Read Imbabura Highland Quichua 2 REYES 12 Bible Online

2 REYES 12 - Imbabura Highland Quichua bible

2 REYES 12

¹Jehú shuti runaca, canchis huatata ña mandajujpimi, Joás shuti runaca mandai callarirca. Paica, chuscu chunga huatatami, Jerusalenbi mandajurca. Paipaj mamaca, Beerseba pueblomanda Sibia shutimi carca.

²Joás runaca, Joiada shuti cura yachachishpa causajui tucui huatacunami, Mandaj Diospaj ñaupajpica, alitalla rurashpa causarca.

³Chashna tucuita ali rurashpapash, lomacunapi altarcunataca na anchuchircachu. Chai altarcunapimi, animalcunata cushpa huañuchishpa, inciensocunata cushnichishpa, gentecunaca catinajurca.

⁴Joás runaca, curacunataca cashnami nirca: —Diospajlla cachun shicanyachishca tucui culquita apamun cashcashnallata, Mandaj Diospaj huasiman apamujpi, cuna cashcashnallata cuchun mandashca culquitapash, paicunapaj munaihuan Mandaj Diospaj huasiman apamushca tucuilla culquitapash tandachinguichi.

⁵Chai culquitaca tucui curacuna, cangunapaj familiacunapaj maquimanda japinguichi. Chaicunahuanga, Diospaj huasi pungucunatapash, ashtahuan maipilla pirca chijtarishcacunatapash alichinguichi— nircami.

⁶Jatun mandaj Joás runaca, ishcai chunga quimsa huatata mandangacamambash curacunaca, Diospaj huasi pirca chijtarishcacunataca, nara alichircachu.

⁷Chaimandami jatun mandaj Joás runaca, curacunata mandaj Joiada shuti curatapash, caishuj curacunatapash cayashpa, cashna nirca: —¿Imashpata Diospaj huasi pirca chijtarishcacunataca nara alichinguichi? Cunanga, cangunapaj familiacuna apamushca culquitaca, na cangunaca ashtahuan japinachu canguichi. Ashtahuangarin chai culquitaca, Diospaj huasi pirca chijtarishcacunata alichinajuchunmi cuna canguichi— nircami.

⁸Shina nijpimi curacunaca, gentecuna apamushca culquitaca, na ashtahuan japishpa saquirca. Shinallata Diospaj huasi pirca chijtarishcacunatapash, na paicuna alichircachu.

⁹Shina cashpapash curacunata mandaj Joiada shuti curami, shuj cajonda japishpa, chai cajón tapapi utujurca. Chaitami, Mandaj Diospaj huasiman yaicuna ali ladopi tiajuj altar ladopi churarca. Chaimandami, Diospaj huasi pungupi cuidaj curacunaca, Mandaj Diospaj huasiman apamushca tucuilla culquitaca, chai cajonbi churanajurca.

¹⁰Chai cajonbi ña ashtaca culqui tiajta ricushpami, jatun mandajpaj escribij runapash, curacunata mandajpash shamushpa, Mandaj Diospaj huasipi tiashca culquita cuentashpa alichinajurca.

¹¹Chai culquitaca, chaipi imatalla rurajcunaman cungapaj pactanatami, Mandaj Diospaj huasita ricushpa cuidajcunaman cunajurca. Chai cuidajcunami carpinterocunaman, Mandaj Diospaj huasita alichijcunaman cunajurca.

¹²Shinallata pircata rurajcunamambash, rumita labrajcunamambashmi cunajurca. Chai culquihuanllatami, Mandaj Diospaj huasi pirca chijtarishcacunata alichingapaca caspicunata, labrashca rumicunata randin carca. Diospaj huasita alichingapaca, tucuipajmi culquita cunajurca.

¹³Ashtahuangarin Mandaj Diospaj huasiman apamushca culquitaca, culqui tastacunata, pavizata anchuchinacunata, jatun tastacunata, trompetacunataca na rurachircachu. Mandaj Diospaj huasipi imalla tianacunataca, imatallapash orota, culquitaca na rurachircachu.

¹⁴Ashtahuangarin imatalla rurajcunamanmi, chai culquitaca curca. Chai culquihuanmi, Mandaj Diospaj huasitaca alichinajurca.

¹⁵Imatalla rurajcunaman cungapaj mingai tucushca runacunamanga, mashna culquita cuna cajtapash na tapushpami, imatalla rurajcunaman cuchun cunajurca. Paicunaca, imata cashpapash cashcatapacha rurajcuna cajpimi, chashna cunajurca.

¹⁶Juchata rurashcamanda cushca culquitapash, nalita rurashcamanda cushca culquitapash, Mandaj Diospaj huasimanga, na apanajurcachu. Chai culquicunataca, curacunami japinajurca.

¹⁷Chai punllacunallatami, Siria llactata jatun mandaj Hazael runaca, Gat shuti pueblopi causajcunahuan macanajushpa, chai pueblota quichurca. Chai jipami, Jerusalenbi causajcunahuan macanajungapaj, vichai shamunata yarijurca.

¹⁸Chaimandami, Judá llactata jatun mandaj Joás runaca, Judá llactatalla jatun mandaj Josafat, Joram, Ocozías shuti paipaj ñaupa taitacuna cushca tucuilla culquita japirca. Shinallata paillata cushca tucuilla orotapashmi, Mandaj Diospaj huasipi imata alichina ucumandapash, jatun mandajpaj huasi ucumandapash japirca. Chaicunatami, Siria llactata jatun mandaj Hazael runaman cuchun cacharca. Chaita cujpimi Hazael runaca, Jerusalenmandaca rirca.

¹⁹Joás runa imatalla ashtahuan rurashcacunapash, tucui imatalla rurashcapash, ¿nachu Judá llactata jatun mandajcuna imatalla rurashcacunata escribishca libropi tiajun?

²⁰Joás runataca, paita servijcunallatami, pacalla tandanajushpa parlarishpa huañuchirca. Paitaca, Sila shuti puebloman urai rijujpimi, Milo nishca pushtupi shayajuj huasipi huañuchirca.

²¹Paica, paita servij Simeat shuti runapaj churi Josacar runa, Somer runapaj churi Jozabad runa chugrichijpimi, huañurca. Joás runataca, paipaj ñaupa taitacunata pambashca Davidpaj pueblopillatami pambarca. Paipaj randica, paipaj churi Amasías runami mandajurca.