Read Imbabura Highland Quichua 2 REYES 18 Bible Online

2 REYES 18 - Imbabura Highland Quichua bible

2 REYES 18

¹Ela shuti runapaj churi Oseas runaca, quimsa huatata Israel llactata ña mandajujpimi, Acaz shuti runapaj churi Ezequiasca, Judá llactata mandai callarirca.

²Ezequiasca, ishcai chunga picha huatata charishpami, mandai callarirca. Paica, ishcai chunga iscun huatatami, Jerusalenbi mandajurca. Paipaj mamaca, Zacariaspaj ushi Abi shutimi carca.

³Ezequiasca, Mandaj Diospaj ñaupajpica, paipaj ñaupa taita David tucui alita rurashpa causashcashnallatami alitalla rurajurca.

⁴Paimi, lomacunapi tiaj altarcunata anchuchishpa, imamambash rijchaj dioscunatapash faquirca. Asera shuti huarmi diosman rijchajcunatapash faquishpami, Moisés rurachishca bronce culebratapash faquirca. Chai punllacamanmi israelcunaca, inciensota cushnichishpa causanajurca. Chai culebrataca, Nehustán[1] nishpami shutichishca carca.

⁵Ezequiasca, israelcunata Mandaj Taita Diosta yariashpami causajurca. Judá llactata tucui jatun mandaj puracunamandaca, paipaj pundalla mandajcunapash, paipaj jipaman mandajcunapash, paishnaca pipash na tiarcachu.

⁶Ezequiasca, Mandaj Diosmandaca na anchurishpami catijurca. Ashtahuangarin Moisesman, Mandaj Dios mandashpa cushcata pactachishpami causajurca.

⁷Mandaj Diosca, Ezequías runahuanmi carca. Pai maiman rishpapash, tucuipimi ali llujshijurca. Chaimandami paica, Asiria llactata jatun mandajtaca na cazushpa, na servijurca.

⁸Shinallata filisteocunatapash, Gaza shuti pueblocaman, chai pueblo linderocunacaman catishpami chugrichirca. Chapashpa shayana torrecunamanda callarishpaca, jatun pircahuan jarcashca pueblocunacamanmi catishpa chugrichirca.

⁹Judá llactata jatun mandaj Ezequiasca, ña chuscu huatata mandajujpimi, Ela shuti runapaj churi Oseas runaca, canchis huatata Israel llactata ña mandajurca. Chai huatapimi, Asiria llactata jatun mandaj Salmanasar shuti runaca, Samaria puebloman vichai shamushpa, chai pueblota chaupipi churarca.

¹⁰Chaipi cashpami, quimsa huata jipaca, Samaria pueblota japirca. Ezequiasca, sucta huatata ña mandajujpi Oseas runapash, Israel llactataca iscun huatata ña mandajujpimi, Samaria pueblotaca quichurca.

¹¹Asiria llactata jatun mandajca, israelcunataca Asiria llactaman prezu apashpami, Halah shuti pueblopi, Gozán shuti jatun yacu ladopi tiaj Habor shuti llactapi causachun churarca. Shinallata Media shuti llactapi tiaj pueblocunapipashmi churarca.

¹²Paicunata Mandaj Taita Dios rimashcacunatapash na cazushpa, ashtahuangarin Dioshuan ari nishcatapash, yangapi churashcamandami, chashna tucurca. Mandaj Diosta servij Moisés, tucui mandashcacunatapash na uyashpami, chaicunataca na ruranajurca.

¹³Ezequías runaca, chunga chuscu huatata ña mandajujpimi, Asiria llactata jatun mandaj Senaquerib shuti runaca, Judá llactapi tiaj muyundi pircashca tucui pueblocunapi causajcunahuan macanajungapaj vichai shamushpa, chai pueblocunataca japirca.

