Read Imbabura Highland Quichua 1 REYES 7 Bible Online

1 REYES 7 - Imbabura Highland Quichua bible

1 REYES 7

¹Chai jipaca Salomonga, pai causana huasita shayachishpaca, chunga quimsa huatapimi tucuilla tucuchirca.

²Shinallata shuj huasitapashmi, Líbano urcumanda caspicunahuan rurarca. Chai huasica, chuscu chunga picha metro jatunmi carca. Anchoca, ishcai chunga ishcai metro chaupimi carca. Vichaiman medijpica, chunga quimsa metro chaupimi carca. Chai huasitaca, cedro caspita rurashca pilarcunata, chuscu jilata shayachishpami rurarca. Chai jahuapimi, cedro caspicunatallata quinraiman sirichishpa churarca.

³Chai pilarcunataca, tucui jilapimi chunga picha, chunga picha shayachirca. Tucuimandaca, chuscu chunga picha pilarcunami carca. Chai pilarcunapi quinraiman sirinajuj caspicunaca, cedro tablacunahuan jahualla quilpashcami carca.

⁴Shinallata quimsa jila ventanatapashmi rurarca. Chai ventanacunaca quimsa jila, quimsa jila rurashcami chimbapura tianajurca.

⁵Chai huasi pungucunapash, pilar caspicunapash tucuillami, chuscu ladota charirca. Ventanacunapash, quimsa jila quimsa jila rurashcami chimbapura tianajurca.

⁶Shinallata pilarcunata shayachishpami, shuj corredorta rurarca. Chai corredorca, ishcai chunga ishcai metro chaupi jatunmi carca. Anchoca, chunga quimsa metro chaupimi carca. Chai corredortaca, punda shayachishca corredor chimba purapimi shuj pilarcunahuan, shuj caspicunahuan shican rurarca.

⁷Shinallata fiñanajuita alichingapaj tiarinata churangapajmi, shuj shuj corredorta rurarca. Chai corredorpimi, fiñanajushcata alichina carca. Chaitaca, alpamandapacha jahua caspicunaman chayajtami, cedro tablacunahuan quilparca.

⁸Salomón causajuj huasitapash, chaishuj patio huashamanmi, chashna chashnatallata corredorcunahuan rurashca carca. Shinallata Faraonbaj ushi, Salomonbaj huarmimambash, chai corredorhuan huasitashnallatami shayachirca.

⁹Tucui chai rurashcacunami ucu callarimanda, jahua tucuri pircacaman, canlla ladomambash, ucu ladomambash, canlla ladomanda ucu jatun patiocaman valishca rumicunahuan aligutapacha rurarca. Chai rumicunaca, imashna medina cashcashnallata aliguta medishpa, sierracunahuan cuchushpa shinllita churashcami carca.

¹⁰Callaripi churashca rumicunaca, ashtaca valishca jatun mulun rumicunami carca. Chai rumicunaca, chuscu metro shuj chaupi metrota, quimsa metro sucta chunga centimetrota charijcunami carca.

¹¹Chaimanda jahuamambash, chashnallata imashna medina cashcashnallata aliguta labrashpa rurashca valishca rumicunata, cedro caspicunata churashcami carca.

¹²Chai jatun patio muyundipica, quimsa jilatami labrashca rumicunahuan, shuj jilataca cedro caspicunahuan pircashpa rurashca carca. Mandaj Diospaj ucu ladoman tiaj patiotapash, pilaracunahuan shayachishca huasi ucu patiotapash, chashnallatami rurashca carca.

¹³Jatun mandaj Salomonga, Tiro shuti pueblopi causaj Hiram shuti runata pushamuchunmi cacharca.

¹⁴Paica, Neftalí aillu puramanda shuj sapalla mamagupaj churimi carca. Paipaj taitaca, bronceta imatalla ruranata yachaj runami carca. Paica, Tiro pueblomandami carca. Hiram runapash, bronceta imatalla rurangapaca, ali yachaj, ali yuyaita charij, ali yachajushcami carca. Paica, jatun mandaj Salomonbajman shamushpami, tucui imatalla ruranata rurarca.

¹⁵Paica, bronceta yacuyachishpami, ishcai pilarcunata rurarca. Chai pilarcunata vichaiman medijpica, pusaj metro chunga centimetromi carca. Muyundita medijpica, picha metro chunga centímetro racumi carca.

¹⁶Shinallata chai pilar umapi churangapajpash bronceta yacuyachishpami, capitel nishcacunata ishcaita rurarca. Chai capitelcunaca ishcandillatami, ishcai metro ishcai chunga centímetro carca.

¹⁷Chai pilar umapi churashca capitelcunapi churangapaca, linllitashnalla chambashcapash, cadenatashnalla rurashca racuta caupushca puchacunapashmi tiarca. Shuj capitelpajpash canchista, caishuj capitelpajpash canchistami rurashca carca.

