Read Imbabura Highland Quichua 2 REYES 4 Bible Online

2 REYES 4 - Imbabura Highland Quichua bible

2 REYES 4

¹Dios ima nishcata yachajuj puracunapaj huarmicunamanda shuj huarmimi, Eliseotaca cashna nishpa caparirca: —Canda servij, ñuca cusaca huañuparcamari. Canda servij paica, Mandaj Diosta manllashpa causashcataca yachapanguimi. Cunanga, culquita mañachij runa shamushpami, ñucapaj ishcai churicunataca paipaj gañan cachun apasha nijun— nircami.

²Shina nijpimi Eliseoca, cashna nirca: —¿Imatata rurachun munangui? Cambaj huasipica, ¿imatallata charingui? Villahuai— nishpa tapujpimi, chai huarmica cashna nirca: —Canda servij ñucaca, imatallapash huasipica na charipanichu. Shuj mangapi aceitetallami charini— nircami.

³Shina nijpimi Eliseoca, cashna nirca: —Cunanga, cambaj huasi ladollapi tucui causajcunapajman rishpa, chushaj mangacunata mañai. Chai chushaj mangacunataca, taucatapacha mañanguilla.

⁴Chai jipaca cambash, cambaj churicunapash ucuman vicharishpa, tucuilla mangacunapi aceiteta churangui. Chashna churajpi jundashca mangataca, shuj ladoman anchuchingui— nircami.

⁵Shina nijpimi chai huarmi rishpaca paipash, paipaj churicunapash punguta ucuman vicharirca. Chashna vicharishpami, mangacunata paipaj churicuna yalichimujpi paica, chai mangacunapi aceiteta churajurca.

⁶Ña tucuilla mangacuna junda cajpimi, paipaj shuj churitaca: —Ashtahuan mangacunata apamui— nirca. Shina nijpimi, paipaj churica: —Mangacunaca, na ashtahuan tianllu— nirca. Shinamandami aceitepash tucurirca.

⁷Chai jipami chai huarmica, Taita Diospaj runagupajman shamushpa villarca. Chaita villajpimi Eliseoca, cashna nirca: —Chai aceitetaca, jatungapaj rilla. Chai jatushca culquitaca, culquita mañachijcunaman tigrachingui. Puchushcahuanga cambash, cambaj churicunapash micushpa causanguichi— nircami.

⁸Shuj punllami, Sunem shuti pueblota Eliseo yalijujpi, cashna tucurca: Chai pueblopimi, ali rijsishca shuj huarmi causajurca. Chai huarmimi, Eliseotaca micungapaj ripashun nijushpallata pusharca. Chaimandami Eliseoca, chai pueblota yalijushpaca, chai huarmipaj huasipi micungapaj shamun carca.

⁹Chaimandami chai huarmica, paipaj cusaman cashna nirca: —Ricui, cai ñucanchi huasitalla yalij chai runaguca, Taita Diospajlla causaj runagu cajtami yachani.

¹⁰Chaimanda cunanga, shuj uchilla ucuguta pircashpa, paiman rurapashun. Ima hora ñucanchipajman pai shamushpaca, chai ucupi quedachun. Shinallata shuj camata, shuj mezata, shuj tiarinaguta, shuj lamparagutapash churapashun— nircami.

¹¹Shuj punllami, cashna tucurca: Eliseo chai huasiman shamushpami, chai huasipi rurashca ucupi quedashpa chaipi puñurca.

¹²Chaipi cashpami, paita servij Giezi shuti runataca, cashna nirca: —Caipi causaj sunamita huarmita cayamui— nijpimi chai servij runaca, chai huarmita cayamurca. Chashna cayajpi chai huarmi paipaj ñaupajman shamujpimi,

¹³paita servij Giezi shuti runataca, cashna nirca: —Chai huarmitaca, cashna ni: ‘Ricui, ñucanchihuan can ninan ali cashcamandaca, canmandaca ¿nachu imagullatapash rurachun munangui? Jatun mandajhuan cashpa, na cashpaca soldadocunata mandajhuan cashpapash, ¿nachu canmanda parlachun munangui?’ ni— nircami. Eliseota servij runa chashna nijpimi, chai huarmica: —Cai ñuca gentecunapaj chaupipica, alimi causapani— nirca.

¹⁴Shina nijpimi Eliseoca, paita servij runataca cashna nirca: —Shina cashpaca, chai huarmimandaca, ¿imatata rurashun?— nijpimi, paita servij Giezi shuti runaca cashna nirca: —Ricui, paica huahuacunatami na charin. Paipaj cusapash ñami rucugu— nircami.

