Read Imbabura Highland Quichua 2 REYES 25 Bible Online

2 REYES 25 - Imbabura Highland Quichua bible

2 REYES 25

¹Sedequías shuti runaca, iscun huatata ña mandajujpimi, cashna tucurca: Chai huatapaj chunga quilla chunga punllapimi, Babilonia llactata jatun mandaj Nabucodonosor runaca, Jerusalenbi causajcunahuan macanajungapaj, tucuilla paipaj soldadocunandi shamushpa, chai pueblota chaupipi churarca. Chai pueblopi causajcunahuan macanajungapaca, torrecunatapashmi muyundipi shayachirca.

²Jerusalén puebloca, jatun mandaj Sedequías chunga shuj huatata ña mandajungacamanmi, chaupipi churai tucushca carca.

³Chai huatapaj chuscu quilla iscun punllapica, ashtahuanmi chai pueblopica, yarjai tiarca. Chai llactapi causaj gentecunapaj ima micunapash illangacamanmi, yarjai tiarca.

⁴Shinamandami, chai pueblopaj jatun pircata ña utujushpaca, macanajunata yachaj tucuilla runacuna tuta llujshishpa, pacajushpa rinajurca. Paicunaca, caldeocuna chai pueblo muyundipi cajpitami, jatun mandajpaj huerta ladopi shayajuj ishcai pircapaj punguta llujshishpa pacajushpa rinajurca. Jatun mandajca, Arabá shuti pambaman rina ñandami rijurca.

⁵Shinamandami caldeo soldadocunaca, jatun mandajta catishpa rishpa, Jericó pueblo lado pambapi japigrirca. Tucui paipaj soldadocunaca, caita chaitami rishca carca.

⁶Jatun mandaj Sedequías runata japishpaca, Babilonia llactata jatun mandajpajmanmi, Ribla shuti puebloman apamunajurca. Chaipimi, imashna llaquichinatapash mandarca.

⁷Sedequías runapaj churicunataca, paipaj ñaupajpillatami cungata muchushpa huañuchirca. Sedequías runataca, ñavita llujchishpami, cadenacunahuan huatashpa Babilonia llactaman aparca.

⁸Babilonia llactata jatun mandaj Nabucodonosor runaca, ñami chunga iscun huatata mandajurca. Chai huatapaj picha quilla canchis punllapimi, cuidaj soldadocunata mandaj Nabuzaradán shuti runaca, Jerusalenman shamurca. Paica, Nabucodonosor runata servij runami carca.

⁹Pai shamushpami, Mandaj Diospaj huasitapash, mandana huasitapash rupachirca. Shinallata Jerusalenbi tucui huasicunatapash, mandajcunapaj tucui huasicunatapashmi rupachirca.

¹⁰Chai mandaj soldadohuan shamuj, tucui caldeo soldadocunaca, Jerusalén muyundi jatun pircatami urmachinajurca.

¹¹Chai pueblopi huaquin puchushca gentecunatapash, Babilonia llactata jatun mandajpajman paicunallata rishca gentecunatapash, imagutapash na charij gentecunatapashmi, cuidaj soldadocunata mandaj Nabuzaradán shuti runaca prezu aparca.

¹²Chashna apashpapash, cuidaj soldadocunata mandaj Nabuzaradán shuti runaca, Judá llactapi causaj imagutapash na charij gentecunataca, uvas chagracunapipash, pambacunapipash trabajachunmi saquirca.

¹³Chai caldeocunaca, Mandaj Diospaj huasipi shayachishca, bronce pilarcunatapash, yacuta ashtana carretacunatapash, Mandaj Diospaj huasipi tiaj yacuta churashca jatun bronce pailatapashmi faquinajurca. Chai broncecunataca, Babilonia llactamanmi apanajurca.

¹⁴Shinallata caldero nishcacunatapash, paleta nishcacunatapash, pavizata anchuchinacunatapash, cucharongunatapash, Diosta servingapaj imatalla broncemanda rurashca tucui chaipi tiashcatami aparca.

¹⁵Inciensota cushnichinacunatapash, jatun tastacunatapashmi aparca. Orota rurashcataca oro purallata, culquita rurashcataca culqui puralla tandachishpami aparca. Cuidaj soldadocunata mandajca, tucuitami aparca.

¹⁶Ishcai jatun pilarcacunata, yacuta churana jatun pailata, yacuta ashtana carretataca, Mandaj Diospaj huasipi tiachunmi, Salomonga rurachishca carca. Tucui chaicunataca, na pezai ushanallachu carca.

