Read Imbabura Highland Quichua 1 CRÓNICAS 17 Bible Online

1 CRÓNICAS 17 - Imbabura Highland Quichua bible

1 CRÓNICAS 17

¹Davidca, paipaj huasipi causajushpami, cashna tucurca: Davidca, Dios ima nishcata villaj Natán shuti runatami, cashna nirca: —Ricui ñucaca, cedro caspicunahuan rurashca huasipimi causajuni. Ashtahuangarin Mandaj Dioshuan ari ninajushpa escribishcata alichishca arcami, cortina ucupilla tiajun— nircami.

²Shina nijpimi Natán runaca, Davidtaca cashna nirca: —Tucui imata rurangapaj cambaj shungupi yarijushcataca rurailla. Taita Diosca canhuanmi— nircami.

³Taita Diosca, chai tutallatami Natán runataca cashna nirca:

⁴“Ñucata servij Davidpajman rishpa, cashna nigri: Mandaj Diosca, cashnami nin: ‘Ñuca causana huasitaca, canga na shayachinguichu.

⁵Israelcunata Egiptomanda llujchimushca punllamandapacha cunangaman, ima huasipipash na causashcanichu. Ashtahuangarin carpapimi, caishujpi chaishujpi causarcani. Jatun carpacunapipash, caishujpi chaishujpimi causarcani.

⁶Tucui israelcunahuan maita purijushpapash, israelcunapaj juezcunataca, ¿shuj shimitallapash rimashcanichu? Paicunatami, ñuca agllashca israelcunata michishpa pushachun churarcani. Paicunataca: ¿Imashpata cedro caspihuan ñucaman huasita na shayachinguichi?, ¿nishpa tapushcanichu?’ ninmi ningui.

⁷Shina cashcamanda cunanga, ñucata servij Davidtaca cashnatapash ningui: Tucuita Mandaj Diosmi, cashna nin: ‘Ñucami candaca, corralpi llamacunata cuidajushcamanda, llamacunata michishpa catijushcamanda llujchishpa, ñuca agllashca israelcunata mandachun churarcani.

⁸Maita can purijujpipash, tucuipimi canhuan carcani. Canda tucui fiñajcunatapash, cambaj ñaupajpimi mishachijurcani. Chashnamandami candaca, cai pachapi alicachi tucushca runacunatashnallata, cambaj shutitaca tucuicuna rijsishca cachun rurasha.

⁹Shinallata ñuca agllashca israelcunamanmi, shuj llactataca alichircani. Paicunataca, pipash ama ashtahuan anchuchinajuchunmi, chai llactapi causanajuchun, tarpunshna churarcani. Jatun nalita rurajcunapaj miraicunapash, na ñaupa huatacunashna tucuchinajungachu.

¹⁰Ñuca agllashca israelcunata mandachun, juezcunata churajui punllacunamandapachami llaquichinajurca. Ashtahuangarin cunanga, canda tucui fiñajcunapaj ñavitami, urai cumuchisha. Shinallata cambaj huasi ucu puratapash mandajcuna cachun, ñucallata churanata can yachachunmi, Mandaj Dios ñucallata villani.

¹¹Can huañuna punlla pactajpi ña huañushpa, cambaj ñaupa taitacunahuan tandanajujpipash, cambaj churicunamanda shujtami, can mandajushca llactapica shinllitapacha churasha.

¹²Paimi, ñuca huasita shayachinga. Pai mandashpa tiarinatapash, ñucami causaita causaicaman shinllita churasha.

¹³Ñucaca, paipaj taitami casha, paica ñuca churimi canga. Paimandaca ñuca juyaitaca, cambaj punda mandajmanda anchuchishcashnaca, na anchuchishachu.

¹⁴Ashtahuangarin ñuca huasipipash, ñuca mandanapipash, causaita causaicaman ali shinllipacha cachunmi churasha. Pai mandashpa tiajunataca, causaita causaicamanmi shinllitapacha churasha’ ninmi nigri” nijurcami.

¹⁵Natán runaguca, imashna tucuita pai uyashcashnallata, muscuipi imashna ricushcashnallatami, tucuita chashnatapacha Davidman villajurca.

¹⁶Chaita villajpimi, jatun mandaj Davidca, Mandaj Diospaj ñaupajman yaicushpa, cashna nijurca: “Mandaj Taita Dioslla, ñucata caiman pushamungapaca, ñucapash, ñuca huasi ucu purapash, ¿imata canchiyari?

¹⁷Taita Dioslla, cai tucuita rurashami nijushcapash, cambica ashallami ricurin. Shinallata canda servij ñucapaj huasi ucu puracuna, jipa punllacunapi imashna canamandapashmi villachishcangui. Mandaj Taita Dioslla, ñucatapash ali runatashnami ricuhuashcangui.

¹⁸Canda servij ñucata cashna alicachijujpica, David ñucaca, ¿imatata ashtahuanga mañapashayari? Canda servij ñucataca, canllata rijsihuanguimi.

¹⁹Mandaj Dioslla, canda servij ñucataca, tucui shunguhuan juyashpami, can jatun cajta ricuchingapaj cashna jatun alicunata rurapashcangui.

²⁰Mandaj Dioslla, canshnaca pipash na tianllu. Shuj Taita Diospash na tianllu, canllami tiangui. Chaitaca, ñucanchi rinrihuambacha uyashcashnallatami, chashna cajta yachanchi.

²¹Cai pachapica, ¿maijan gentecunata can agllashca israelcunashnaca tianyari? Can Taita Dios rishpami, paicunataca cambaj agllashcacuna cachun llujchircangui. Jatun ruranacunata, imapash juyaillacunata rurashpa, cambaj shuti rijsishca cachunmi, chashna llujchishcangui. Egiptomanda can llujchimushpaca, can agllashcacunapaj ñaupajmandami, shuj llactacunapi causajcunataca llujchishpa cachashcangui.

²²Can agllashca israelcunataca, canmi causaita causaicaman cambajlla cachun agllashpa churarcangui. Shina churashpami can Mandaj Diosca, paicunapaj Taita Dios tucurcangui.

²³Cunanga Mandaj Dioslla, canda servij ñucamambash, ñuca huasi ucu puramambash, imatalla villashcacunataca, causaita causaicaman shinllitapacha rurapangui. Imaguta can nijushcatapash rurapailla.

²⁴Chaica chashnapacha pactajpi, cambaj shutitaca causaita causaicaman jatunyachinajuchun. Shinallata: ‘Tucuita Mandaj, israelcunapaj Taita Diosca, israelcunapaca Taita Diospachami’ ninajuchun. Canda servij David ñucapaj huasi ucu puracunapash, cambaj ñaupajpica shinlli cachun.

²⁵Ashtahuangarin ñuca Taita Dios canllatami, ñuca huasi ucu puracuna mandaj cachun churanata, canda servij ñucaman villahuarcangui. Chaimandami canda servij ñucaca, cambaj ñaupajpi imamanda mañanatapash ña charipani.

²⁶Cunanga Mandaj Dioslla, can Taita Diosmi canda servij ñucaman cashna aliguta ruranataca villahuashcangui.

²⁷Cunanga, canda servij ñucapaj huasi ucu purataca, causaita causaicaman cambaj ñaupajpi tianajuchunmi bendiciangapaj munarcangui. Can Mandaj Diosllata bendiciajpimi, causaita causaicaman bendiciai tucunajunga” nijurcami.