Read Imbabura Highland Quichua 1 CRÓNICAS 18 Bible Online

1 CRÓNICAS 18 - Imbabura Highland Quichua bible

1 CRÓNICAS 18

¹Chai jipami cashna tucurca: Davidca, filisteocunata mishashpami, pingaichishpa urai cumuchirca. Gat shuti pueblotapash, muyundi uchilla pueblocunandimi, filisteocunapaj maquimanda quichurca.

²Shinallata Moab llactapi causajcunatapash mishajpimi moabitacunapash, Davidta servijcuna tucushpa, ima caranacunatapash apamunajurca.

³Shinallata Soba shuti llactata jatun mandaj Hadad-ezer shuti runatapash, Hamat shuti pueblopimi misharca. Chai jatun mandajtaca, Eufrates shuti jatun yacu lado llactapi mandashpa tiajungapaj rijujpimi misharca.

⁴Davidca, macanajuna huaranga carretacunata, caballopi tiarij canchis huaranga soldadocunata, chaquilla purij ishcai chunga huaranga soldadocunatami japirca. Shinallata macanajuna tucui carretacunata aisaj caballocunapaj chaqui angucunatapashmi fitirca. Patsaj carretacunata aisangapaj pactanatallami saquirca.

⁵Siria llactapi tiaj Damasco pueblopi causajcunaca, Soba shuti llactata jatun mandaj Hadad-ezer shuti runata ayudashpa macanajungapajmi shamurca. Chashna shamujpimi Davidca, chai siriocunataca chunga ishcai huaranga runacunata huañuchirca.

⁶Chai jipami Davidca, Siria llactapi tiaj Damasco pueblopica, cuidaj soldadocunata churarca. Siriocunaca, Davidta servijcuna tucushpami, ima caranacunatapash apamunajurca. David, maipi macanajugrijpipash, Mandaj Diosca mishachijllami carca.

⁷Davidca, Hadad-ezer shuti runata servijcuna apashpa purij jarcarina oro escudocunatapash quichushpami, Jerusalenman apamurca.

⁸Hadad-ezer shuti runapaj Tibhat shuti, Cun shuti pueblocunamandapashmi ashtaca broncecunata japirca. Chai broncehuanmi Salomonga, mama cucha nishcatapash, jatun pilarcunatapash, Diospaj huasipillata ima charinacunatapash rurachirca.

⁹Hamat shuti pueblota jatun mandaj Toi shuti runaca, Soba shuti llactata jatun mandaj Hadad-ezer runapaj tucuilla soldadocunata David tucuchishcatami yacharca.

¹⁰Hadad-ezer shuti runata mishashcamandami Toi shuti runaca, alillachu capangui nishpa bendiciachun, jatun mandaj Davidpajman paipaj churita cachamurca. Toi shuti runapashmi, Hadad-ezer runahuan macanajushpa causashca carca. Chaimandami orota, culquita, bronceta rurashca tucui charinacunata cachamurca.

¹¹Chaicunatami jatun mandaj Davidca, Mandaj Diospajlla cachun curca. Shinallata Edom, Moab, Amón, Filistea shuti llactacunapi causajcunata, amalecitacunata quichushca orotapash, culquitapashmi Diosman curca.

¹²Chai jahuami, Sarvia shuti huarmipaj churi Abisai shuti runaca, chunga pusaj huaranga edomitacunata, Cachi tiaj pugru pambapi misharca.

¹³Shina mishashpami Edom llactapica, cuidaj soldadocunata churarca. Edomitacunaca, tucuicunami Davidpaj servijcuna tucurca. Mandaj Diosca, David maiman rijpipash, macanajuicunata mishachijllami carca.

¹⁴Davidca, tucui israelcunatami mandajurca. Paica, imatapash cashcatapacha rurashpami, tucui gentecunata mandajurca.

¹⁵Paipaj soldadocunataca, Sarvia shuti huarmipaj churi Joab runami mandajurca. Ahilud shuti runapaj churi Josafat runaca, jatun mandajpaj randi rimajmi carca.

¹⁶Ahitob shuti runapaj churi Sadoc shuti runapash, Abiatar shuti runapaj churi Abimelec shuti runapash, curacunata mandajcunami carca. Savsa shuti runami, escribij carca.

¹⁷Joiada shuti runapaj churi Benaía shuti runaca, cereteo nishca, peleteo nishca runacunatami mandajurca. Jatun mandaj Davidpaj churicunaca, paipaj ladopimi mandanajurca.