Read Imbabura Highland Quichua 1 CRÓNICAS 10 Bible Online

1 CRÓNICAS 10 - Imbabura Highland Quichua bible

1 CRÓNICAS 10

¹Filisteocunaca, israelcunahuanmi macanajunajurca. Israelcunaca, filisteocunapaj ñaupajmandami pacajushpa calpanajurca. Shinamandami israelcunaca, Gilboa shuti urcupi chugrichi tucushpa huañunajurca.

²Filisteocunaca Saultapash, paipaj churicunatapashmi catinajurca. Shina catishpami filisteocunaca, Jonatán, Abinadab, Malquisúa shuti, Saulpaj churicunata huañuchirca.

³Saúl runahuan ninandapacha macanajushpami, flechata cacharijcunaca, flechahuan chayachirca. Shinami Saultaca, flechata cacharijcuna chugrichirca.

⁴Chaimandami Saulca, pai jarcarina escudota apaj runataca cashna nirca: “Cambaj espadata llujchishpa, huashaman yalijta ñucata tujsishpa huañuchihuai. Circuncisión nishcata na rurashca chai runacuna shamushpa, ñucata asishpa ricunajuchunga na munanichu” nircami. Ashtahuangarin pai jarcarina escudota apaj runaca, ninanda manllashpami na huañuchingapaj munarca. Chaimandami Saulca, paipaj espadata japishpa, chai espada pundapi shitarirca.

⁵Saúl chashna huañujta ricushpami, paipaj escudota apaj runapash, paipaj espada pundapi shitarishpa huañurca.

⁶Chashnami Saulpash, quimsa paipaj churicunapash huañurca. Shinallata tucui paipaj huasi ucu purapashmi, paihuan huañurca.

⁷Pugru pambapi causanajuj tucui israelcunaca, Israel soldadocuna pacajungapaj calpanajujta, Saultapash, paipaj churicunatapash huañuchishcatami ricunajurca. Shina ricushpami, paicuna causanajuj pueblocunata saquishpa, pacajushpa rinajurca. Shinamandami filisteocunaca, chai pueblocunaman shamushpa, chaipi causanajurca.

⁸Chai cayandi punllami, cashna tucurca: Filisteocunaca, huañushcacunapaj churajushcacunata surcungapaj shamushpami Saultaca, paipaj churicunandi, Gilboa urcupi huañushca sirinajujta tarirca.

⁹Saultaca, churajushcata surcuchishca jipami, umatapash fitishpa, paipaj macanajunacunatapash japinajurca. Chai jipaca, filisteocunapaj tucui llactapimi, paicunapaj yanga dioscunamambash, chaipi causajcunamambash villagrichun, villajcunata cachanajurca.

¹⁰Shinallata Saulpaj macanajunacunataca, paicunapaj dioscunapaj huasipimi churanajurca. Paipaj umatapash, Dagón shuti diospaj huasipimi huarcunajurca.

¹¹Saulta, filisteocuna chashna rurashcataca, Galaad llactapi tiaj Jabes shuti pueblopi tucui causajcunami uyarca.

¹²Chaimandami, ninan shinlli tucuilla runacuna jatarishpa shamurca. Paicunami, Saulpaj cuerpotapash, paipaj churicunapaj cuerpocunatapash japishpa, Jabes shuti puebloman apamunajurca. Chaiman apamushpami paicunapaj tullucunataca, chai pueblo ladopi shayajuj encina nishca quiru ucupi pambarca. Chai jipaca, canchis punllacamanmi na micunajurca.

¹³Mandaj Diosta pai na cazushpa fiñachishcamanda, yachashpata na cazushcamandami, Saulca chashna huañurca. Paica, Mandaj Dios mandashca shimicunata na cazushpami, yachaj huarmitara tapugrirca.

¹⁴Paica, Mandaj Diostaca na tapurcachu. Chaimandami, paipaj causaita quichushpa, mandana llactataca, Isaí runapaj churi Davidman curca.