Read Imbabura Highland Quichua 2 REYES 20 Bible Online

2 REYES 20 - Imbabura Highland Quichua bible

2 REYES 20

¹Chai punllacunami Ezequías runaca, huañunallapacha ungushca sirijurca. Shinamandami Amoz shuti runapaj churi, Dios ima nishcata villaj Isaiasca, paipajman shamushpa cashna nirca: —Mandaj Diosca, cashnami nin: ‘Cambaj huasi ucu purataca, imata nina cashpapash uchalla ningui. Canga na causanguichu, huañugringuimi’ ninmi— nircami.

²Shina nijpimi Ezequiasca, pirca ladoman tigrarishpa, Mandaj Diosta cashna nishpa mañarca:

³“Mandaj Dioslla, candaca ninandapachami mañapani. Cambaj ñaupajpi na llullashpa, tucui shunguhuan canda cazushpa causashcataca yaripairi. Shinallata imata cashpapash cambaj ali canatalla rurashpa causashcatapash yaripairi” nishpami Ezequiasca, ninandapacha huacajurca.

⁴Chai jipaca, chaupi patioman Isaías nara chayajpillatami Mandaj Diosca, cai shimicunata cashna nishpa Isaiasman villarca:

⁵“Ñuca agllashcacunata mandaj Ezequiaspajman tigrashpa, cashna nigri: Cambaj ñaupa taita Davidta Mandaj Taita Diosca, cashnami nin: ‘Can mañajujtaca uyarcanimi, cambaj viquitapash ricurcanimi. Ricui, candaca chai ung:uimanda alichinimi. Cunanga, quimsa punlla jipaca, Mandaj Dios ñuca huasiman vichai ringui.

⁶Cambaj causaitaca, chunga picha huatatami mirachigrini. Candapash, cai pueblopi causajcunatapashmi, Asiria llactata jatun mandajpaj maquimanda cacharichisha. Ñucallata juyarimanda, ñucata servij Davidtapash juyaimandami, cai pueblopi causajcunataca huacaichisha’ ninmi nigri” nircami.

⁷Chaipimi Isaiasca: “Masashca jigosta japishpa, nanachijuj pushtupi churaichi” nirca. Shina nijpi, chaita japishpa nanachijuj pushtupi churajpimi, ali tucurca.

⁸Ezequiasca, Isaiastaca cashnami nishca carca: —Mandaj Dios aliyachinatapash, quimsa punlla jipa, Mandaj Diospaj huasiman vichai rinatapash, ¿imata ricushpashi yachasha?— nishcami carca.

⁹Chaimandami Isaisca, cashna nishpa tigrachirca: —Mandaj Diosca, pai nishcata pactachinataca, cashnata rurashpami pai Mandaj Diosca, canman ricuchinga. Canga, ¿horasta ricuna gradascuna chunga gradasta llandu ñaupachunllu munangui, na cashpaca chunga gradasta huashaman tigrachunllu munangui?— nircami.

¹⁰Shina nijpimi Ezequiasca, cashna nirca: —Chunga gradasta llandu ñaupashpa richunga ushanallamari. Ashtahuangarin chunga gradasta llandu tigrachunmi, na ushanalla— nircami.

¹¹Shina nijpimi, Dios ima nishcata villaj Isaiasca, Mandaj Diosta caparishpa mañarca. Shina mañajpimi, horasta Acaz shuti runa ricuna gradasta ña yalishca llandutaca, chunga gradascunata huashaman tigrachirca.

¹²Chai huatacunallatami, Babilonia llactata jatun mandaj Baladán shuti runapaj churi Merodac-baladán shuti runaca, Ezequías huañujujta yacharca. Chaita yachashpami cartacunahuan, ashtahuan shuj caranacunahuambash, paipaj villajcunata Ezequías runapajman cachamurca.

¹³Ezequiasca paicunata chasquishpaca, ninan valishcacunata alichishca tucuilla huasi ucutapash, culquita, orota, mishquilla ashnajuj jambicunata, ninan valishca aceitecunatapashmi ricuchijurca. Shinallata macanajunacunata alichishca huasitapash, ima juyaillacunata alichishca ucucunatapashmi tucuillata ricuchirca. Ezequiasca, imatallapash na pacashpami paipaj huasipi, pai mandajuj llactacunapi tucui imalla tiashcata ricuchijurca.

¹⁴Chaimandami Dios ima nishcata villaj Isaiasca, jatun mandaj Ezequías runapajman shamushpa cashna nirca: —Cambajman shamuj chai runacunaca, ¿imatata nirca? Paicunaca, ¿maimandata cambajman shamushca?— nircami. Shina nijpimi, Ezequiasca: —Paicunaca, Babilonia caru llactamandami shamushca— nishpa tigrachirca.

¹⁵Shina nijpimi, Isaiasca: —Cambaj huasipica, ¿imatallata ricurcayari?— nirca. Shina nijpimi Ezequiasca, cashna nishpa tigrachirca: —Ñuca huasipi tucui imalla tiashcatami ricunajurca. Ima tiashcata alichina huasipica, imatallapash na pacashpami ricuchircani— nircami.

¹⁶Shina nijpimi Isaiasca, Ezequiasta cashna nirca: —Mandaj Dios rimashcata uyai:

¹⁷‘Ricui, cambaj huasipi tucui ima tiashcatapash, cambaj ñaupa taitacuna, tucui imatalla alichishcacuna cunangaman tiashcatapash, Babilonia llactaman apana punllacunami chayamujun. Caipica, imatallapash na saquishpami apanga’ ninmi Mandaj Diosca.

¹⁸‘Shinallata can charishca cambaj churicunatapashmi apanga. Paicunaca, Babilonia llactata jatun mandajpaj huasipi, eunucocuna tucushpami causanajunga’ ninmi— nircami.

¹⁹Shina nijpimi Ezequiasca, Isaiastaca cashna nirca: —Mandaj Dios rimashca shimicunata ñucaman can villashcapash, alimi capan— nircami. Shinallata cashnatapashmi nirca: —Ñuca causajui punllacunapica, ima llaquipash na japishpa casilla ali causaimi tianga— nircami.

²⁰Ezequías shuti runa imatalla ashtahuan rurashcapash, ninan ushaita pai charishcapash, yacu tanqueta imashna rurashcapash, chai tanqueman yacu rinata rurashcapash, pueblo ucuman yacuta apashcapash, ¿nachu Judá llactata jatun mandajcuna imatalla rurashcacunata escribishca libropi tiajun?

²¹Ezequías huañushpa, paipaj ñaupa taitacunahuan tandanajujpica, paipaj churi Manasesmi paipaj randi mandajurca.