Read Imbabura Highland Quichua 2 REYES 7 Bible Online

2 REYES 7 - Imbabura Highland Quichua bible

2 REYES 7

¹Shinamandami Eliseoca, cashna nirca: —Mandaj Dios villashcata uyaichi. Mandaj Diosca cashnami nin: ‘Caya cai horasllatami, Samaria pueblo pungu ladopica, canchis kilo yali ashtahuan ali jacupash, chunga chuscu kilo chaupi yali cebadapash, chunga shuj gramo yalita pezaj culquilla valinga’ ninmi— nirca.

²Shina nijpimi jatun mandajta tucuipi servishpa causaj shuj runaca, Eliseotaca cashna nirca: —Jahua pacha ventanacunata, Mandaj Dios cunan pascajpipash, chashnaca na cangachu— nircami. Shina nijpimi Eliseoca, cashna nirca: —Ricui, chaitaca cambaj ñavihuambachami ricungui. Ashtahuangarin chaicunataca, na micunguichu— nircami.

³Samaria puebloman yaicunapimi, lepra ung:uihuan chuscu runacuna tianajurca. Paicunami, caishujmanda chaishujmanda cashna ninajurca: —Ñucanchica, ¿imapajta caipica huañungacaman tianajugrinchi?

⁴Cai puebloman yaicushpapash, pueblopi jatun yarjai tiashcamandaca, chaipipash huañuringallatami. Caipi quedashpapash, huañushunchillatami. Chaipaj randica, siriocuna carpacunata shayachishca tianajuj pambaman cunanda chimbashunchi. Paicuna ñucanchita na huañuchijpica, causashunchimi. Paicuna huañuchijpica, huañushunllami— ninajurcami.

⁵Shina nishpami, ña amsayajhuan paicunaca, siriocuna carpacunata shayachishca tianajuj ladoman ringapaj jatarinajurca. Siriocuna carpacunata shayachishca tianajuj ladoman paicuna chayajpica, pipash illashcami carca.

⁶Siriocuna carpacunata shayachishca tianajuj pambapica, Mandaj Diosmi macanajuna carretacuna, caballocuna, ashtaca soldadocuna ninanda caparinajujta uyachishca carca. Chaita uyashpami, paicunaca caishujmanda chaishujmanda cashna ninajurca: “Israel llactata jatun mandajca, ñucanchihuan macanajungapajmi heteocunata, Egiptopi causajcunata jatun mandajcunaman culquita cushpa, pushamushca yarin” ninajurcami.

⁷Chaimandami paicunaca, amsayajhuan jatarishpa paicunapaj carpacunatapash, caballocunatapash, burrocunatapash saquishpa calpanajurca. Chashnami carpacunataca imashna shayachishcatallata saquishpa, ama huañungapaj tucuilla pacajushpa calpashca carca.

⁸Lepra ung:uihuan runacunaca, carpacunaman yaicuna ladoman ña chayashpami, shuj carpaman yaicushpa micunajurca, ufianajurca. Chai carpamandaca culquita, orota, churajunacunatapash apashpami, pacangapaj rinajurca. Chaimanda cutin tigrashpami, shuj carpaman yaicushpa, chai carpamandapash apashpa pacangapaj rinajurca.

⁹Chashna rurashca jipami, caishujmanda chaishujmanda cashna ninajurca: —Ñucanchica, nalitamari ruranajunchi. Cunanga, ali villaita villana punllamari. Shina cajpipash, ñucanchica na villashpami purinajunchi. Caya pacaringacaman na villagrijpica, ñucanchi nalita rurashcallatami llaquichinga. Shina cashcamanda, cunanda jatun mandajpaj huasiman yaicushpa, ali villaita villagrishunchi— ninajurcami.

