Read Imbabura Highland Quichua 2 REYES 10 Bible Online

2 REYES 10 - Imbabura Highland Quichua bible

2 REYES 10

¹Acab runaca, Samaria pueblopica, canchis chunga churicunatami charirca. Chaimandami Jehú shuti runaca, Jezreel pueblota mandajcunaman, mandaj rucucunaman, Acab runapaj churicunata yachachij runacunaman, shuj cartata escribishpa, Samaria puebloman cacharca. Chai cartacunapica, cashnami nijurca:

²“Cangunami, cangunata mandajpaj churicunataca charinajunguichi. Shinallata macanajuna carretacunata, caballopi tiarij soldadocunata, macanajunacunatapashmi charinajunguichi. Canguna causanajuj pueblopash, jatun pircahuan muyundi jarcashcami. Shina cashcamanda cai cartacuna cangunapajman chayajhuanmi,

³cangunata mandajpaj churi puramanda ashtahuan ali yuyaita charijta agllana canguichi. Paitaca, paipaj taita mandashpa tiarinapimi churana canguichi. Chai jipaca, cangunata mandajpaj huasi ucu puramanda macanajuichi” nijurcami.

⁴Chashna nijujta ricushpami, paicunaca ninandapacha manllarishpa cashna ninajurca: “Ricuichi, ishcaipura jatun mandajcunapash, na macanajui usharcachu. Ñucanchicarin, ¿imashnata ushashunyari?” ninajurcami.

⁵Chaimandami mayordomopash, chai pueblota mandajpash, mandaj rucucunapash, Acab runapaj churicunata yachachijcunapash, Jehú shuti runaman cashna nichun cachanajurca: “Ñucanchica canda servijcunami canchi. Shina cashcamanda can imata rurachun mandajpipash, rurashunllami. Jatun mandaj cachunga, maijandapash na churashunllu. Cambi ali canata ricushpa rurailla” nichunmi cachanajurca.

⁶Shina nichun cachajpimi Jehú shuti runaca, cutin shuj cartata escribishpa, cashna nishpa cacharca: “Ñucahuan tandanajushpa, ñuca mandashcata cazungapaj munashpaca, caya cai horasllata cangunapaj amopaj jari churicunapaj umacunata apashpa, Jezreel shuti puebloman ñucapajman shamuichi” nishpami cacharca. Jatun mandajpaj canchis chunga churicunaca, chai pueblota mandajcunahuanmi carca. Paicunaca, chai mandajcunahuanmi viñashca carca.

⁷Chai cartacuna paicunapajman chayajpimi, jatun mandajpaj canchis chunga churicunata japishpa, cungata muchurca. Chai umacunataca, canastacunapi churashpami, Jezreel puebloman cacharca.

⁸Chaimandami, shuj villaj runaca: —Jatun mandajpaj churicunapaj umacunataca, ñami apamushca— nishpa villarca. Shina villajpimi Jehú shuti runaca, cashna nirca: —Puebloman yaicuna pungu ladopi ishcai mundunda rurashpa, caya punllacaman saquichilla— nircami.

⁹Cayandi tutamandata llujshishca shayajushpami, Jehú shuti runaca tucui gentecunata cashna nirca: —Cangunaca, imatapash cashcatapacha rurajcunami canguichi. Ricuichi, jatun mandajtaca, ñucami shujcunahuan pacalla parlarishpa huañuchircani. Cunanga caicunataca, ¿pita huañuchishca?

¹⁰Cunanga, caita yachaichi: Acab runapaj huasi ucu purata tucuchinata, Mandaj Dios villachishca shimicunaca, imallapash na alpapi urmanshna yanga cangachu. Chaitaca, Mandaj Diosta servij Eliasmanmi villashca carca— nircami.

¹¹Chaimandami Jehú shuti runaca, Acab runapaj huasi ucu puracuna Jezreel pueblopi quedashcataca, tucuillata huañuchirca. Acab runa churashca tucui mandajcunatapash, paicunapaj tucui huasi ucu puratapash, Acab runa churashca curacunatapash, Jehú shuti runaca shujllatapash na saquircachu.