¹⁵Shina nijpimi, Eliseoca: —Chai huarmita cayamui— nijpi, paita servij runaca, chai huarmita cayamurca. Shina cayajpi shamushpami, chai huarmica pungupi shayarirca.

¹⁶Chashna shayajujpimi Eliseoca, cashna nirca: —Cai shamui huatapimi, cunan punllacunapishnallata shuj jari huahuaguta marcangui— nircami. Shina nijpimi chai huarmica, cashna nirca: —Ñucata mandajlla, Taita Diospaj runagulla. Canda servij ñucataca, ama yanga chashna nihuaichu— nircami.

¹⁷Ashtahuangarin cati huatapaca, Eliseo villashca punllacunapillatami, chai huarmica vijsayu tucushpa, shuj jari huahuaguta ungurca.

¹⁸Chai huahuagu ña jatunyajpimi, shuj punllapica cashna tucurca: Paica, paipaj taitaca pambapi cozechajcunahuan purijujpimi, ricungapaj shamurca.

¹⁹Chaipi cashpami chai huambraguca, paipaj taitamanga: —¡Aij, ñuca umata nananmi, ñuca umata nananmi!— nishpa villajpi, paipaj taitaca paita shuj servijtaca: —Paipaj mamapajman apai— nirca.

²⁰Chai runa marcashpa paipaj mamapajman apajpimi, chaupi punllacaman mamapaj migllapi tiajushpallata huañurca.

²¹Chaimandami, chai huarmica vichai vitsiashpa, Taita Diospaj runagupaj cama jahuapi churashpaca, punguta vichashpa llujshirca.

²²Chai jipami, paipaj cusata cayashpaca cashna nirca: —Taita Diospaj runagupajman rishpa tigramugringapaj, servij puramanda shuj runacunata, shinallata huarmi burrocunamanda shuj huarmi burrotapash ñucahuan cachapai nipanimi— nircami.

²³Shina nijpimi paipaj cusaca, cashna nirca: —¿Imashpata cunanga paita ricungapaj rigringuiyari? Cunanga, llullu lunallapash, samana punllallapash na canga— nircami. Shina nijpimi, chai huarmica: —Ama manllarichu— nirca.

²⁴Chai jipaca, huarmi burropaj jahuapi shuj tiarinata churachun mandashpami, chai servij runataca cashna nirca: —Cunanga, ama ñambi shayarishpa, burrota aisashpa ucha pushahuailla. Ñuca shayari nijpillami shayarina cangui— nircami.

²⁵Chashna nishpa ucha rishpami, Carmelo shuti urcuman, Taita Diospaj runagupajman shamurca. Taita Diospaj runaguca, ña caruta chai huarmi shamujujta ricushpami, paita servij Giezi shuti runataca, cashna nirca: —Ricui, chainitaca sunamita huarmimari shamujun.

²⁶Cunanda tuparingapaj calpashpa ripai. Ña tuparishpaca: ‘¿Cambash, cambaj cusapash, cambaj churipash alillachu capanguichi?’ nishpa tapupangui— nircami. Shina tapugrijpimi paica: —Alillami capanchi— nirca.

²⁷Chai urcuman Taita Diospaj runagupajman chayashpami, paipaj chaquipi ugllarirca. Chashna ugllarijujpi, Giezi shuti runa anchuchingapaj quimirijpimi, Taita Diospaj runaguca cashna nirca: —Saquilla, paipaj shungupica jatun llaquihuanmari. Pai imamanda llaquilla cajtaca, pacashpami Mandaj Diosca na villahuashca— nircami.

²⁸Shina nijpimi chai huarmica, cashna nirca: —¿Ñucata mandajtaca, ñucachu churiguta mañaparcani? ¿Nachu ñucaca, huahuata charigringuimi nijpica, ama yanga chashna nishpa asichihuaichu niparcani?— nircami.

²⁹Shina nijpimi Eliseoca, paita servij Giezi shuti runataca cashna nirca: —Ali chumbilirishpa, ñuca taunata apashpa ri. Pipash tuparijpica, ama alillachu capangui ninguichu. Candapash alillachu capangui nijpipash, upalla ringuilla. Ña huasiman chayashpaca, huahuapaj ñavi jahuapi ñuca taunata churangui— nircami.

