Read Imbabura Highland Quichua 1 CRÓNICAS 15 Bible Online

1 CRÓNICAS 15 - Imbabura Highland Quichua bible

1 CRÓNICAS 15

¹Davidca, paipaj pueblopimi, paipaj quiquin huasicunata shayachirca. Shinallata Taita Diospaj arcata churangapajpash, shuj pushtupi juyailla alichishpami, shuj carpata shayachirca.

²Chai jipami, Davidca cashna nirca: “Taita Diospaj arcataca, na maijambash apai ushanallachu, levitacunallami apai ushana. Mandaj Diosca, paicunatami Mandaj Diospaj arcata apanajuchumbash, paicunapaj tucui causaipi paita servinajuchumbash agllashca” nircami.

³Chai jipami Davidca, tucui israelcunata Jerusalenman tandachimurca. Pai shayachishca huasiman Mandaj Diospaj arcata yalichimushpa, maipi churana pushtupillata churachunmi, chashna tandachirca.

⁴Aaronbaj churicunatapash, levitacunatapashmi Davidca tandachimurca.

⁵Coat shuti runapaj mirai puramanda paicunata mandaj Uriel shuti runami, patsaj ishcai chunga huauquicunandi shamurca.

⁶Merari shuti runapaj mirai puramandaca, paicunata mandaj Asaías shuti runami, ishcai patsaj ishcai chunga huauquicunandi shamurca.

⁷Gersonbaj mirai puramandaca, paicunata mandaj Joel shuti runami, patsaj quimsa chunga huauquicunandi shamunajurca.

⁸Elizafán shuti runapaj mirai puramandaca, paicunata mandaj Semaías shuti runami, ishcai patsaj huauquicunandi shamurca.

⁹Hebrón shuti runapaj mirai puramandaca, paicunata mandaj Eliel shuti runami, pusaj chunga levitacunandi shamurca.

¹⁰Uziel shuti runapaj mirai puramandaca, paicunata mandaj Aminadab runami, patsaj chunga ishcai levitacunandi shamurca.

¹¹Davidca, Sadoc shuti, Abiatar shuti curacunatapash, Uriel, Asaías, Joel, Semaías, Eliel, Aminadab shuti levitacunatapashmi cayarca.

¹²Paicunatami cashna nijurca: “Cangunami, levitacunapaj familiacunata mandaj taitacuna canguichi. Chaimandami, israelcunata Mandaj Taita Diospaj arcata, ñuca shayachishca huasiman yalichimungapaca cangunapash, Diosta servij caishuj huauquicunapash alichirishpa Diospajlla tucuna canguichi.

¹³Punda callaripica, canguna na chashna alichirishca cajpimi, ñucanchita Mandaj Taita Diosca llaquichirca. Pai mandashcashnallata, paita na mascajpimi, chashna rurarca” nijurcami.

¹⁴Israelcunata Mandaj Taita Diospaj arcata Jerusalenman apamungapaca, chashnami curacunapash, levitacunapash, Diospajlla tucushpa alichirinajurca.

¹⁵Taita Diospaj arcataca, levitacunami Mandaj Dios mandajpi Moisés mandashcashnallata, caspicunapi churashpa, rigrapi apamunajurca.

¹⁶Shinallata Davidca, levitacunata mandajcunataca cashnami nirca: “Tocana salteriocunata, arpacunata, platillocunata tocashpa, cushijuihuan shinlli candashpa rinajuchun, cangunapaj huauquicunata agllashpa churaichi” nircami.

¹⁷Shina nijpimi levitacunaca, Joel runapaj churi Hemán shuti runata agllarca. Paipaj huauqui puramandaca, Berequías shuti runapaj churi Asaf runatami agllarca. Shinallata Merari shuti runapaj mirai puramanda, paicunapaj huauqui puramandaca, Cusaías shuti runapaj churi Etán shuti runatapashmi agllarca.

¹⁸Paicunahuanga: Zacarías, Jaaziel, Semiramot, Jehiel, Uni, Eliab, Benaía, Maasías, Matatías, Elifelehu, Micnías shuti huauquicunatapashmi, cati ruranacunapaj agllarca. Obed-edom shuti, Jeiel shuti levitacunami, pungupica cuidan carca.

¹⁹Shinami Hemán, Asaf, Etán shuti candajcunaca, bronce platillocunata huactanajun carca.

²⁰Zacarías, Aziel, Semiramot, Jehiel, Unai, Eliab, Maasías, Benaía shuti levitacunaca, salteriocunatami Alamot nishca tonopi ashtahuan ñañullaguta tocanajun carca.

²¹Matatías, Elifelehu, Micnías, Obed-edom, Jeiel, Azazías shuti levitacunaca, arpacunatami ashtahuan racullata tocashpa candachin carca.

²²Tucui levitacunata ashtahuan yali candanacunata yachaj Quenanías shuti runatami, candanata yachachij cachun churarca. Paica, tocanataca alipacha yachajmi carca.

²³Diospaj arcataca, Berequías shuti, Elcana shuti levitacunami cuidanajurca.

²⁴Shinallata Sebanías, Josafat, Natanael, Amasai, Zacarías, Benaía, Eliezer shuti curacunaca, Taita Diospaj arca ñaupajpimi, trompetata huacachinajurca. Obed-edom shuti, Jehías shuti levitacunapash, Diospaj arcata cuidajcunallatami carca.

²⁵Davidpash, israelcunata mandaj rucucunapash, huaranga huaranga soldadocunata mandaj soldadocunapash cushijushpami, Obed-edom shuti runapaj huasimandaca, Mandaj Dioshuan ari ninajushpa escribishcata alichishca arcata apamungapaj rinajurca.

²⁶Mandaj Dioshuan ari ninajushpa escribishcata alichishca arcata apanajuj levitacunaca, Taita Dios ayudajujpimi, canchis maltun shicucunata, canchis jari llamacunata Diosman cushpa huañuchinajurca.

²⁷Davidca, ashtahuan ali linota rurashca churajunatami churajushca carca. Shinallata arcata apanajuj tucui levitacunapash, candaj levitacunapash, chai candajcunata yachachij Quenanías shuti runapashmi, chashnallata churajunata churajushca carca. Davidca, linota rurashca efod nishcatapashmi churajushca carca.

²⁸Chashnami, Mandaj Dioshuan ari ninajushpa escribishcata alichishca arcataca, tucui israelcuna ninan cushijuihuan shinllita candashpa apamunajurca. Paicunaca bocinata, trompetata, platillota, salteriota, arpatapashmi shinllita tocashpa rinajurca.

²⁹Ashtahuangarin Mandaj Dioshuan ari ninajushpa escribishcata alichishca arcahuan, Jerusalenbi tiaj Davidpaj puebloman ña chayajpimi, Saulpaj ushi Mical shuti huarmica, shuj ventanamanda ricujurca. Paica, jatun mandaj David fahuashpa danzashpa shamujujtami ricurca. Shinamandami paipaj shungupica, nalicachishpa yangapi churarca.