Read Imbabura Highland Quichua 1 CRÓNICAS 11 Bible Online

1 CRÓNICAS 11 - Imbabura Highland Quichua bible

1 CRÓNICAS 11

¹Tucui israelcunami, Hebrón shuti pueblopi Davidhuan tandanajushpa, cashna ninajurca: “Ricui, ñucanchica cambaj tullu, cambaj aichallatami canchi.

²Shinallata Saúl mandajui punda punllacunapash, israelcunataca canmi macanajuiman pushan carcangui, canllatami tigrachimun carcangui. Canda Mandaj Taita Diosllatami, candaca cashna nirca: ‘Canmi, ñuca agllashca israelcunataca michingui. Canmi, ñuca agllashca israelcunataca mandangui’ nircami” ninajurcami.

³Israelcunata mandaj tucui rucucuna, Hebrón shuti pueblopi jatun mandajpajman tucuilla shamujpimi Davidca, Mandaj Diospaj ñaupajpi paicunahuan ari ninajurca. Mandaj Dios, Samuelhuan imashna villachishcashnallatami, israelcunata jatun mandaj cachun Davidtaca, aceiteta talishpa javirca.

⁴Chai jipami, tucui israelcunandi Davidca, Jebus nishca Jerusalenman rirca. Chai llactapica, jebuseocunami causanajurca.

⁵Chai Jebus nishca pueblopi causajcunami, Davidtaca: “Canga, na caimanga yaicumunguichu” ninajurca. Ashtahuangarin Davidca, muyundi shinlli pircahuan jarcashca Sion shuti pueblotaca quichurcallami. Chaitami cunanga, Davidpaj pueblo ninajun.

⁶Chaipimi Davidca, cashna nirca: “Jebuseocunahuan macanajungapaj maijambash ñaupashpa yaicushpa paicunata mishashpaca, paimi tucui soldadocunata mandaj tucunga” nircami. Chashna nijpimi, Sarvia shuti huarmipaj churi Joab runaca, ñaupashpa vichai rirca. Chaimandami paitaca, tucui soldadocunata mandaj cachun churarca.

⁷Chai jipami Davidca, muyundi jatun pircahuan jarcashca pueblopi causajurca. Chaimandami chai pueblotaca, Davidpaj Pueblo nishpa shutichirca.

⁸Davidca, chai muyundipimi pueblota rurarca. Milo shuti pambamanda callarishpaca, jatun pirca ladocamanmi pueblota rurachirca. Puchushca pueblotaca, Joab runami cutin alichijurca.

⁹Davidca, ashtahuan ashtahuanmi ñaupajman rijurca. Tucuita Mandaj Diosmi, paihuan carca.

¹⁰Davidpaj ninan shinlli soldadocunata mandajcunaca, caicunami: Paicunami, David mandai callarichunga, israelcunahuan tandanajushpa ninanda ayudanajurca. Mandaj Dios villashcashnallatami, israelcunata jatun mandaj cachun churanajurca.

¹¹Davidpaj ashtahuan shinlli soldadocunaca, caicunami: Quimsa chunga ashtahuan shinlli soldadocunata mandajca, Hacmoni shuti runapaj churi Jasobeam shuti runami carca. Paimi, shuj punllapica, quimsa patsaj soldadocunata paipaj lanzahuan huañuchirca.

¹²Paipaj catica, ahohíta nishcapura Dodo shuti runapaj churi Eleazarmi carca. Paipash, chai quimsa ashtahuan shinlli soldado purallatami carca.

¹³Shuj punllami paica, Pas-damin shuti pambapi Davidhuan purijurca. Chaipillatami filisteocunapash, israelcunahuan macanajungapaj tandanajushca carca. Chaipica, cebadata tarpushca pambami tiarca. Chai pambamandami israelcunaca, filisteocuna mishajpi pacajushpa calpanajurca.

¹⁴Paicunaca, chai cebada pamba chaupipi shayarishpami, filisteocunahuan macanajushpa misharca. Mandaj Diosllata ayudashpa mishachijpimi, ninandapacha misharca.

¹⁵Shuj punllami, chai quimsa chunga ninan shinlli soldado puramanda quimsa soldadocunaca, jaca ucupi tiaj Adulam shuti jatun utujuman rinajurca. Chai utujupi David tiajujpimi, paihuan tuparingapaj rinajurca. Filisteocunaca, Refaim shuti pugru pambapimi, carpacunata shayachishpa tianajurca.

¹⁶Davidca, shinlli torrepi cajpimi, filisteo soldadocunaca, Belén pueblopi chapanajurca.

¹⁷Chaipi cashpami Davidca, ninanda yacunayachishpa cashna nirca: “¡Belén pueblo pungu ladopi, yacuta llujchingapaj allashca jatun utujumanda yacuta maijambash apamugrishpa, ñucaman carashpachari ali canman!” nircami.

¹⁸Chashna nijpimi, chai quimsa soldadocunaca, filisteo soldadocuna tianajuj chaupita yalishpa, Belén pueblo pungu ladopi allashca jatun utujumanda yacuta llujchishpa, Davidman apamunajurca. Ashtahuangarin Davidca, na ufiangapaj munashpami chai yacutaca, Mandaj Diosman talishpa cashna nijurca:

¹⁹“Cai yacuta ñuca ufiachunga, ñuca Taita Diosca ama saquihuachun. Cai runacunaca, paicuna huañunatapash na manllashpami, cai yacutaca apamunajurca. Cai yacuta ufiashpaca, paicunapaj yahuarta ufianshna ufiasha” nishpami, na ufiangapaj munarca. Chaitaca, chai ninan shinlli quimsa soldadocunami, chashna ruranajurca.