³⁰Shina nijpimi chai huahuapaj mamaca, cashna nirca: —Mandaj Diosca causajumbachami, cambash causajunguimi. Candaca, na saquishpa ripashachu— nircami.

³¹Shina nijpimi Eliseoca jatarishpa, chai huarmita catishpa rirca. Giezi shuti runaca, paicunata ñaupashpa rishpami, chai huahuapaj ñavi jahuapi taunata churashca carca. Chashna churajpipash na parlarca, na cuyurircachu. Chaimandami, Eliseohuan tuparingapaj tigramushpaca: —Huahuaca na rijcharinllu— nirca.

³²Chai huasiman Eliseo chayamushpaca, paipaj cama jahuapi huahua huañushca sirijujtami ricurca.

³³Chaimandami Eliseoca, ishcandita canllaman saquishpa, pailla ucuman yaicushpa punguta vicharishpa, Mandaj Diosta mañarca.

³⁴Chai jipaca, camaman vitsiashpami, Eliseoca paipaj shimitaca huahuapaj shimipi, paipaj ñavitapash huahuapaj ñavi jahuapi, paipaj maquitapash huahuapaj maqui jahuapi churashpa, huahuapaj jahuapi siririrca. Chashna siririjpimi, huahuapaj cuerpoca cunujyarca.

³⁵Chaimanda jatarishpami Eliseoca, huasi ucupi caiman chaiman purijurca. Chai jipa cutin camaman vitsiashpami, chashnallata chai huahuapaj jahuapi siririrca. Chashna sirijpica, canchis viajecaman atsiashpami, chai huahuaca ñavita pascarca.

³⁶Chaimandami Eliseoca, Giezi shuti runata cayashpaca: —Caipi causaj sunamita huarmita cayamui— nirca. Giezi shuti runa cayajpi, chai huarmi shamushpa ucuman yaicujpimi, Eliseoca: —Jaica, cambaj churigu— nirca.

³⁷Shina nijpimi, chai huarmica ucuman yaicushpa, Eliseopaj chaqui ladopi cungurishpaca, alpaman chayajta cumurirca. Chai jipaca, paipaj huahuata japishpami, chai ucumanda llujshirca.

³⁸Eliseoca, chai llactapica ninan yarjai tiaj punllacunami, Gilgal shuti puebloman cutin tigrarca. Dios ima nishcata villangapaj yachajujcunapash chaipimi Eliseohuan carca. Chaimandami Eliseoca, paita servij runataca cashna nirca: “Jatun mangata shayachishpa, Dios ima nishcata villangapaj yachajujcunaman micunata yanui” nircami.

³⁹Paicuna puramanda shujmi, micuna jihuata pambapi pallangapaj llujshirca. Paica, parra nishca yuratashnallami tarirca. Chai yuramandami, calabaza nishca sacha granota paipaj jahualla churajuna jundata pallashpa tigrarca. Chai granota apashpa chayamushpaca, micunata yanujuj mangapimi chaupishpa chaupishpa churarca. Chashna churashpapash, chai grano ima cajtaca na yacharcachu.

⁴⁰Ña yanushca jipa, paicuna micuchun carajpimi, chai yanushca micunata paicuna malishpaca, cashna nishpa caparinajurca: “¡Taita Diospaj runagu, cai mangamanda micunaca huañuchigrinmari!” ninajurcami. Chaimandami, na micui ushanajurca.

⁴¹Shina ninajujpimi, Eliseoca: —Jacuta apamuichi— nirca. Jacuta apamujpi, mangapi ña talishpami: —Gentecuna micuchun carailla— nirca. Chai mangapica, ima nalipash na ashtahuan tiarcachu.

⁴²Chai jipami, Baal-salisa shuti pueblomanda shuj runa shamurca. Paica, punda fucushca trigo tandatapash, ishcai chunga cebada tandatapash, mushuj trigo fucushcatapash espigandi, Taita Diospaj runaguman apamushpami shamurca. Chaita japishpami Eliseoca, paita servijtaca: —Gentecuna micuchun carai— nirca.

⁴³Shina nijpimi, chai servij runaca: —Caica, patsaj runacunapaca na pactangachu— nirca. Shina nijpimi Eliseoca, cashna nirca: —Gentecuna micuchun carailla. Mandaj Diosca cashnami nin: ‘Paicuna micujpipash puchungarami’ ninmi— nircami.

⁴⁴Shina nijpimi paita servij runaca, gentecunaman cararca. Chashna carajpi paicuna micujpipash, Mandaj Dios villashcashnallatami puchurca.