¹⁸Shinallata chai capitelcunata quilpangapaca, granadilla nishcacunatami linlli muyundipi ishcai jilata rurarca. Chaishuj capitelpipash, chashnallatami rurarca.

¹⁹Diospaj huasi corredorpi shayanajuj pilar umapi churashca capitelcunaca, lirio shuti sisashnallami carca. Chaicunaca, shuj metro pusaj chunga centimetromi carca.

²⁰Chai ishcai pilar umapi churashca capitelcunaca, ishcai patsaj granadillata linlli jahuapi, ishcai jilata muyuchishpa churashcami carca. Chaishuj capitelpash, chashnallatami carca.

²¹Chai ishcai pilarcunataca, Diospaj huasi corredorpimi shayachirca. Ali ladoman shayachishca pilartaca, Jaquín shutitami shutichirca. Lluqui ladoman shayachishca pilartaca, Boaz shutitami shutichirca.

²²Chai ishcai pilar umacunapica, lirio sisacunatashnalla labrashcatami churarca. Chashnami, chai pilarcunata ruraita tucuchirca.

²³Shinallata mama cucha nishcatapashmi, bronceta yacuyachishpa alipacha redondota rurachirca. Chaica, shuj ladomanda chaishuj ladocaman medijpica, chuscu metro chaupimi carca. Vichaiman medijpica, ishcai metro ishcai chunga picha centimetromi carca. Racuta caupushca puchahuan muyundita medijpica, chunga quimsa metro chaupimi carca.

²⁴Chai mama cucha nishca ucu ladopica, muyundipimi calabazashnalla bolacunata ishcai jilata rurashca carca. Chai bolacunataca, chuscu chunga picha centímetro carupimi, chunga calabazashnallacunata chai mama cucha nishca muyundipi churashca carca. Chaicunataca, mama cucha nishcahuan tandachishpa yacuyachishpami, shujllata rurashca carca.

²⁵Chaica, chunga ishcai huagracunapaj jahuapimi tiajurca. Chai huagracunaca, quimsaca vichaiman, shuj quimsaca, indi huashajuj ladoman, caishuj quimsaca uraiman, chaishuj quimsaca indi llujshimuj ladomanmi ricushpa shayanajurca. Chai mama cucha nishcaca, chai huagracunapaj jahuapimi tiajurca. Shina cajpimi, paicunapaj huashacunaca ucu ladoman carca.

²⁶Chai mama cucha nishcataca, canchis centímetro chaupi racutami rurashca carca. Chai mama cucha nishcapaj muyundipica, shuj copapaj shimishnalla, na cashpaca lirio sisa shimishnallami carca. Chaipica, sucta chunga pusaj huaranga litro yacutami apan carca.

²⁷Shinallata yacuta churana bronce carretacunatapashmi, chungata rurarca. Chaicunaca anchomambash, jahuamambash shuj metro pusaj chunga picha centimetromi carca. Vichaiman medijpica, shuj metro quimsa chunga picha centimetromi carca.

²⁸Chai carretacunaca, cashnami carca: Tablacunata churashcami carca. Chai tablacunataca, bronceta rurashca vichai charijuj marcopimi churashca carca.

²⁹Chai carretacunapaj marcocunapi jahualla churashca tablacunapica leongunata, huagracunata, querubingunata rurashcami carca. Shinallata chai carretacunapaj marcocunapica leongunapaj, huagracunapaj jahua ladomambash, ura ladomambash guirnalda nishcacunata juyaillaguta rurashcami carca.

³⁰Tucui carretacunallatami, broncetallata rurashca chuscu ruedata charirca. Chai ruedacunata churachina ejecunapash, broncellatami carca. Ruedacunata churachishca chaquipipash, carreta tanqueta vichai charichunmi, yacuyachishpa chuscundi ladoman repisa nishcacunata churarca.

³¹Chai carretacunapi tiajuj tanquecunapaj shimicunaca, chuscu chunga picha centimetrota vichai llujshishca redondomi carca. Chai shimi pundataca, juyaillaguta rurashcami carca. Chaita vichaiman charichun, tablacunata churashpa rurashca carretata jahuaman medijpica, sucta chunga pusaj centimetromi carca. Marcocunahuan rurashca chai cajonga cuadradomi carca, na redondochu carca.

³²Chai carretacunapaj chuscundi ruedata churana ejecunaca, carreta chaquipillata rurashcami carca. Chai ruedacunata vichai medijpica, sucta chunga canchis centímetro chaupimi carca.

³³Chai ruedacunaca, macanajuna carretapaj ruedashnallami carca. Ruedacunapaj ejecunata, rayo nishcacunata, cubo nishcacunata, cincho nishcacunataca, tucuillatami yacuyachishpa rurashca carca.

