Read Imbabura Highland Quichua 2 REYES 21 Bible Online

2 REYES 21 - Imbabura Highland Quichua bible

2 REYES 21

¹Manasés shuti runaca, chunga ishcai huatata charishpami, mandai callarirca. Paica, picha chunga picha huatatami, Jerusalenbi mandajurca. Paipaj mamaca, Hepsiba shutimi carca.

²Paica, Mandaj Diospaj ñaupajpica, nalita rurashpami causajurca. Paica, israelcunapaj ñaupajmanda, Mandaj Dios llujchishpa cachashca gentecuna millanayaicunata rurashcashnallatami rurajurca.

³Lomacunapi tiaj altarcunata paipaj taita Ezequías urmachishcataca, paimi cutin shayachirca. Shinallata Baal shuti diosmambashmi, altarcunata rurarca. Israel llactata jatun mandaj Acab runa rurashcashnallatami, Asera shuti huarmi diosman rijchajtapash rurarca. Jahua pachapi tiaj tucui luzerocunatapashmi, ninanda alicachijurca. Tucui chaicunatami, ninanda alicachishpa mañajurca.

⁴Shinallata Mandaj Diospaj huasipipashmi, altarcunata shayachirca. Chai huasitami, Mandaj Diosca: “Jerusalenbi tiaj cai huasipi causajuchunmi, ñuca shutitaca churasha” nishca carca.

⁵Shinallata Mandaj Diospaj huasi ishcandi patiopimi, jahua pachapi tiaj tucui luzerocunaman altarcunata rurarca.

⁶Manasés runaca, dioscunaman cushpami, paipaj churita rupachirca. Punllacunata ricujcunapash, brujocunapashmi tucurca. Shinallata muspachij yumbucunata, yachajcunatapashmi churarca. Chashna nalicunata Mandaj Diospaj ñaupajpi rurashpa mirachishpami, ninandapacha fiñachijurca.

⁷Manasés runaca, pai rurachishca Asera shuti huarmi diosman rijchajtapashmi, Diospaj huasipi churarca. Cai huasitami Mandaj Diosca, Davidtapash, paipaj churi Salomondapash cashna nishca carca: “Jerusalén pueblotaca, tucui Israel aillu puramandami agllarcani. Cai huasipimi ñuca shutitaca, causaita causachun churasha.

⁸Tucui imatalla ñuca mandashcashnallata, ñucata servij Moisés cangunata mandashcashnallata, tucuita cazushpa pactachishpa causanguichi. Chashna causajpica, can israelcunataca cangunapaj ñaupa taitacunaman carashca llactamandaca, napacha cutinga llujchishpa cachashachu” nishcami carca.

⁹Ashtahuangarin paicunaca, na cazunajurcachu. Manasesca, israelcunapaj ñaupajpi Mandaj Dios tucuchishca, shuj llactamanda gentecunatapash yali nalita rurana yuyaitami curca.

¹⁰Shinamandami Mandaj Diosca, paimanda villaj paita servijcunahuan cashna villachirca:

¹¹“Judá llactata jatun mandaj Manasesca, cashna millanayaicunata rurashpami, paipaj punda causajushca amorreocunatapash ashtahuan yali nalita rurashca. Shinallata paipaj yanga dioscunahuanmi, Judá llactapi causajcunataca juchata rurachishca.

¹²Chaimandami, israelcunata Mandaj Taita Diosca cashna nin: Ricuichi, ñucami Jerusalenbi, Judá llactapi causajcunaman jatun llaquita cachamugrini. Maijambash chaita uyajcunaca, ishcandi lado rinritami nanachinajunga.

¹³Jerusalenbica, Samaria pueblota llaquichishca cordelta, Acab runapaj huasi ucu puratapash llaquichishca plomadatami churasha. Jerusalendaca, platota maillanshnami maillasha. Ali fichashpa uraisingashpa churanshnami saquisha.

¹⁴Ñucapaj cachun agllashca gentecunamanda huaquin puchushcacunataca jichushpa saquishpami, paicunata fiñajcunapaj maquipi churasha. Paicunaca, paicunata na ricunayachij runacunahuan japi tucungapaj, tucui ima charishcacunata quichui tucungapajmi canga.

¹⁵Paicunapaj ñaupa taitacuna Egiptomanda llujshimushca punllamandapacha cunangamanmi, ñuca ñaupajpi nalita rurashpa, ñucataca ninanda fiñachinajuhuan. Chaimandami chashna ruragrini” nishpami villachijurca.

¹⁶Chai jahuapash Manasesca, ima nalitapash na rurajcunata huañuchishpami, Jerusalenbica caishuj manñamanda, chaishuj manñacaman yahuarta ninanda jicharca. Judá llactapi causajcunata, Mandaj Diospaj ñaupajpi nalita rurachishpa, juchata rurachishca jahuami chashna rurarca.

¹⁷Manasés runa ashtahuan imatalla rurashcapash, tucui imatalla rurashcapash, juchata pai rurashcapash, ¿nachu Judá llactata jatun mandajcuna imatalla rurashcacunata escribishca libropi tucuilla tiajun?

¹⁸Manasés huañushpa, paipaj ñaupa taitacunahuan tandanajujpica, paipaj huasipi tiaj huertapimi, Uza shuti runapaj huertapi pambarca. Paipaj randica, Amón shuti paipaj churimi mandajurca.

¹⁹Amón shuti runaca, ishcai chunga ishcai huatata charishpami, Judá llactataca mandai callarirca. Paica, ishcai huatatami Jerusalenbi mandajurca. Paipaj mamaca, Jotba shuti pueblomanda, Haruz shuti runapaj ushi Mesulemet shutimi carca.

²⁰Paipash Mandaj Diospaj ñaupajpica, paipaj taita Manasés rurashcashnallatami nalitalla rurajurca.

²¹Paipaj taita imashna rurashpa causashcatallatami, paipash tucuita rurashpa catijurca. Paipaj taita servishpa causashca, yanga dioscunatami servishpa ninanda alicachijurca.

²²Paipaj ñaupa taitacunata Mandaj Taita Diosta saquishpami, Mandaj Diospaj ñanmandaca anchurirca.

²³Jatun mandaj Amón shuti runataca, paita servijcunallata fiñashpa pacalla parlarishpami, paipaj huasipillata huañuchirca.

²⁴Shinamandami chai llactapi causajcunaca, pacalla parlarishpa jatun mandaj Amón shuti runata huañuchijcunataca, tucuillata huañuchinajurca. Chai llactapi causajcunaca, Amón shuti runapaj randica paipaj churi Josías shuti runatami, jatun mandaj cachun churanajurca.

²⁵Amón runa ashtahuan imatalla rurashcacunaca, Judá llactata jatun mandajcuna imatalla rurashcacunata escribishca libropimi, tucuilla tiajun.

²⁶Amón shuti runataca, paita pambana utujupillatami, Uza shuti runapaj huertapi pambarca. Paipaj randica, Josías shuti paipaj churimi mandajurca.