¹⁴Chaimandami, Judá llactata jatun mandaj Ezequiasca, Asiria llactata jatun mandajman cashna nichun, Laquis shuti puebloman cacharca: “Ñucaca, juchatami rurashcani. Cunanga caimanda ripailla, can imata mandashcata rurapashallami” nichunmi cacharca. Shina nijpimi, Asiria llactata jatun mandajca, Judá llactata jatun mandaj Ezequiastaca, ishcai patsaj chuscu quintalta pezaj culquita, ishcai chunga quintal chaupita pezaj orota cuchun mandarca.

¹⁵Chashna mañajpimi Ezequiasca, Mandaj Diospaj huasipi tucui tiashca culquitapash, mandana huasipi alichishca culquitapash curca.

¹⁶Shinamandami Ezequiasca, Mandaj Diospaj huasi pungumanda orotapash, chai punguta charinajuj caspicunamanda orotapash anchuchirca. Chaicunataca, jatun mandaj Ezequiasllatami, orohuan quilpashca carca. Chai orota llujchishpami, Asiria llactata jatun mandajman curca.

¹⁷Chai jipami, Asiria llactata jatun mandajca Tartán, Rabsaris, Rabsaces nishca mandajcunataca, jatun mandaj Ezequías runahuan macanajuchun, ashtaca soldadocunandi cachamurca. Jerusalenbi causajcunahuan macanajuchun, Laquis shuti pueblomanda cachamujpimi, Jerusalenman vichai shamunajurca. Ña vichai chayamushpaca, janaj ladoman tiajuj tanqueman shamuj yacu larca ladopimi, carpacunata shayachishpa tianajurca. Chaica, Tajshajcunapaj alpaman rina ñambimi carca.

¹⁸Chaipi cashpami, jatun mandaj Ezequiasta cayanajurca. Paicunahuan tuparingapaca, Hilcías shuti runapaj churi mayordomo Eliaquim shuti runapash, Sebna shuti escribij runapash, Joa shuti runapaj churi Asaf shuti runapashmi llujshirca. Joa shuti runaca, jatun mandajpaj randi parlajmi carca.

¹⁹Paicunatami Rabsaces nishca mandajca, cashna nijurca: —Cunanga, Ezequiastaca cashna nigrichi. Asiria llactata alipacha jatun mandajca, cashnami nin: ‘¿Imata yarishpata, taunarinshna shinlli tucungui?

²⁰(Ashtahuangarin yangalla shimicunatami) cashna nirijungui: Macanajungapaca ali yuyaitapash, ushaitapash charinimi nirijunguimi. Ashtahuangarin ¿imata yarishpata, ñucataca na cazushpa shayaringui?

²¹Ricui, canga cai faquirinalla sucus taunashna Egipto llactatami yariashpa causajungui. Maijambash paipi taunarijpica, jamzi caspi maquipi yalijta yaicushpa chugrichinllami. Egipto llactata jatun mandaj Faraonga, tucui paita yariashpa causajcunapaca chai taunashnami.

²²Cangunaca: Ñucanchita Mandaj Taita Diostami yariashpa causanajunchi ninguichipashchari. ¿Nachu lomacunapi tiaj huasicunata, altarcunataca Ezequiasllata anchuchirca? Chashna anchuchishpaca, ¿nachu Judá llactapi causajcunata, Jerusalenbi causajcunataca: Jerusalenbi tiaj cai altar ñaupajpimi, Diostaca ninanda alicachina canguichi nishpa mandarca?

²³Cunanga, Asiria llactata jatun mandaj ñuca amoman soldadocunata cupairi nipanimi. Caballopi tiarij soldadocunata can cui ushajpica, ñucapash ishcai huaranga caballotami canman cusha.

²⁴Egiptopi causajcunata, paicunapaj carretacunata, caballopi tiarij soldadocunata yariashpa causajushpapash, ñuca amopaj soldadocunata mandaj puramanda ashtahuan cati mandajhuambash, ¿imashnashi shinlli tucushpa macanajui ushangui?

²⁵¿Cunanga ñucaca, Mandaj Dios na cachamujpitachu, cai llactata tucuchingapaj shamushcani? Mandaj Diosllatami ñucataca: Chai llactaman vichai rishpa tucuchigri nihuarca’ ninmi nigrichi— nijurcami.

