Read Imbabura Highland Quichua 1 CRÓNICAS 16 Bible Online

1 CRÓNICAS 16 - Imbabura Highland Quichua bible

1 CRÓNICAS 16

¹Chashnami, Taita Diospaj arcataca apamunajurca. Ña apamushpaca, chai arcata churangapajllata David shayachishca carpa chaupipimi churanajurca. Chai jipami, animalcunata Diosman cushpa, tucuillata rupachinajurca. Shinallata Dioshuan ali cangapajpash, animalcunata cushpami, Taita Diospaj ñaupajpi huañuchinajurca.

²Diosman animalta cushpa tucuillata rupachinatapash, Dioshuan ali cangapaj carashpa huañuchina animalcunatapash cushca jipami Davidca, Mandaj Diospaj shutipi tucui israelcunata bendiciarca.

³Chai jipaca, tucui israelcunamanmi jaricunamambash, huarmicunamambash, shuj mishqui tandahuan, asha aichahuan, chaquichishca uvasta rurashca tandahuan cararca.

⁴Davidca, Mandaj Diospaj arca ñaupajpi Diospajta ruranajuchunmi, levita puramanda agllashpa churarca. Paicunataca, Diosta yarinajuchun, juchacunata Diosman villanajuchun, israelcunata Mandaj Taita Diosta alicachinajuchunmi churarca.

⁵Paicunata mandajca, Asaf shuti runami carca. Paipaj catica, Zacariasmi mandajurca. Paicunapaj catica: Jeiel, Semiramot, Jehiel, Matatías, Eliab, Benaía, Obed-edom, Jeiel shuti levitacunami mandanajurca. Paicunami salteriota, arpata tocanajurca. Ashtahuangarin Asaf shuti runaca, platillocunatami huactajurca.

⁶Shinallata Benaía shuti, Jahaziel shuti curacunapashmi, Taita Dioshuan ari ninajushpa escribishcata alichishca arca ñaupajpi, trompetata punllandi huacachinajurca.

⁷Shinamandami Davidca, chai punllallata Asaf shuti runahuambash, paipaj huauquicunahuambash, Mandaj Diosta caparishpa mañai callarirca:

⁸“Mandaj Diosta alicachipaichi, paipaj shutipi mañaichi. Pai imatalla rurashcataca, shuj gentecunaman villaichi.

⁹Paiman candaichi, Salmocunata paiman candaichi. Tucui juyaillacunata pai rurashcataca parlaichi.

¹⁰Jucha illaj paipaj shutipi ninanda cushijuichi. Mandaj Diosta mascajcunaca, tucui shunguhuan cushijuichi.

¹¹Mandaj Diostapash, paipaj ushaitapash mascaichi. Paipaj ñavitaca, punllandi mascaichi.

¹²Ima juyaillacunata pai rurashcataca yarichi. Jatun manllarinacunata rurashcatapash, paipaj shimihuan rimashpa llaquichinatapash yarichi.

¹³Diosta servij Israelpaj mirai cangunaca, yarichiyari. Pai agllashca Jacobopaj miraicunami canguichi.

¹⁴Mandaj Diosca, paimi ñucanchi Taita Dios. Pai llaquichishcacunaca, tucui cai pachapimi ricurin.

¹⁵Pai ari nishcataca, causaita causaicaman yariajunllami. Huaranga huaranga miraicunaman pai mandashca shimicunatapash yariajunllami.

¹⁶Abrahamman pactachishapacha nishpa ari nishcatapash, Isaacman juramentushca shimicunatapash yariajunmi.

¹⁷Chaitaca, pactachinajuchun cushca shimicuna cachunmi, shinllitapacha churashpa Jacoboman curca. Israelcunamanmi, causaita causaicaman ari nirca.

¹⁸Paica cashnami nirca: ‘Canaán llactatami canman carasha. Can japinataca, cambaj cachunmi carasha’ nircami.

¹⁹Shuj llactamanda huaquinlla shamushpa, chai llactapi huaquinlla purinajujpimi, chashna nirca.

²⁰Paicunaca, llactan llactanmi purinajurca, shuj llactamandaca shuj gentecunapajman yalishpami causanajurca.

²¹Paicunata llaquichishpa charichunga, na saquircachu. Ashtahuangarin paicunata juyaimandami, jatun mandajcunataca llaquichijurca.

²²‘Aceiteta talishpa javishca ñuca mandajcunataca, na tacarinachu canguichi. Ñuca ima nishcata villajcunataca, na llaquichinachu canguichi’ nircami.

²³Mandaj Diostaca, tucui cai pachapi causajcuna candaichi. Pai quishpichij cajtaca, punllandi punllandi villaichi.