¹²Chai jipami, Samaria puebloman ringapaj jatarirca. Chaiman rijushpami, michijcuna llamacunata rutuna huasiman chayarca.

¹³Chaipimi, Judá llactata jatun mandaj Ocozías runapaj huauquicunata tuparirca. Paicunatami: —Cangunaca, ¿picunata canguichi?— nishpa tapujpi, paicunaca cashna ninajurca: —Ñucanchica, Ocozías runapaj huauquicunami canchi. Jatun mandajpaj churicunata, jatun mandaj Jezabel huarmipaj churicunatapash, alillachu capanguichi ningapajmi shamurcanchi— ninajurcami.

¹⁴Shina nijpimi Jehú shuti runaca, paihuan purij runacunataca: —Paicunataca causajta japichi— nirca. Shina nijpi paicunata causajta japijpimi, michijcuna llamacunata rutuna huasi ladopi tiaj pugyu ladopi cungata muchushpa huañuchinajurca. Chuscu chunga ishcai runacunatami, shujllatapash na saquishpa huañuchinajurca.

¹⁵Chai jipa chaimanda rijushpami, Recab shuti runapaj churi Jonadab runata tuparirca. Chashna tuparishpa: “¿Alillachu cangui?” nishca jipami, Jehú shuti runaca cashna nirca: —Imashnami ñucaca, canhuanga tucui shungu ali cani, ¿chashnallatachu cambash ñucahuanga tucui shungu ali cangui?— nircami. Shina nijpimi, Jonadab runaca: —Ari, ñucapash chashnallatami cani— nirca. Shina nijpimi, Jehú shuti runaca: —Shina cashpaca, cambaj maquita cuhuai— nirca. Shina nijpimi Jonadab runaca, maquita curca. Chashna cujpimi, paipaj carretapi vitsiachirca.

¹⁶Ña vitsiashca jipami, Jehú shuti runaca, cashna nirca: —Ñucahuan jacu. Ñucahuan rishpami, Mandaj Diosta ñuca ninanda juyajujtaca ricungui— nircami. Shina nishpami Jonadab runataca, paipaj carretapi pushashpa rirca.

¹⁷Samaria puebloman Jehú shuti runa chayashpaca, Acab runapaj huasi ucu puracuna chai pueblopi quedashcataca, tucuillatami huañuchirca. Mandaj Dios, Eliasman villashcashnallatami, tucuillata tucuchirca.

¹⁸Chai jipami Jehú shuti runaca, tucuilla gentecunata tandachishpa cashna nirca: —Acab runaca, Baal shuti diostaca, ashagutallami servijurca. Ashtahuangarin ñucaca, yalitami servigrini.

¹⁹Shina cashcamanda cunanga, Baal shuti diosmanda villajcunatapash, paita servijcunatapash, paipaj curacunatapash, shujllapash ama quedachun, tucuillata cayamuichi. Baal shuti diosman animalcunata huañuchishpa carangapajpash, ashtacatami charijuni. Maijambash na shamushpaca, huañungapachami— nircami. Jehú shuti runaca, umashpallami chashna nijurca. Paica, Baal shuti diosta alicachijcunata huañuchishpa tucuchingapajmi, chashna rurajurca.

²⁰Chaimandami, Jehú shuti runaca: —Baal shuti diosta yaringapajlla, shuj punllata shicanyachichi— nirca. Shina nijpimi paicunaca, chai punllapica tucuillata tandachinajurca.

²¹Jehú shuti runaca, tucui Israel llactamandami tandanajumuchun, cayachun cacharca. Shina cachajpimi, Baal shuti diosta tucui servijcuna shamunajurca. Shujllapash na quedashpa tucuilla shamushpami, Baal shuti diospaj huasiman yaicunajurca. Chaimandami Baal shuti diospaj huasipica, shuj lado patamandaca caishuj lado patacaman jundarca.

²²Chaipimi Jehú shuti runaca, churajunacunata cuidaj runataca: —Baal shuti diosta tucui servijcuna churajuchun, churajunacunata llujchimugri— nishpa mandajpimi, chai runaca churajunacunata llujchimurca.

