Read Imbabura Highland Quichua 1 REYES 9 Bible Online

1 REYES 9 - Imbabura Highland Quichua bible

1 REYES 9

¹Salomonga, Mandaj Diospaj huasitapash, pai mandashpa tiajuna huasitapash, tucui imatalla rurangapaj yarijushcatapashmi rurashpa tucuchirca.

²Shina tucuchishca jipami Mandaj Diosca, Gabaón pueblopi ricurishcashnallata, Salomonman cutin ricurirca.

³Chaipimi Mandaj Diosca, cashna nijurca: “Ñuca ñaupajpi can ninanda mañajujtaca uyarcanimi. Causaita causaicaman ñuca shuti chaipi causajuchun, can shayachishca cai huasitapash, ñucapajlla cachun chasquircanimi. Cai huasitaca, punllandi ricuriajushallami, ñuca shungupipash yariajushallami.

⁴Cambaj taita Davidshnalla, tucui shunguhuan ñucata ali cazushpa, shinallata tucuipaj ali cachun rurashpa ñuca mandashcacunata, ñuca escribichishca shimicunata, imatapash rurachun ñuca mandashcacunata pactachishpa causangui.

⁵Shina causajpica, ñucallatami Israel llactata mandangapaj can tiarinataca, cambaj taita Davidman villashcashnallata, causaita causaicaman shinllitapacha churasha. Paimanmi cashna nircani: ‘Cambaj mirai puramandaca, israelcunata mandangapaj tiarinapi tiarij runaca na illangachu’ nircanimi.

⁶Ashtahuangarin cangunapash, cangunapaj churicunapash shinlli shungu tucushpa, ñuca mandashcacunata, ñuca escribichishca shimicunata na cazushpa, shuj dioscunatara servishpa, chaicunata ninanda alicachishpa causajpica,

⁷ñucami israelcunataca, paicuna causachun ñuca carashca llactamanda llujchishpa cachasha. Shinallata ñuca shutipi mañana ñucapajlla cachun shicanyachishca cai huasitapashmi, ñuca ñaupajmanda anchuchisha. Chashna rurajpimi israelcunataca, shuj llactacunapi causajcunaca yarichina shimicunahuan parlashpa asinajunga.

⁸Ninanda alicachishpa charishca cai huasitaca urmashcata ricushpami, maijambash chaita yalijushpaca manllaringa. Chaimandami asishpa ricushpa, cashna ninga: ‘¿Mandaj Diosca, imashpata cai llactatapash, cai huasitapash chashna llaquichishcayari?’ ningami.

⁹Shina nijpimi, cashna ninajunga: ‘Paicunapaj ñaupa taitacunata Egipto llactamanda llujchimuj, paicunata Mandaj Taita Diosta saquishpami, shuj dioscunatara juyanajurca. Chaicunatami ninanda alicachishpa, servishpa causanajurca. Chaimandami Mandaj Diosca, cai tucui llaquita paicunapaj jahuapi cachamushca’ ninajungami” nijurcami.

¹⁰Ishcai chunga huata yalishca jipami, cashna tucurca: Salomonga, ishcai huasitapash, Mandaj Diospaj huasitapash, mandashpa tiajuna huasitapashmi rurashpa tucuchishca carca.

¹¹Chai huasicunapaca, Tiro shuti llactata jatun mandaj Hiram shuti runami, cedro caspicunata, ciprés caspicunata Salomonman cachamurca. Orotapash, mashnata munashcatami curca. Chaimandami jatun mandaj Salomonga, Galilea llactapi tiaj ishcai chunga pueblocunata, Hiram runaman curca.

¹²Shina cujpimi, Tiro shuti llactamanda Hiram shuti runaca, Salomón cushca pueblocunata ricungapaj llujshirca. Chai pueblocunataca, na munarcachu.

¹³Chaimandami: “Ñuca huauquilla, ¿can cushca cai pueblocunaca, imapajta aliyari?” nirca. Shina nishpami, chai pueblocuna tianajuj llactataca, Cabul shutita shutichirca. Cunangamanmi chai shutillata.

