Read Imbabura Highland Quichua 1 CRÓNICAS 14 Bible Online

1 CRÓNICAS 14 - Imbabura Highland Quichua bible

1 CRÓNICAS 14

¹Tiro shuti pueblota jatun mandaj Hiram shuti runaca, paipaj randi parlajcunatami, Davidpajman cachamurca. Shinallata Davidpaj huasita shayachinajuchumbash, cedro caspicunatami cachamurca. Pircanata yachaj runacunatapash, carpinterocunatapashmi cachamurca.

²Chaita ricushpami, israelcunata jatun mandaj cachunga, Mandaj Diosllata shinllitapacha churashcata Davidca yacharca. Shinallata Dios agllashca israelcunata mandajushcata jatunyachishcatapashmi yacharca.

³Davidca, Jerusalenbipashmi shuj huarmicunahuan cazararcara. Chai huarmicunahuanmi, Davidca ashtahuan churicunata, ushicunatapash charircarami.

⁴Jerusalenbi pai charishca churicunapaj shuticunaca, caicunami: Samúa, Sobab, Natán, Salomón,

⁵Ibhar, Elisúa, Elpelet,

⁶Noga, Nefeg, Jafía,

⁷Elisama, Eliada, Elifelet shuticunami carca.

⁸Davidtaca, tucui israelcunata jatun mandaj cachun, aceiteta talishpa javishcata filisteocuna yachashpami, tucuilla filisteocuna Davidta mascangapaj vichai shamunajurca. Chashna shamunajujta yachashpami, Davidca paicunahuan macanajungapaj llujshirca.

⁹Filisteocuna chayamushpaca, Refaim shuti pugru pamba jundami shuyanajurca.

¹⁰Chaimandami Davidca, cashna nishpa Taita Diosta tapurca: —¿Filisteocunahuan macanajungapaj, vichai rinallachu cani? ¿Paicunataca, ñuca maquipi churapanguichu imashi?— nircami. Shina nishpa tapujpimi Mandaj Diosca, cashna nirca: —Paicunahuan macanajungapaj vichai rilla. Paicunataca, cambaj maquipi churagrinimi— nircami.

¹¹Shina nijpimi Davidca, Baal-perazim shuti pambaman vichai rishpa, filisteocunahuan chaipi macanajushpa misharca. Chai jipami Davidca, cashna nirca: “Taita Diosca jatun yacuta cacharishpa, tucuilla t'uninshnami ñucata fiñajcunataca mishachihuan” nircami. Chaimandami chai pambataca, Baal-perazim shutita shutichirca.

¹²Chashna mishajpimi filisteocunaca, paicunapaj dioscunatapash saquishpa rishca carca. Chai dioscunata rupachinajuchunmi, Davidca mandarca.

¹³Shina cajpipash filisteocunaca, cutin tigramushpami, chai pugru pambaman jundamunajurca.

¹⁴Chaimandami Davidca, Taita Diosta cutin tapujpi, Taita Diosca cashna nirca: —Paicunapaj huashataca, ama vichai catinguichu. Ashtahuangarin muyundi shayarishpa, bálsamo quiru chaupicunata yaicushpa japingui.

¹⁵Chai bálsamo quiru fanga pundacuna tsal nij uyarijpica, macanajungapaj llujshinguilla. Chai filisteo soldadocunataca, Taita Dios ñuca ñaupashpa rishpami, chugrichishpa huañuchisha— nircami.

¹⁶Shina nijpimi Davidca, Taita Dios mandashcashnallata rurarca. Chaimandami filisteo soldadocunataca, Gabaón shuti pueblomandaca, Gezer shuti pueblocaman catishpa misharca.

¹⁷David chashna mishashcataca, tucui llactacunapi causajcunami yachanajurca. Mandaj Diosca, tucui shuj llactacunapi causajcunamambashmi, Davidta manllana yuyaita churarca.