²³Shinallata Jehú shuti runapash, Recab shuti runapaj churi Jonadab runapash, Baal shuti diospaj huasiman yaicushpami, Baal shuti diosta servijcunataca cashna nirca: —Caipica, canguna puramandara, Mandaj Diosta servijcuna maijanllapash tianman, ali ricunguichi. Caipica, Baal shuti diosta servij puracunallami cana canguichi— nircami.

²⁴Animalcunata cushpa huañuchingapaj, ashtahuan imatapash cushpa tucuillata rupachingapaj paicuna yaicujpimi Jehú shuti runaca, pusaj chunga soldadocunata canllapi cuidachun churarca. Paicunatami cashna nirca: —Cangunapaj maquipi ñuca churashca cai runacunata maijanda cashpapash causajta saquishpaca, cangunami paicunapaj randi huañunguichi— nircami.

²⁵Baal shuti diosta servijcuna, animalta tucuilla rupachishca jipami Jehú shuti runaca, canllapi cuidashpa shayanajuj soldadocunatapash, soldadocunata mandajcunatapash cashna nirca: —Yaicushpa huañuchichi, shujllatapash pacajushpa richunga, na saquinachu canguichi— nircami. Shina nijpimi, canllapi cuidaj soldadocunapash, soldadocunata mandajcunapash yaicushpaca, espadahuan huañuchishpa alpapi shitashpa saquirca. Paicunaca, Baal shuti diospajlla shicanyachishca ucucamambashmi yaicunajurca.

²⁶Paicunaca, Baal shuti diospaj huasi ucumandaca, rurashcalla dioscunata llujchishpami rupachinajurca.

²⁷Shinallata rurashcalla Baal shuti diostapash rupachishpami, Baal shuti diospaj huasitapash urmachinajurca. Chashna rurashpami, chai pushtupica letrina huasicunata ruranajurca. Chaica cunangamanmi chashnallata.

²⁸Shinami Jehú shuti runaca, Israel llactapica Baal shuti diosta tucuchirca.

²⁹Tucuita chashna rurashpapash Jehú shuti runaca, Nabat shuti runapaj churi Jeroboam runa, israelcunata rurachishca juchacunamandaca, na anchurircachu. Bet-el shuti pueblopi, Dan shuti pueblopi shayachishca orota rurashca shicucunataca na anchuchircachu.

³⁰Chaimandami Mandaj Diosca, Jehú shuti runataca cashna nirca: “Chashna huañuchishpa ñuca ñaupajpi tucuchishpaca, alitami rurashcangui. Acab runapaj huasi ucu purahuanga, ñuca shungupi tucuita yarijushcashnallatami rurashcangui. Chashna rurashcamandami, cambaj mirai huahuacunaca, chuscu miraicunacaman Israel llactata mandashpa tianajunga” nircami.

³¹Ashtahuangarin Jehú shuti runaca, israelcunata Mandaj Taita Dios mandashcataca, na tucui shunguhuan cazujurcachu. Israelcunata, Jeroboam runa rurachishca juchacunamandaca, na anchurircachu.

³²Chai punllacunami Mandaj Diosca, Israel llactataca uchillayachi callarirca. Chaimandami, Siria llactata jatun mandaj Hazael runaca, paipaj llacta lindero ladolla tucui llactacunapica, macanajushpa misharca.

³³Jordán yacu ladomanda indi llujshimuj ladocamanga, Galaad llactatapash, Gadpaj, Rubenbaj, Manasespaj llactacunatapashmi quichurca. Arnón shuti jatun yacu ladopi tiaj Aroer shuti pueblomandaca Galaad llacta, Basán llactacamanmi quichurca.

³⁴Jehú shuti runa imatalla rurashcacunapash, ashtahuan tucui imatalla rurashcacunapash, tucuipi ali shinlli cashcacunapash, ¿nachu Israel llactata jatun mandajcuna imatalla rurashcacunata escribishca libropi tiajun?

³⁵Jehú shuti runa huañushpa, paipaj taitacunahuan tandanajujpica, Samaria pueblopimi pambarca. Paipaj randica, paipaj churi Joacaz shuti runami mandajurca.

³⁶Jehú shuti shuti runaca, ishcai chunga pusaj huatatami israelcunataca, Samaria pueblopi mandajurca.