²⁶Shina nijpimi, Hilcías shuti runapaj churi Eliaquim shuti runapash, Sebna shuti, Joa shuti runacunapash, Rabsaces nishca mandajtaca cashna ninajurca: —Canda servij ñucanchitaca, arameo shimipi rimapairi. Ñucanchica, chai rimaita yachapanchimi. Ashtahuangarin ñucanchihuanga, pirca jahuamanda gentecuna uyajtaca, ama Judá llacta shimipi rimapaichu— ninajurcami.

²⁷Shina ninajujpimi Rabsaces nishca mandajca, cashna nirca: —¿Ñucata mandajca, cai shimicunataca canman, canda mandajmanllachu villachun cachamuhuashca? ¿Nachu cai jatun pirca jahuapi shayanajuj gentecunamambash, villachun cachamuhuashca? Paicunapash, cangunahuanllata paicuna mapayachishcata micungapaj, paicuna yacu ishpashcata ufiangapajmi shuyanajun— nircami.

²⁸Shina nishpallami Rabsaces nishca mandajca, ali shayarishpa, Judá llacta rimaipi shinllita caparishpa, cashna rimajurca: —Alipacha jatun mandaj rimashcata uyaichi. Paica, Asiria llactata jatun mandajmi.

²⁹Pai jatun mandajca, cashnami nin: ‘Ezequías cangunata umachijuchunga, na saquinachu canguichi. Paica, ñuca maquimanda quishpichitaca na ushangachu.

³⁰Ezequiasca, Mandaj Diosta canguna yariashpa causachunga, cashnami nijunga: Mandaj Diosca, ñucanchitaca cacharichingapachami. Cai pueblotapash, Asiria llactata jatun mandajpaj maquipica, na churangachu ningami.

³¹Ezequiastaca, na uyanachu canguichi. Asiria llactata jatun mandajca, cashnami nin: Casilla ali causai tiachun ñucahuan parlashpa, ñucapajman llujshimuichi. Shina rurashpaca, tucuicunami cangunapaj uvas chagramanda, jigos chagramanda micunguichi. Yacutapash, cangunapaj pugyumandami ufianguichi.

³²Cangunapaj cai llactapishnallata ali granocunapash, vinopash, tandapash, uvas chagracunapash tiaj llactaman ñuca pushaj shamungacamanmi, chashna causanguichi. Chaipica olivospash, aceitepash, balun mishquipash tiaj llactami canga. Yarjaimanda na huañushpami causanguichi. Ezequiastaca, na uyanachu canguichi. Paica umashpallami, Mandaj Diosmi quishpichinga nijun.

³³¿Caishuj llactacunapaj dioscunaca maijan diospash, paipaj llactataca, Asiria llactata jatun mandajpaj maquimanda quishpichi ushashcachu?

³⁴¿Hamat shuti, Arfad shuti pueblocunapaj diosca maipitayari? ¿Sefarvaim, Hena, Iva shuti pueblocunapaj diospash maipitayari? ¿Chai dioscunaca, Samaria pueblota ñuca maquimanda quishpichi usharcachu?

³⁵Cai llactacunapi tiaj dios puracunamandaca, paicunapaj llactata ñuca maquimanda quishpichi ushaj diosca, ¿maijan diospash tianllu? ¿Mandaj Diosrachu Jerusalendaca, ñuca maquimanda quishpichi ushanga’ ninmi— nijurcami.

³⁶Chashna nijujpipash gentecunaca, imatapash na nishpa, upalla uyanajurcallami. Jatun mandaj Ezequías runami, paicunataca: “Imatapash na tigrachinachu canguichi” nishpa mandashca carca.

³⁷Chai jipami, Hilcías runapaj churi mayordomo Eliaquim runapash, Sebna shuti escribij runapash, Asaf shuti runapaj churi, Joa shuti runapash, paicuna churajushcata liquishpa, Ezequiaspajman shamurca. Paipajman shamushpami, Rabsaces nishca mandaj imatalla nishcata villanajurca. Joa shuti runaca, jatun mandajpaj randi parlajmi carca.