Read Imbabura Highland Quichua 1 CRÓNICAS 20 Bible Online

1 CRÓNICAS 20 - Imbabura Highland Quichua bible

1 CRÓNICAS 20

¹Mushuj huata callaripimi, cashna tucurca: Jatun mandajcuna jatun macanajuiman llujshina punllacunapimi, Joab shuti runaca ashtaca soldadocunata tandachishpa rishpa, amonitacunata tucuchirca. Shinallata Rabá shuti pueblomambash shamushpami, chaupipi churarca. Joab runaca, Rabá shuti pueblotapashmi tucuchirca. Ashtahuangarin Davidca, Jerusalenbimi quedashca carca.

²Chai jipami Davidca, Rabá shuti pueblota jatun mandajpaj umamanda coronata llujchirca. Chai coronaca, quimsa chunga chuscu kilo oro coronami carca. Chai coronapica, juyailla punchapamba rumicunata churashcami carca. Chai coronataca, Davidpaj umapimi churarca. Chai jahuapash chai pueblomandaca, ashtaca imalla charishcacunatapashmi Davidca llujchirca.

³Chai pueblopi causanajuj gentecunatapash llujchishpami, sierracunahuan, jirrucunahuan rurashca trillanacunahuan, jachacunahuan imatapash ruranajuchun churarca. Davidca, Amón llactapi tiaj tucui pueblocunapi causajcunatapash, chashnallatami rurajurca. Chai jipami, tucui paipaj soldadocunandi, Jerusalenman tigrarca.

⁴Chai jipaca, cashnami tucurca: Gezer shuti pueblopimi filisteocunahuan jatun macanajui jatarirca. Chai macanajuipimi, Husa shuti pueblomanda Sibecai shuti runaca, manllanayai jatun runacunapaj miraipura Sipai shuti runata huañuchirca. Filisteocunaca, pingai tucushpami urai cumurinajurca.

⁵Filisteocunahuan cutin jatun macanajui jatarijpica, Jair shuti runapaj churi Elhanán shuti runami Lahmi shuti runata huañuchirca. Chai runaca, Gat shuti pueblopi causajuj Goliat shuti runapaj huauquimi carca. Chai Goliat runapaj lanzaca, telarpi pilluna caspishna racumi carca.

⁶Gat shuti pueblopica, cutinmi jatun macanajui callarirca. Chai pueblopica, manllanayai jatun runami tiarca. Paica maquipipash sucta dedota, chaquipipash sucta dedotami charirca. Tucuimandaca, ishcai chunga chuscu dedomi carca. Chai runapash, manllanayai jatun runacunapaj mirai purallatami carca.

⁷Chai runami, israelcunata nalicachishpa rimajurca. Shina cajpipash, Davidpaj huauqui Simea shuti runapaj churi Jonatanmi huañuchirca.

⁸Chai manllanayai jatun runacunaca, Gat shuti pueblomanda manllanayai jatun runacunapaj mirai purami carca. Paicunataca Davidpash, paita servij soldadocunapashmi huañuchirca.