¹⁴Hiram shuti runaca, pusaj chunga shuj quintal chaupi yali orotami, Salomonman cachamushca carca.

¹⁵Jatun mandaj Salomonga, Mandaj Diospaj huasitapash, paipaj huasitapash, Milo nishcatapash, Jerusalén muyundi jatun pircatapash, Hazor, Meguido, Gezer shuti pueblocunatapash rurachingapajmi, runacunata tandachirca.

¹⁶Egipto llactata jatun mandaj Faraon vichai shamushpami, Gezer pueblotaca macanajushpa quichushca carca. Chai pueblota rupachishpami, chaipi causanajushca cananeocunatapash huañuchishca carca. Chai pueblotaca, paipaj ushi, Salomonbaj huarmimanmi curca.

¹⁷Chaimandami Salomonga, Gezer shuti pueblotapash, ura ladoman tiaj Bet-horón shuti pueblotapash,

¹⁸jichushca pambapi tiaj Baalat shuti, Tadmor shuti pueblocunatapash, cutin shayachirca.

¹⁹Shinallata imacunatalla Salomón charishcacunata alichina tucui pueblocunatapash, macanajuna carretacunata alichina pueblocunatapash, caballocunata charina pueblocunatapashmi, cutin shayachirca. Jerusalenbi, Líbano llactapi, pai mandajuj tucui llactacunapi shayachingapaj munashcataca, tucuitami rurarca.

²⁰Amorreo, heteo, ferezeo, heveo, jebuseo nishca puracunamanda puchushca gentecunahuanmi, chashna rurachirca. Paicunaca, na israelcunachu carca.

²¹Paicunapaj jipa miraicunata, israelcuna na tucuilla tucuchi ushajpi, chai llactapi quedashcacunataca, Salomonga cunan punllacamanmi, impuestota japishpa servichishpa charin.

²²Ashtahuangarin Salomonga, israelcunataca shujllatapash chashna servijcuna cachunga, na churarcachu. Paicunataca, macanajuj soldadocuna cachun, paita servijcuna cachun, na cashpaca mandajcuna cachun, soldadocunata mandajcuna cachun, carretacunapi purij soldadocunata mandajcuna cachun, na cashpaca caballopi tiarij soldadocuna cachunmi churarca.

²³Chai runacunata ricushpa mandachun Salomón churashca mandajcunaca, picha patsaj picha chunga mandajcunami carca. Paicunami, chaipi imatalla ruranacunata rurajcunataca mandanajurca.

²⁴Faraonbaj ushica, Davidpaj pueblomanda vichai rishpami, Salomón paiman rurashpa cushca paipaj huasipi causagrirca. Chaimandami Salomonga, Milo nishca pushtutapash rurachirca.

²⁵Salomonga, chai huasita rurashpa tucuillata tucuchishca jipaca, Mandaj Diosman paillata rurashca altar jahuapimi, huatapi quimsa viajeta animalcunata Diosman cushpa tucuilla rupachijurca. Shinallata Dioshuan ali cangapajpash, animalcunata cushpami huañuchijurca. Inciensotapashmi, Mandaj Diospaj ñaupajpi tiajuj altarpi cushnichijurca.

²⁶Jatun mandaj Salomonga, jatun barcocunatapashmi rurachirca. Chai barcocunataca, Elot shuti pueblo ladollapi tiaj Ezión-geber shuti pueblopimi rurachirca. Chai pueblocunaca, Edom llacta ladollapi tiaj Puca Cucha manñapimi.

²⁷Hiram shuti runaca, chai barcocunapimi mama cuchapi barcota purichinata ali yachaj, paipaj runacunata Salomonda servijcunahuan cacharca.

²⁸Paicunami, Ofir shuti llactaman rishpa, chai llactamandaca ishcai patsaj pusaj chunga picha quintal orota apamushpa, jatun mandaj Salomonman cunajurca.