³⁴Chai carreta chuscundi ladopi churashca repisa nishcacunaca, chai carretapillatami rurashca carca.

³⁵Chai carreta jahuapica, shuj ruedashnallami tiarca. Chaita vichaiman medijpica, ishcai chunga ishcai centímetro chaupimi carca. Chai carreta jahuapi churashca ruedashnallapash, tablacunapash, chai carretapillata rurashcami carca.

³⁶Tablata churana marcocunapi, tablacunapica, querubingunata, leongunata, palmera quirucunatami labrarca. Maipi chashna labranalla pushtu tiashcapimi, chashna rurarca. Chai muyundipica, ashtahuan imapash juyaillagucunatami rurarca.

³⁷Chashnami chai chunga carretacunataca, chashna chashnatallata chai puratallata yacuyachishpa, chashnatallata labrashpa rurarca.

³⁸Shinallata broncetallatami, chunga tanquetapash rurarca. Chaicunaca, tucui tanquecunami huaranga chuscu patsaj pusaj chunga litro yacuta apan carca. Vichaiman medijpica, shuj metro pusaj chunga centimetromi carca. Chai tanquecunataca, chai chunga carretacunapaj jahuapimi, shuj shujlla churarca.

³⁹Chashna churashpaca, Diospaj huasi ucupimi pichataca ali ladoman, shuj pichataca lluqui ladoman churarca. Mama cucha nishcataca, chai huasi ladomanmi indi llujshimuj lado, ura ladoman churarca.

⁴⁰Shinallata Hiram runaca, jatun pailacunata, tenazacunata, jatun tastacunatapashmi rurarca. Chashnami, Mandaj Diospaj huasipi imatalla ruranacunataca, Salomonman tucuillata rurashpa tucuchirca.

⁴¹Ishcai jatun pilarcunatapash, chai pilar umapi churashca capitel nishcacunatapash, Hiram runallatami rurarca. Shinallata ishcai linllitapashmi rurarca. Chai linllicunaca, jatun pilar umacunapi churashca capitelcunata quilpachishcami carca.

⁴²Granadilla nishcacunatapash, ishcai linllicunapajmi, chuscu patsajta rurarca. Chai granadillacunataca, chai pilarcunapaj umapi churashca capitelcunata muyundi quilpachingapajmi, tucui linllecunapi ishcai jilata huarcurca.

⁴³Shinallata chunga carretatapash, chai carretacunapi churashca chunga tanquetapashmi rurarca.

⁴⁴Mama cucha nishcatapash, chai mama cucha nishcata vichai huandushca shayanajuj chunga ishcai huagratapashmi rurarca.

⁴⁵Calderocunata, palacunata, jatun tastacunatapashmi rurarca. Mandaj Diospaj huasipi imata charinacunataca, punchayachishca broncehuanmi Hiram runaca, jatun mandaj Salomonman rurarca.

⁴⁶Chai tucui charinacunataca jatun mandajca, Sucot shuti pueblohuan, Saretán shuti pueblohuan chaupipimi, Jordán yacu ladopi tiaj quillu alpa pambapi rurachirca.

⁴⁷Chai tucui charinacunata rurashcacunaca ashtacapacha cajpimi, broncecuna mashnata pezajtaca, Salomonga na yachai usharca.

⁴⁸Shinami Salomonga, Mandaj Diospaj huasipi tucui imatalla charinacunataca rurachirca: Oro altarta, orotallata rurashca mezatapashmi rurachirca. Chai mezapimi, Diosman carana tanda tiajurca.

⁴⁹Shinallata Diospajlla shicanyachishca ucu chimba purapica, ashtahuan ali oro candelerocunatami, pichataca ali ladoman, caishuj pichataca lluqui ladoman churarca. Chaicunapica, orota rurashca sisacunandi, lamparacunandi, tenazacunandimi churarca.

⁵⁰Shinallata funducunata, pavizata anchuchinacunata, uchilla tastacunata, cucharacunata, incensariocunataca, ashtahuan ali orohuanmi rurarca. Diospaj huasi ucupi tiaj pungu muyunacunata, Diospajlla shicanyachishca ucuman yaicuna jatun pungu muyunacunata, Diospaj huasiman yaicuna jatun pungu muyunacunatapash orohuanllatami rurarca.

⁵¹Mandaj Diospaj huasipaj, jatun mandaj Salomón rurangapaj munashcataca, chashnami tucuillata rurashpa tucuchirca. Chai jipami Salomonga, Diospajlla cachun, paipaj taita David shicanyachishca orota, culquita, ashtahuan ima charishcacunataca, Mandaj Diospaj huasiman aparca. Chaipimi, imatalla charinacunata alichina ucucunapi churarca.