²⁰Joab runapaj huauqui Abisai shuti runaca, chai quimsa chunga soldadocunata mandajmi carca. Paica, quimsa patsaj runacunahuan macanajushpami, paicunataca paipaj lanzahuan huañuchirca. Chaimandami paica, chai quimsa soldadocunashnallata, ashtahuan rijsishca tucurca.

²¹Paica, chai quimsa chunga soldado purapica, ashtahuan alicachi tucushcapash, paicunata mandajpashmi carca. Shina cashpapash, chai punda quimsa soldadocunashnaca na carcachu.

²²Cabseel shuti pueblopi causanajuj, ninan shinlli Joiada shuti runapaj churi Benaía shuti runapashmi, jatun ruraicunata rurajurca. Paimi, Moab llactapi ishcai leongunahuan macanajushpa misharca. Shinallata rasu urmajuj punllapi, shuj jatun utujuman urai yaicushpami, shuj leonda huañuchirca.

²³Paillatami, Egiptomanda shuj runatapash misharca. Chai runaca, ishcai metro ishcai chunga picha centímetro jatunmi carca. Paica, ahuashcata pilluna caspishnalla racu lanzatami charijurca. Ashtahuangarin Benaía shuti runaca, shuj caspiguhuanlla urai rishpami, Egiptomanda chai runataca macashpa, lanzata quichurca. Chai lanzahuanllatami, chai runataca huañuchirca.

²⁴Chaimandami, Joiada shuti runapaj churi Benaía shuti runaca, chai quimsa ninan shinlli soldado purallata tucurca.

²⁵Quimsa chunga shinlli soldado purapi ashtahuan alicachi tucushca cashpapash, caishuj quimsa punda soldadocunashnaca, na carcachu. Benaía shuti runatami, Davidca paita cuidaj cachun churarca.

²⁶Soldado puramanda ashtahuan shinllicunaca, caicunami: Joab runapaj huauqui Asael runapash, Belén pueblomanda Dodo shuti runapaj churi Elhanan shuti runapash,

²⁷Harod shuti pueblomanda Samot shuti runapash, pelonitapura Heles shuti runapashmi carca.

²⁸Tecoa shuti pueblomanda Iques shuti runapaj churi Ira shuti runapash, Anatot shuti pueblomanda Abiezer shuti runapashmi carca.

²⁹Husitapura Sibecai shuti runapash, ahohitapura Ilai shuti runapash,

³⁰netofatita nishca puramanda Maharai shuti runapash, Baana shuti runapaj churi Heled shuti runapashmi carca. Paipash, netofatita purallatami carca.

³¹Benjaminbaj miraicunapaj, Gabaa shuti pueblomanda Ribai shuti runapaj churi Itai runapash, Piratón shuti pueblomanda Benaía runapashmi carca.

³²Gaas shuti yacu ladopi causajuj Hurai shuti runapash, Arba shuti pueblomanda Abiel shuti runapashmi carca.

³³Barhumitapura Azmavet shuti runapash, saalbonitapura Eliaba shuti runapash,

³⁴gizonitapura Hasem shuti runapaj churicunapash, aramitapura Sage shuti runapaj churi Jonatán runapashmi carca.

³⁵Araritapura Sacar shuti runapaj churi Ahíam shuti runapash, Ur shuti runapaj churi Elifal shuti runapashmi carca.

³⁶Mequerapura Hefer shuti runapash, pelonitapura Ahías shuti runapashmi carca.

³⁷Carmel shuti pueblomanda Hezro shuti runapash, Ezbai shuti runapaj churi Naarai shuti runapashmi carca.

³⁸Natán runapaj huauqui Joel runapash, Hagrai shuti runapaj churi Mibhar shuti runapashmi carca.

³⁹Amonitapura Selec shuti runapash, beeronitapura Naharai shuti runapashmi carca. Paica, Sarvia shuti huarmipaj churi Joab runapaj jarcarina escudota apaj runami carca.

⁴⁰Itritapura Ira shuti, Gareb shuti runacunapashmi carca.

⁴¹Heteopura Urías runapash, Ahlai shuti runapaj churi Zabad shuti runapashmi carca.

⁴²Rubenbaj miraipura Siza shuti runapaj churi Adina shuti runapashmi carca. Paica, rubenitacunata mandajmi carca. Paihuanmi, quimsa chunga ninan shinlli runacunaca tandanajurca.

⁴³Shinallata Maaca shuti huarmipaj churi Hanán runapash, mitnitapura Josafat runapashmi carca.

⁴⁴Astarotitapura Uzías runapash, Hotam shuti runapaj Sama shuti, Jehiel shuti churicunapashmi carca. Paicunaca, aroerita purami carca.

⁴⁵Simri shuti runapaj churi Jediael shuti runapash, tizita nishca paipaj huauqui Joha shuti runapashmi carca.

⁴⁶Mahavitapura Eliel shuti runapash, Elnaam shuti runapaj Jerebai shuti, Josavía shuti churicunapash, moabitapura Itma shuti runapashmi carca.

⁴⁷Mesobaitapura Eliel, Obed, Jaasiel shuti runacunapashmi carca.