisha.

¹³Shinallata cai huasipimi, israelcunapaj chaupipi causasha. Ñuca agllashca israelcunataca, napacha saquishachu” nircami.

¹⁴Shinami Salomonga, Diospaj huasitaca labrashpa tucuchirca.

¹⁵Diospaj huasi ucu pircacunataca, caspihuanlla rurashca quedachunmi, ucu alpamandapacha jahua vigas caspicunaman chayajta, cedro tablacunahuan tucuillata quilparca. Ucu alpataca, ciprés tablacunahuanmi quilparca.

¹⁶Shinallata chai huasi ucu juchumanmi, ucu alpamandapacha jahuacaman iscun metro jatun ucuta cedro tablacunahuan rurarca. Chashnami Diospaj huasi ucupica, Diospajlla shicanyachishca cachun, shuj ucuta rurarca.

¹⁷Chai ucu shayajuj Diospaj huasi ñaupa lado ucuca, chunga pusaj metro largomi carca.

¹⁸Diospaj huasi ucu pircacunataca, cedro tablacunahuan quilpashcami carca. Chai tablacunapica, sachapi tiaj calabaza nishca yuracunata, sisa botongunata, juyaillaguta labrashcami carca. Cedro tablacunahuan tucuilla quilpashca cashpami, shuj rumillapash na ricurijurca.

¹⁹Mandaj Dioshuan ari nishpa escribishcata alichina arcata alichingapaca, huasi chaupipi Diospajlla shicanyachishca ucutami juyaillagutapacha rurachirca.

²⁰Diospajlla shicanyachishca ucuca largomambash, anchomambash, jatunmambash iscun metrotami charirca. Chai ucutaca, ashtahuan ali orohuanmi quilparca. Cedro caspicunahuan rurashca Diospaj altartapash, orohuanmi quilparca.

²¹Shinami Salomonga, Diospaj huasi ucutaca ashtahuan ali orohuan quilparca. Diospajlla ucutapash orohuan quilpashpami, chai ucuman yaicuna pungutapash oro cadenacunahuan jarcarca.

²²Diospaj huasi ucutaca, tucuillatami jahuamandapacha ucu alpaman chayajta, orohuan quilparca. Diospajlla shicanyachishca ucu chimba purapi tiajuj altartapash, tucuillatami orohuan quilparca.

²³Shinallata Diospajlla shicanyachishca ucupi churangapaca, ishcai querubín nishcacunatami, olivos caspimanda rurarca. Chaicunaca, chuscu metro chaupi altomi carca.

²⁴Shuj querubinbaj shuj alasca, ishcai metro ishcai chunga picha centimetrotami charirca. Caishuj alaspash, chashnallatami carca. Shuj alas pundamanda caishuj alas pundacamanga, chuscu metro shuj chaupimi carca.

²⁵Shinallata caishuj querubinbash, chuscu metro chaupitami charirca. Ishcandillatami chashna carca. Shinallata ishcandillatatami, chashna chashnatapacha rurashca carca.

²⁶Shuj querubinga, chuscu metro chaupi jatunmi carca. Caishuj querubinbash, chashnallatami carca.

²⁷Chai querubingunataca, Diospaj huasipi tiaj, Diospajlla shicanyachishca ucupimi churarca. Paicunapaj alastaca, shujpaj shuj alastaca pircaman chayajta, caishujpaj shuj alastapash chaishuj lado pircaman chayajta churashcami carca. Caishuj ishcai alascunahuanga, chaupi ucupimi alaspura tuparinajurca.

²⁸Chai querubingunatapash, orohuanllatami jahualla quilparca.

²⁹Diospaj huasi tucuilla muyundi pircataca canllamambash, ucumambash juyaillaguta shican shicanda labrashcami carca: Querubingunata, palmera quirucunata, sisa botongunatami juyaigullata labrashca carca.

³⁰Chai huasi ucu alpatapash, canlla ladotapashmi orohuan quilparca.

³¹Diospaj huasiman yaicuna pungucunataca, olivos caspicunahuanmi rurarca. Vichaiman shayachishca caspicuna, quinraiman churashca caspicunaca, picha ladotami charirca.

³²Ishcandi pungucunatami, olivos caspimanda rurashca carca. Chai pungucunapica, querubingunata, palmera quirucunata, sisa botongunata labrashpami, orohuan quilparca. Chashnami chai pungupi rurashca querubingunata, palmera quirucunataca, orohuan jahualla quilparca.

³³Diospaj huasi punguta shayachina caspicunatapash, chashnallatami olivos caspicunata cuadradota rurashpa shayachirca.

³⁴Ashtahuangarin chai ishcai pungucunaca, ciprés caspicunata rurashcami carca. Shuj pungupaj ishcandi lado pungucunami, muyunlla carca. Chaishuj pungupaj ishcandi lado pungucunapashmi, muyunlla carca.

³⁵Chai pungucunapipashmi querubingunata, palmera quirucunata, sisa botongunata labrarca. Chai jipami, chai labrashcacunataca aligutapacha orohuan quilparca.

³⁶Shinallata Diospaj huasi ucuman tiaj patiopica, labrashca rumicunahuanmi quimsa jila patata rurarca. Chai jahuapimi shuj jilataca, cedro caspihuan rurarca.

³⁷Ña chuscu huatata Salomón mandajujpimi, Zif shuti quillapi, Mandaj Diospaj huasita shayachingapaj callari rumicunata churarca.

³⁸Chai huasitaca, chunga shuj huatata ña mandajujpimi, Bul shuti pusaj quillapi, tucuilla shayachishpa tucuchirca. Chaipi imalla tianatapash, chaipi imalla minishtirinatapashmi, canchis huatapi shayachishpa tucuchirca.