Read Imbabura Highland Quichua 1 CRÓNICAS 13 Bible Online

1 CRÓNICAS 13 - Imbabura Highland Quichua bible

1 CRÓNICAS 13

¹Shinamandami Davidca, huaranga soldadocunata, patsaj soldadocunata mandajcunahuan, tucui caishuj mandajcunahuambash parlarijurca.

²Chai jipami Davidca, tandanajushca tucui israelcunata cashna nijurca: “Cangunapi ali cajpi, shinallata ñucanchita Mandaj Taita Diospaj munai cajpica, tucui Israel llactapi quedashca ñucanchi huauquicunapash ñucanchihuan tandanajuchun, cayachun cachashunchi. Shinallata paicunapaj pueblocunapi, michina pambacunapi paicunahuan causanajuj curacunatapash, levitacunatapash pushamuchun cachashunchi.

³Ñucanchi Taita Diospaj arcataca, ñucanchipajman apamushunchi. Ñucanchica, Saúl mandajui huatacunamandapachami cungashpa saquishcanchi” nijurcami.

⁴Chashna nishca yuyaicunapaca, tucuicunapaj ali uyarijpimi, tucui chaipi tandanajushcacunaca, chashna rurashunchilla ninajurca.

⁵Chaimandami Davidca, Egipto llactapaj linderopi tiajuj Sihor shuti pambamanda callarishpa, Hamat shuti puebloman yaicunacaman tucui israelcunata tandachirca. Paica, Taita Diospaj arcata, Quiriat-jearim shuti pueblomanda apamugrichunmi, chashna tandachirca.

⁶Davidca, tucui israelcunata pushashpami, Mandaj Taita Diospaj arcata yalichimungapaj, Judá llactapi tiaj Baala nishca Quiriat-jearim shuti puebloman vichai rirca. Chai arca jahuapi tiaj querubín nishcacunapaj chaupipimi, Diosca causajun. Chaipimi paitaca, paipaj shutipi mañana carca.

⁷Taita Diospaj arcataca, shuj mushuj carretapi churashpami, Abinadab shuti runapaj huasimandaca apanajurca. Uza shuti, Ahío shuti runacunami, chai carretataca aisashpa rinajurca.

⁸Shinallata Davidpash, tucui israelcunapashmi, Taita Diospaj ñaupajpica arpata, salteriota, tamborilta, platillota, trompetata tucui ushaihuan tocashpa, ninanda cushijunajurca.

⁹Ashtahuangarin Quidón shuti trillana pambaman chayashpaca, huagracuna nitijajpimi, Uza shuti runaca, paipaj maquita chutashpa, arcata charirca.

¹⁰Arcata chashna charishcamandami, Mandaj Diosca nina japirinshna ninandapacha fiñarishpa, Uza shuti runataca, chai pushtupillata causaita quichurca. Chashnami Uza shuti runaca, chai pushtupillata Taita Diospaj ñaupajpi huañurca.

¹¹Uza shuti runapaj causaita, Mandaj Dios chashna quichujpimi, Davidca ninanda llaquirirca. Chaimandami chai pambataca, Pérez-uza shutita shutichirca. Chai pambaca, cunangaman chai shutillatami.

¹²Davidca, chai punllapica, Taita Diosta ninanda manllashpami: “Taita Diospaj arcataca, ¿imashnata ñuca huasiman apamushayari?” nirca.

¹³Davidca, chai arcataca paipaj pueblopi tiaj paipaj huasimanga na apamurcachu. Ashtahuangarin Gat shuti pueblomanda Obed-edom shuti runapaj huasimanmi aparca.

¹⁴Taita Diospaj arcataca, Obed-edom shuti runapaj familiahuanmi quimsa quillacaman, paipaj huasipi saquirca. Chaimandami Mandaj Diosca, Obed-edom shuti runapash, paipaj huasi ucu puratapash, tucui imatalla pai charishcatapash bendiciajurca.