¹⁷Chai jatun pilarca, pusaj metro yali jatunmi carca. Chai pilarpaj umapica, bronceta rurashca capitel nishcatami churashca carca. Chai capitelca, shuj metro quimsa chunga picha centímetro jatunmi carca. Chai capitelpaj jahuapica, linllicunatapash, granadilla nishcacunatapash, tucuillata bronceta rurashcatami muyuchishca carca. Chaishuj pilartapash, chashnallatami linllita muyuchishpa rurashca carca.

¹⁸Cuidaj soldadocunata mandajca, Seraías shuti mandaj curatapash, paipaj cati mandaj Sofonías shuti curatapash, Diospaj huasipi tiaj platocunata, cuidaj quimsa runacunatapashmi japirca.

¹⁹Shinallata Jerusalén pueblomandaca, macanajuj soldadocunata mandajtapash, jatun mandajman ali yuyaita cuj picha mandajcunatapashmi japirca. Soldadocunapaj shuticunata escribishpa charijuj mandajtapashmi japirca. Paimi, chai llactapi causajcunapaj shuticunataca, escribishpa charirca. Shinallata Judá llactamanda sucta chunga mandajcunatapashmi, Jerusalén pueblopi cajpi japirca.

²⁰Tucui paicunata japishpami, cuidaj soldadocunata mandaj Nabuzaradán shuti runaca, Babilonia llactata jatun mandajpajman, Ribla shuti puebloman aparca.

²¹Babilonia llactata jatun mandajca, Hamat shuti llactapimi chugrichishpa huañuchijurca. Chashnami, Judá llactapi causajcunaca, paicunapaj llactamanda prezu apai tucurca.

²²Babilonia llactata jatun mandaj Nabucodonosor runa, Judá llactapi saquishca gentecunata mandachunga, Ahicam shuti runapaj churi Gedalías shuti runatami churarca. Ahicam runaca, Safán shuti runapaj churimi carca.

²³Babilonia llactata jatun mandajca, Gedalías runatami mandaj cachun churarca. Chaitami, soldadocunata tucui mandajcunaca yacharca. Chaita yachashpami, Netanías runapaj churi Ismael shuti runapash, Carea shuti runapaj churi Johanán runapash, Netofa shuti pueblopi causajuj Tanhumet shuti runapaj churi Seraías runapash, Maaca shuti pueblopi causajuj shuj runapaj churi Jaazanías runapash, paicunapaj soldadocunandi Mizpa shuti puebloman shamunajurca. Tucui paicunami, paicunapaj soldadocunandi shamunajurca.

²⁴Gedalías runaca paicunamanmi, paicunapaj soldadocunamambash, cashna nishpa juramenturca: “Caldeocunata servishpa causanataca, na manllanachu canguichi. Babilonia llactata jatun mandajta servishpa, chai llactapi causashpaca, alimi causanguichi” nircami.

²⁵Ashtahuangarin chai huatapaj canchis quillapimi, jatun mandajcunapaj miraipura Ismael shuti runaca, chungapura runacunandi Mizpa shuti puebloman shamurca. Paicuna chugrichijpimi, Gedalías runaca huañurca. Ismael shuti runaca, Netanías runapaj churimi carca. Netanías runaca, Elisama shuti runapaj churimi carca. Ismael runaca, Gedalías runahuan causanajuj, Judá llacta runacunatapash, caldeocunatapashmi huañuchirca.

²⁶Shinamandami tucuilla gentecuna jatarishpa, uchillacunamanda callarishpa, jatungunacaman soldadocunata mandajcunahuan, Egiptoman pacajushpa rinajurca. Caldeocunata manllashpami, chashna rinajurca.

²⁷Judá llactata jatun mandajca, quimsa chunga canchis huatata prezu causajujpimi, cashna tucurca: Chai huatapimi, Evil-merodac shuti runaca, Babilonia llactata jatun mandaj tucurca. Pai mandai callarijuj huatapaj chunga ishcai quilla, ishcai chunga canchis punllapimi, Joaquín runataca prezumanda llujchirca.

²⁸Paihuanga aliguta juyaihuan parlashpami, Babilonia llactata jatun mandajcuna tianajushcatapash ashtahuan yalipi churarca.

²⁹Shinallata prezuna huasipi tiajushpa churajushcataca surcuchishpami, shuj churajunata churachirca. Joaquín runaca, paipaj tucui causaipimi, jatun mandajhuan micushpa causajurca.

³⁰Babilonia llactata jatun mandajca, punllandimi paipaj micunatallata carajurca. Paica, tucui causaipimi chashna causajurca.