²⁴Pai punchapamba cajtaca, gentecunapaj chaupipi candaichi. Ima juyaillacunata rurashcatapash, tucui llactacunapi villaichi.

²⁵Mandaj Diosca jatunmari. Paica, tucuita yali alicachi tucunamari. Tucui dioscunatapash ashtahuan yali manllana Diosmari.

²⁶Shuj gentecunapaj tucui dioscunaca, yanga dioscunami. Ashtahuangarin Mandaj Diosmi, jahua pachataca rurarca.

²⁷Paipaj ñaupajpica, alicachinajuipash juyailla punchapambapashmi tian. Pai causanapica tucui ushaipash, cushijuipashmi tian.

²⁸Gentecunamanda mirai familiacuna, Mandaj Diosman cunataca cuichiyari. Mandaj Diostaca, punchapambami cangui, ninan ushaita charijmi cangui nichiyari.

²⁹Mandaj Diostaca, paipaj shutita cazushpa alicachina cashcamandallata alicachinajuichi. Paiman caranacunatapash, paipaj ñaupajman apamushpa shamuichi. Mandaj Diostaca, jucha illaj, juyailla cashcamanda paipaj ñaupajpi cumurichi.

³⁰Paipaj ñaupajpica, tucui cai pachapi causajcuna manllaichi. Paimi, cai pachataca ama cuyurichun shinllipacha cachun ruranga.

³¹Jahua pachapash cushijuichi, cai pachapash ninanda cushijuichi. ‘Mandaj Diosmi mandajun’ nishpa, tucui llactacunapi villaichi.

³²Mama cuchapash, chaipi imalla tiajcunapash, caparishpa cushijuichi. Pambacunapash, chaipi tucui ima tiajcunapash, cushijuichi.

³³Shina cajpimi, cai pachapi mandangapaj shamujpica, bosquepi shayanajuj quirucunapash, Mandaj Diospaj ñaupajpi candanajunga. Paica, cai pachata mandangapajmi shamunga.

³⁴Mandaj Diostaca caparishpa mañaichi, paica alimari. Paipaj juyaica, causaita causaicamanmi.

³⁵Cashnatapash nichiyari: ‘Ñucanchita quishpichij Taita Dioslla, ñucanchita quishpichihuayari. Llacta chaupicunamanda cacharichishpa cushichihuayari. Cambaj jucha illaj shutita villanajungapaj, canda alicachishpa cushijunajungapaj, chashna rurapairi.

³⁶Israelcunata Mandaj Taita Diosca, na tucurina causaita causaicaman alicachi tucushca cachun’ nichiyari” nijurcami. Shina nijpimi, tucui gentecuna: “Shina cachun” nishpa, Mandaj Diosta alicachinajurca.

³⁷Davidca, Mandaj Dioshuan ari ninajushpa escribishcata alichishca arca ñaupajpica, Asaf shuti runatami paipaj huauquicunandi saquirca. Punllandi imata rurana cashcashnallata, Diospajta rurashpa causanajuchunmi, chai arca ñaupajpi saquirca.

³⁸Shinallata Obed-edom shuti runatapash, sucta chunga pusaj paipaj huauquicunatapash, Jedutún runapaj churi Obed-edom shuti runatapash, Hosa shuti runatapashmi, pungupi cuidachun saquirca.

³⁹Sadoc shuti curataca, caishuj cumba curacunandimi, Mandaj Diospaj jatun carpapi Diosta servichun, Gabaón shuti lomapi tiaj altarpi saquirca.

⁴⁰Mandaj Diosman punllandi animalcunata cushpa huañuchinajuchun, tucuillata rupachina altarpi chishipash, tutamandapash animalta Diosman cushpa tucuillata rupachinajuchunmi, chaipi saquirca. Israelcunata tucuita mandashpa Mandaj Dios escribichishcapi nishcashnallatami, rurana carca.

⁴¹Paicunahuanga, candachun agllashca Hemán shuti runatapash, Jedutún shuti runatapash, ña villashca caishujcunatapashmi chaipi saquirca. Mandaj Dios llaquinaca, causaita causaicaman cajpimi, paita ninanda alicachinajuchun chashna churarca.

⁴²Chai candajcunahuanga Hemán shuti, Jedutún shuti runacunatami trompetata, platillota, Taita Diospajlla shuj tocanacunatapash tocachun saquirca. Jedutún runapaj churicunataca, Diospaj carpa pungupi cuidachunmi saquirca.

⁴³Chai jipaca, tucui gentecunami paicunapaj huasiman tigranajurca. Davidpash, paipaj huasi ucu purata bendiciangapajmi, paipaj huasiman tigrarca.