¹⁰Chaimandami paicuna shamushpaca, Samaria puebloman yaicuna pungupi cuidaj soldadocunaman caparishpa cashna ninajurca: —Ñucanchimi, siriocuna carpacunata shayachishca tianajuj pambaman rircanchi. Chaiman chayajpica, pipash illashcami carca. Maijan parlajllapash, na uyarircachu. Ashtahuangarin caballocuna, burrocunallami huatashca shayanajurca. Carpacunapash, imashna shayachishpa saquishcashnallatami shayanajurca— ninajurcami.

¹¹Shina villajpimi, pungupi cuidajcunaca, jatun mandajpaj huasi ucupi caparishpa villanajurca.

¹²Shina villajpimi, jatun mandajca tuta jatarishpa, paita servijcunataca cashna nirca: —Siriocuna ñucanchita imata rurangapaj munashcatami villagrini. Paicunaca, ñucanchi yarjachinajujtami yachan. Chaimandami paicunaca: ‘Pueblomanda llujshijpica causajta japishpami ñucanchica, puebloman yaicushun’ yashpami, paicunapaj carpacunamanda llujshishpa, pambapi pacajushcanga— nircami.

¹³Shina nijpimi servij puramanda shuj runaca, cashna nirca: —Cunanga, cai pueblopi quedashca shayanajuj picha caballocunata japichi. Chashnashpaca, imashna cajta ricungapaj cachashunchi. (Maijan caipi quedashpapash, chai tucui ashtaca israelcuna, yarjaimanda ña huañushcashnallatami huañunga)— nircami.

¹⁴Shina nijpimi, shuj carretata aisaj ishcai caballocunata japinajurca. Chai jipami jatun mandajca, siriocunapaj carpacunaman rishpa: —Imashna cajta ricugrichi— nishpa cacharca.

¹⁵Chashna cachajpimi paicunaca, Jordán yacu ladocaman rinajurca. Chaiman rinajushpami, siriocuna muspaita calpashpa saquishca churajunacuna ashtahuan imalla charishcacuna ñan junda sirinajujta ricurca. Chaimandami, ricungapaj rij runacunaca, jatun mandajman villangapaj tigramurca.

¹⁶Chaita villajpimi gentecunaca, chai pueblomanda llujshishpa, siriocunapaj carpacunapi imalla tiashcacunata japingapaj rinajurca. Chaimandami Mandaj Dios villashcashnallata, canchis kilo yali ashtahuan ali jacutapash, chunga chuscu kilo chaupi yali cebadatapash, chunga shuj gramo yalita pezaj culquipajlla jatunajurca.

¹⁷Jatun mandajca, paita tucuipi servishpa causaj runatami, pungupi cuidashpa shayarichun churarca. Chaipimi paica, gentecuna urmachishpa sarujpi huañurca. Taita Diospaj runagu villashcashnallatami, paica huañurca. Chaitaca, chai runapajman jatun mandajhuan urai shamujujpimi, chashna villashca carca.

¹⁸Cashnapashmi tucurca: Taita Diospaj runaguca, jatun mandajmanmi cashna nishpa villashca carca: “Caya cai horasllatami, Samaria puebloman yaicuna pungu ladopica, canchis kilo yali ashtahuan ali jacutapash, chunga chuscu kilo chaupi yali cebadatapash, chunga shuj gramo yalita pezaj culquipajlla jatunajunga” nishcami carca.

¹⁹Taita Diospaj runagu chashna nijpimi, jatun mandajta tucuipi servij runaca, cashna nishpa villashca carca: “Jahua pacha ventanacunata, Mandaj Dios pascajpipash, na chashnaca tucungachu” nishcami carca. Shina nijpimi Eliseoca, cashna nishpa villashca carca: “Chaitaca, cambaj ñavihuambachami ricungui. Ashtahuangarin canga, chaicunataca na micunguichu” nishcami carca.

²⁰Shina nishcashnallatami tucurca. Chai runataca, puebloman yaicuna pungupi shayajujpimi, gentecuna sarushpa huañuchirca.