Read Imbabura Highland Quichua 1 CRÓNICAS 23 Bible Online

1 CRÓNICAS 23 - Imbabura Highland Quichua bible

1 CRÓNICAS 23

¹Davidca, ashtaca punllacunata causajushpa ña rucugupacha cashpami, paipaj churi Salomondaca, israelcunata jatun mandaj cachun churarca.

²Shinallata israelcunata tucui mandajcunata, curacunata, levitacunatapashmi tandachirca.

³Levitacunataca, quimsa chunga huatata charijmanda vichaimanmi cuentanajurca. Tucui paicunata shuj shuj cuentajpica, quimsa chunga pusaj huaranga levitacunami carca.

⁴Paicunataca, ishcai chunga chuscu huarangataca, Mandaj Diospaj huasipi Diosta servijcunata ricuchunmi churarca. Sucta huarangataca, mandajcuna cachun, juezcuna cachunmi churarca.

⁵Shinallata chuscu huarangataca, Diospaj huasi pungucunapi cuidachun, caishuj chuscu huarangacunataca Mandaj Diosta alicachinajuchunmi churarca. Davidca: “Diosta alicachingapaj ñuca rurashca tocanacunahuan alicachinguichi” nircami.

⁶Davidca, Gersón, Coat, Merari shuti Levipaj churicunapaj miraicunataca, pai puralla shicanyachishpami, shican shican churarca.

⁷Gersón runapaj churicunaca: Laadán shuti, Simei shutimi carca.

⁸Laadán shuti runaca, quimsa churicunatami charirca: Punda churica, Jehiel shutimi carca. Paipaj catica, Zetam shuti, Joel shutimi carca.

⁹Simei runaca, quimsa churicunatami charirca. Paicunaca: Selomit, Haziel, Harán shuticunami carca. Paicunami, Laadán shuti runapaj familiacunata mandajcuna carca.

¹⁰Simei shuti runapaj churicunaca: Jahat, Zina, Jeús, Bería shuticunami carca. Cai chuscucunami, Simei shuti runapaj churicuna carca.

¹¹Jahat shuti runami, punda churi carca. Paipaj catica, Zina shutimi carca. Ashtahuangarin Jeús shuti runahuan, Bería shuti runahuanga, na tauca churicunata charircachu. Chaimandami, shujlla familiashnalla cuentai tucunajurca.

¹²Coat shuti runapaj churicunaca: Amram, Izhar, Hebrón, Uziel shuti chuscu churicunami carca.

¹³Amram shuti runapaj churicunaca: Aarón shuti, Moisés shutimi carca. Aaronbash, paipaj miraicunapash, paicunapaj tucui causaipi Diospajlla shicanyachishcacunapi servishpa causanajuchunmi shicanyachirca. Mandaj Diospaj ñaupajpi inciensota rupachinajuchun, Diospajta ruranajuchun, shinallata paipaj shutipi israelcunata tucui causaipi bendicianajuchunmi shicanyachirca.

¹⁴Diosta servij Moisespaj miraicunaca, Leví shuti runapaj ailluhuanmi cuentai tucunajurca.

¹⁵Moisespaj churicunaca: Gersón shuti, Eliezer shutimi carca.

¹⁶Gersón runapaj churi Sebuel runaca, mandajmi carca.

¹⁷Eliezer shuti runapaj churi Rehabías shuti runapash, mandajmi carca. Eliezer runaca, na shuj churicunata charircachu. Ashtahuangarin Rehabías shuti runapaj ashtacacuna carca.

¹⁸Izhar shuti runapaj churi Selomit shuti runaca, mandajmi carca.

¹⁹Hebrón shuti runapaj churicunaca, caicunami: Jerías shuti runaca, mandajmi carca. Paipaj catica, Amarías runami carca. Ishcaipaj catica, Jahaziel runami carca. Quimsapaj catica, Jecamán shuti runami carca.

²⁰Uziel shuti runapaj churicunaca, caicunami: Micaía shuti runaca, mandajmi carca. Paipaj catica, Isías runami carca.

²¹Merari shuti runapaj churicunaca: Mahli shuti, Musi shutimi carca. Mahlipaj churicunaca: Eleazar shuti, Cis shutimi carca.

²²Eleazar runaca, churicunata na charishpallatami huañurca. Shina cashpapash ushicunataca charircami. Chai ushicunataca, paicunapaj familiapura Cis shuti runapaj churicunami, paicunapaj huarmi cachun japirca.

²³Musi shuti runapaj churicunaca: Mahli, Edar, Jeremot shuti quimsa churicunami carca.

²⁴Paicunami, paicunapaj ñaupa taitacunapaj familiacunamanda mirashca Leví shuti runapaj miraicuna carca. Paicuna mashna tiajta yachangapaj, paicunapaj shutipi imashna cuentashcashnallata paicunami, familiacunata mandajcuna carca. Paicunataca, ishcai chunga huata yalita charijcunataca, tucuillatami shuj shuj cuentarca. Paicunami, Mandaj Diospaj huasipi imatalla ruranacunata rurashpa, Diospajta ruranajurca.

²⁵Davidca cashnami nirca: “Israelcunata Mandaj Taita Diosca, pai agllashca israelcunamanmi, casilla ali causaita cushca. Paica, Jerusalenbimi causaita causajunga.

²⁶Levitacunapash, Diospaj jatun carpata, Diospajta rurangapaj ima charishcacunataca, na ashtahuan maimambash apangachu” nircami.

²⁷Jipaman imashna canata David ricushpa mandashcashnallatami, Leví shuti runapaj miraicunataca, ishcai chunga huatata charijmanda vichaiman cuentachun mandarca.

²⁸Paicunaca, Aaronbaj miraicuna mandajpimi, Mandaj Diospaj huasipi Diospajta ruranajurca. Huasi patiocunapi, ucucunapi, Diospajlla shicanyachishcacunata ima mapapash illajta rurashpami, imapash ashtahuan shuj ruranacunatapash, Taita Diospaj huasipi Diospajta ruranajurca.

²⁹Shinallata Diosman shicanyachishca tandatapash, animalcunata huañuchishpa carana ashtahuan ali jacutapashmi ruranajurca. Levadura illaj ñañulla jatun tortillacunatapash, sartenbi yanuchinatapash, camllanacunatapash, paicunami rurana carca. Tucui medinacunata, pezanacunatapashmi ricunajurca.

³⁰Shinallata tucui punllacunami tutamandata, Mandaj Diosta pashi nishpa, alicachingapaj rina carca. Shinallata chishicunapashmi rina carca.

³¹Samana punllacunapi, luna llullu punllacunapi, jatun fiesta punllacunapi, Mandaj Diosman cushca tucui animalcunata tucuillata rupachingapajpashmi rina carca. Mashna animalcunata cunashnallata, imashna rurachun mandashcashnallatami, Mandaj Diospaj ñaupajpi cunajurca.

³²Dioshuan tuparina jatun carpatapash, Diospajlla huasitapash, paicunallatami cuidanajurca. Paicunaca, Aaronbaj mirai paicunapaj huauquicuna mandajpimi, Mandaj Diospaj huasipi Diospajta ruranajurca.