Read Imbabura Highland Quichua 2 REYES 8 Bible Online

2 REYES 8 - Imbabura Highland Quichua bible

2 REYES 8

¹Sunamita huarmipaj churitami, Eliseoca causachishca carca. Chai huarmitami, Eliseoca cashna nirca: “Mandaj Diosmi, yarjai punllacunata cai llactaman cachamushca. Chaica, canchis huatacamanmi canga. Shina cashcamanda cambash, cambaj familicacunapash caimanda rishpa, maipi can munashcapi causagrilla” nircami.

²Chaimandami chai huarmica, Taita Diospaj runagu nishcashnallata, paipaj familiacunandi rishpa, filisteocunapaj llactapi canchis huatacaman causagrirca.

³Ña canchis huata yalijpimi chai huarmica, filisteocunapaj llactamanda tigramurca. Shina tigramushpami, Israel llactata jatun mandajtaca: “Ñuca huasita, ñuca alpacunata tigrachihuai nipanimi” ningapaj rirca.

⁴Israel llactata jatun mandajca, Eliseota servij Giezi shuti runatami: “Eliseo imata juyailla rurashcacunata parlahuai nipanimi” nijushca carca.

⁵Chashna nijpi, shuj huarmipaj huahuata causachishcata jatun mandajman Giezi shuti runa parlajujpipachami, chai causachishca huahuapaj mamaca ñapash chayamurca. Chai huarmica: “Ñuca huasita, ñuca alpacunata tigrachihuai nipanimi” ningapajmi, jatun mandajpajman shamurca. Chai huarmi chayamujpimi Giezi shuti runaca, cashna nirca: —Jatun mandaj ñuca amolla. Cai huarmitamari parlajurcani. Cai huarmipaj cai churitamari, Eliseoca causachirca— nircami.

⁶Shina nijpimi jatun mandajca, chai huarmita tapuchirca. Shina tapuchijpimi, paica tucuita parlajurca. Chashna parlajujpimi jatun mandajca, paita servij shuj runataca, cashna nishpa cacharca: “Imalla cai huarmipaj cashcatapash, pai cai llactamanda llujshishca punllamandapacha cunangaman paipaj alpacunapi granocuna fucushcacunatapash tucuillata tigrachinajuchun mandagri” nircami.

⁷Chai jipami Eliseoca, Damasco puebloman rirca. Chaipica, Siria llactata jatun mandaj Ben-adad shuti runami huañujushca carca. Shina huañujujpimi: —Taita Diospaj runagumi, caiman shamushca— nishpa villanajurca.

⁸Shina villajpimi jatun mandajca, Hazael shuti runataca cashna nirca: —Ima caranagutapash apashpa, Taita Diospaj runaguta tuparingapaj ri. Paitaca: ‘¿Cai ung:uimandaca aliyanachu cani imashi?’ nijunmi nishpa, Mandaj Diosta tapupai ningui— nircami.

⁹Shina nijpimi Hazael runaca, Damasco pueblopi imalla ashtahuan ali tiashcacunata, chuscu chunga camellopi apachishpa, Eliseotaca tuparingapaj rirca. Ña chaiman chayashpaca, paipaj ñaupajpi shayarishpami cashna nirca: —Siria llactata jatun mandajca, cambaj churishnallatami, paimi: ‘¿Cai ung:uimandaca, aliyanachu capani imashi?’ nishpa tapuchun cachamuhuan— nircami.

¹⁰Shina nijpimi Eliseoca, cashna nirca: —‘Ari, chai ung:uimandaca aliyanguipachami’ ninmi ningapaj rilla. Shina cashpapash paica huañunapacha cajtami, Mandaj Diosca ricuchihuarca— nircami.

¹¹Shina nishpallami, Taita Diospaj runaguca, Hazael runataca ricunman quedarca. Hazael runa pingai tucungacamanmi, chashna ricujurcalla. Chashna ricujushpallatami, Taita Diospaj runaguca huacai callarirca.

¹²Chaimandami Hazael runaca: —Ñucata mandajlla, ¿imashpata huacangui?— nishpa tapujpi, Eliseoca cashna nirca: —Israelcunatami, jatun llaquita can ruranata yachani. Canga, paicunapaj torrecunatapash, ninahuan rupachishpami tucuchingui. Chairalla viñaicunatapash espadahuanmi huañuchingui, huahuacunatapash japishpa shitashpami huañuchingui. Shinallata vijsayu huarmicunatapash, vijsata liquishpami huañuchingui— nircami.

¹³Shina nijpimi Hazael runaca, cashna nirca: —Canda servij ñucaca, yanga alcugushnami cani. ¿Imashnamanda chashna jatun llaquicunataca rurashayari?— nircami. Shina nijpimi Eliseoca, cashna nirca: —Candaca, Siria llactata jatun mandaj tucunatami, Mandaj Diosca ricuchihuarca— nircami.

¹⁴Shina nijpica, Hazael runaca rircallami. Chaimanda rishpa, paipaj amopajman chayajpimi jatun mandajca: —Eliseoca, ¿ima nircata?— nishpa tapurca. Shina tapujpimi paica: —Chai ung:uimandaca aliyanguipachami ninmi— nirca.

¹⁵Chai cayandi punllami, shuj paño finduta yacupi satishpa, Ben-adad runapaj shimita quilpajpi, Ben-adad runaca huañurca. Paipaj randica, Hazael runami mandajurca.

¹⁶Acab shuti runapaj churi Joram shuti runaca, picha huatata Israel llactata ña mandajujpimi, Judá llactata jatun mandaj Josafat runapaj churi Joram shuti runaca, Judá llactata mandai callarirca.

¹⁷Paica, quimsa chunga ishcai huatata charishpami, mandai callarirca. Pusaj huatatami Jerusalenbi mandajurca.

¹⁸Paica, Israel llactata jatun mandajcuna imashna causashcashnami, Acab runapaj huasi ucu purashnallata nalita rurashpa causajurca. Paipaj huarmica, Acab runapaj ushimi carca. Chaimandami Mandaj Diospaj ñaupajpica, chashna nalita rurajurca.

¹⁹Shina cajpipash Mandaj Diosca, paita servij Davidta juyaimandami, Judá llactata tucuchingapaca na munarca. Paica, Davidmambash, paipaj miraicunamambash cashnami nishca carca: “Micha lamparagushna cachunmi, cambaj miraicuna mandanajuchunga, causaita causaicaman cangunaman cusha” nishcami carca.

²⁰Joram shuti runa runa mandajui huatacunapimi, Edom llactapi causajcunaca, Judá llacta mandajujtaca na cazushpa, paicunata mandachunga shuj jatun mandajta churanajurca.

²¹Chaimandami Joram shuti runaca, tucuilla carretacunandi, Zair shuti puebloman rirca. Paica, tuta jatarishpami paitapash, paipaj carretacunapi purij soldadocunata mandajcunatapash chaupipi churashpa tianajuj edomitacunahuan macanajungapaj rirca. Chashna rijpimi gentecunaca, paicunapaj carpacunaman calpanajurca.

²²Shina cashpapash Edom llactapi causajcunaca, Judá llacta mandajushcamandaca cacharirircami. Cunangamanmi chashna causanajun. Chai huatapillatami, Libna shuti pueblopi causajcunapash, na cazushpa shayarinajurca.

²³Joram shuti runa ashtahuan imatalla rurashcacunapash, tucui imatalla rurashcapash, ¿nachu Judá llactata jatun mandajcuna imashna causashcata villajuj libropi escribishca tiajun?

²⁴Joram shuti runa huañushpa, paipaj ñaupa taitacunahuan tandanajujpica, chai taitacunata pambashca ladopillatami, Davidpaj pueblopi pambarca. Paipaj randica, Ocozías shuti paipaj churimi mandajurca.

²⁵Acab shuti runapaj churi Joram shuti runaca, chunga ishcai huatata Israel llactata ña mandajujpimi, jatun mandaj Joram shuti runapaj churi Ocozías shuti runaca, Judá llactata mandai callarirca.

²⁶Ocozías runa mandai callarijushpaca, ishcai chunga ishcai huatatami charirca. Paica, shuj huatatallami Jerusalenbi mandajurca. Paipaj mamaca, Israel llactata jatun mandaj Omri shuti runapaj ushi, Atalía shutimi carca.

²⁷Ocozías runapash, Acab runapaj huasi ucu puracuna causashcashnallatami causajurca. Paica, Acab runapaj masha cashpami, Mandaj Diospaj ñaupajpica, Acab runapaj huasi ucu purashnallata nalita rurashpa causajurca.

²⁸Ocozías runaca, Acab runapaj churi Joram shuti runahuan tandanajushpami, Siria llactata jatun mandaj Hazael runahuan macanajungapaj, Galaad llactapi tiaj Ramot shuti puebloman rirca. Chai macanajuipimi siriocunaca, Joram shuti runata chugrichirca.

²⁹Jatun mandaj Joram shuti runaca, siriocunahuan macanajuipi chugrichishcata jambiringapajmi, Jezreel puebloman tigrarca. Paitaca, Siria llactata jatun mandaj Hazael runahuan macanajungapaj rijpimi, Ramot shuti pueblo chimba purapi chugrichishca carca. Acab runapaj churi Joram shuti runaca, ña huañunalla cajpimi, Judá llactata jatun mandaj Joram shuti runapaj churi Ocozías runaca, Jezreel pueblopi ricungapaj urai rirca.